Yitzhak Shamir (2), (En Djudeo-Espanyol)

Por:
- - Visto 362 veces

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar,  vos akodro ke el proksimo atelye de konversasyon de Vidas Largas se tendra el martes ke vyene 24 de mayo, de las  dos a las kuatro i medya, en el Centre Communautaire.

Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya. http://www.radioj.fr/node/145


La semana pasada, vos estava kontando komo Shamir, ke lavorava para el Mossad, salyo del Mossad en mismo tyempo ke su kapo Isser Harel, por modo de la fin de la Operasyon Damocles kontra los savyos i injenyeres nazis ke lavoravan a missiles para Nasser.

Empesaremos por el empesijo: el nasimyento, el 22 de oktovre 1915, en la sivdadika ke tyene el nombre yidisch de Rozshinoy, en lo ke era kuando nasyo la Polonya okupada por los Rusos, i ke oy se yama Ruzhany i se topa en Byelorusia, de un ijiko yamado Yitzhak Jazernicki, ke mas tadre se yamara Shamir.

Shamir va tener, en tanto ke primo ministro, de afrentar varyas difikultades, komo la imigrasyon de los djudyos rusos en los anyos 1989, la gerra del Golfo en janvier 1991, la imigrasyon de los Etyopyanos en mayo 1991, la reavyertura de relasyones diplomatikas kon la URSS en oktovre 1991, la konferensya de Madrid al kavo de oktovre 1991.

En kuanto a los djudyos de Rusiya, una vez ke el governo de Gorbachev les permityo de irse de URSS, Shamir se tresalyo pensando ke ivan a venir en Israel. Halbuki se apersivyo ke munchos, en vez de irse en Israel, eskojiyan los Estados Unidos, i ke los Amerikanos les davan los visas ke teniyan de menester.

Arravyado, Shamir demando a los Amerikanos de no dar mas vizas a los djudyos rusos, lo ke achetaron los Amerikanos, de tal manera ke vinyeron en Israel un milyon de Rusos ke sin la politika de Shamir no seriyan todos venidos en Israel. Esto era muy importante para Shamir. Mi amigo Jose Molho me konto ke una vez se topo en Paris asistyendo a una reunyon en onor de Menahem Begin, i el ke estava asentado al lado de el no era otro ke Yitzhak Shamir, ke dainda no era primo ministro. Mi amigo empeso a echar lashon kon Shamir, i este le disho kuanto kontava sovre la venida de djudyos Rusos en Israel (i tambyen de los Sud Afrikanos). Kada milyon de djente de mas es una fuersa de mas.

En kuanto a la gerra del Golfo, ke empeso en janvier 1991, i a la kuala Israel no partisipava, mos akodramos todos komo Saddam Hussein anunsyo ke si era atakado, iva echar misiles Scud sovre Israel, afillu si Israel no aziya parte de los ke lo atakavan. Esta menasa era muy sekanoza, porke se teniya espanto ke los misiles sean kargados kon gaz. I Saddam, una vez atakado, izo lo ke aviya prometido, embiyo scuds sovre Israel. I todos los de Israel se metyeron maskos de gaz Todos eran siguros ke Israel iva responder en bombardando Irak, i de esto se espantavan muncho los Amerikanos, porke esto uvyera patladeado la unyon entre las armadas amerikanas i las de los otros paizes arabos del Golfo. Los Amerikanos demandaron a Shamir de no responder kontra los scuds, prometyendole misiles Patriot antiscuds, i Shamir, el antiguo kapo del grupo Stern, acheto, provando ke puediya amostrarse moderado si pensava ke era del interes de Israel.

En kuanto a los Etyopyanos, ya konti aki, ay sej anyos de esto, en mi emisyon del 1 de avril 2010, komo en 1991, kuando kae el governo komunisto kon Mengistu, los 14.300 beta Israel ke se topan en los kampos de refujyados son yevados en dos diyas en Israel por un ponte aereo : 34 bueltas de avyones de El Al, sin siyas para pueder tomar mas djente. Se yama la operasyon Shelomo, ke vale a la kompaniya El Al el rekord de djente yevada en un solo avyon : 1087 personas en un boeing 747.

La politika de Shamir va ser tambyen de aserkarse de los Rusos para pueder esperar tener amigos ke lo ayuden frente a los arabos. En oktovre 1991, las relasyones diplomatikas kon la URSS son de muevo avyertas, salvo ke la URSS tyene dainda solo dos mezes de bivir. Esto dicho, las relasyones se van a kontinuar kon la Rusiya, i en 1992, Shamir avre relasyones diplomatikas kon su pais de nasimyento, la Byelorusiya.

Es durante el tyempo ande Shamir es primo ministro ke se van a tener en el Palasyo Real de Madrid la Konferensya internasyonala ke va surear tres diyas, del 30 de oktovre 1991 al 1 de novyembre 1991. El eskopo de esta konferensya es de topar akodros de paz entre Israel i los arabos, savyendo ke la paz ya fue firmada en 1979 entre Israel i Ayifton.

A esta konferensa partisipan:

  • los Espanyoles, por siguro, reprezentados por el primo ministro Felipe Gonzalez
  • los Amerikanos, reprezentados por el Prezidente George Bush (el padre) i el Sekretaryo de Estado James Baker
  • los Rusos, reprezentados por el Prezidente Mikhail Gorbachev i el ministro de los echos ajenos Boris Pankin;
  • los Evropeos, reprezentados por el ministro de los echos ajenos de Holanda, Hans Van den Broek
  • los Ejipsyanos, reprezentados por el ministro de los echos ajenos Amre Moussa
  • los Israelyanos, reprezentados por el primo ministro Yitzhak Shamir
  • los Jordanyanos, reprezentados el ministro de los echos ajenos Kamel Abu Jaber
  • los Palestinyanos, reprezentados por Haider Abu Shafi
  • los Lebanezes, reprezentados por el ministro de los echos ajenos Fares Bouez
  • enfin los Syryanos, reprezentados por el ministro de los echos ajenos Farouk Al Shara.

No tengo el tyempo, aki, de kontarvos todo lo ke se disho durante estos tres diyas, ke por Israel fueron dos, syendo ke el treser diya, el 1 de novyembre, kaiya en Shabath, i ke Shamir tuvo de irse vyernes para ayegar en Israel antes de la venida del Shabath, ke kaye presto en novyembre.

Yene Shamir tuvo el tyempo de azer dos diskorsos, uno el djueves 30 de oktovre, otro el vyernes 31.

I vos kyero trasladar en muestra lingua i meldarvos partes de estos dos diskorsos, ke afillu 25 anyos mas dospues, un kuarto de siglo, me paresen bastante interesantes, i de syerta manera profetikos asigun mi, ama esto es a vozotros de djusgar.

Empesaremos por el primer diskorso:

“Es un onor de reprezentar el puevlo de Israel en este momento istoriko, i un privilejyo de empesar esta avyertura de negosyasyones de paz entre Israel i sus vizinos arabos.

Keriya esprimir muestro profundo agradesimyento a muestros  kombidantes espanyoles para sus ospitalidad, i por aver rendido posivle esta reunyon para la paz. En sus dos mil anyos de partaleo (errance, wandering) el puevlo djudyo kedo aki durante munchos siglos antes de ser echado afuera aze 500 anyos. (aki yo, Edmond Cohen, avro una paranteza: esto es tipiko de Shamir. Si tyene una koza de dizir, lo dize, afillu si embataka. Syerro la paranteza). Era en Espanya ke el grande poeta i filozofo Yehuda Halevi esprimyo la nostaljiya para Tsion de todos los Djudyos kon estos byervos: “Mi korason esta al oryente, myentres me topo al ultimo bodre del oeste”.

(…)

El puevlo de Israel mira a este Palasyo kon una grande esperansa. Oramos ke este enkuentro firmara el empesijo de un muevo kapitulo en la istorya del Medyo Oryente; ke amostrara el kavo de la ostilidad, de la vyolensya, de la terror i de la gerra; ke traera dyalogo, entendimyento, koegzistensya i -ensima de todo- paz.

(…)

Somos el solo puevlo ke bivyo en la tyerra de Israel sin interrupsyon durante kaji 4.000 anyos. Somos el solo puevlo, salvo un kurto reynado cruzado, ke tuvo una soverenedad independyente en esta tyerra, somos el solo puevlo para kyen Jerusalem fue una kapitala, somos el solo puevlo ke tyene sus lugares sagrados solo en la Tyerra de Israel.

Dinguna nasyon esprimyo su atadijo kon su tyerra kon tanta intensidad i konstansya komo mozotros. Durante miles de anyos muestro puevlo repeto a kada okazyon el grito del Psalmisto: “Si te olvido, Yerushalayim, ke me olvide mi derecha”. Desde miles de anyos mos enkorajimos el uno al otro kon este auguryo: “el anyo proksimo en Yerushalayim”. (…) Solo Erets-Israel, la Tyerra de Israel, es muestra haliz patria. Kualkyer otro pais, tan ospitalyero ke sea,  keda syendo una diaspora, una estasyon temporarya en el kamino para kaza.

(…)

Kontra la desizyon internasyonala i la legalidad, los paizes arabos aprovaron de envadir i destruir el Estado Djudyo antes mismo ke naska. El reprezentante arabo en las Nasyones Unidas deklaro ke el establesimyento de un Estado Djudyo dariya nasimyento a un banyo de sangre ke azeriyan las matansinas de Genghis Khan chikas en komparazon.

(Aki yo, Edmond Cohen, avro una paranteza: el ke avlo ansina fue Azzam Pasha, Sekretaryo Jeneral de la Liga Araba, en una entrevista a la gazeta ejipsyana Akhbar al Yom del 11 de oktovre 1947, dunke antes del voto de la ONU,  entrevista intitolada “Una gerra de eksterminasyon”, ande disho: “Yo personalmente dezeo ke los Djudyos no mos yeven en esta gerra, porke sera una gerra de eksterminasyon i de grande matansina de las kuales se avlara komo de las matansinas tartares o de la gerras de cruzadas.” Agora ay istoryanos ke aprovan de menguar lo ke disho Azzam Pasha, ama no se kontento de avlar: fue eskrito en la gazeta, i es yuch de pretender agora ke no disho lo ke es eskrito en la gazeta. Syerro la paranteza, i kontinuo de meldar el primer diskorso de Shamir).

(…)

Despues ke sus atako de Israel no reusho, los paizes arabos kontinuaron sus kombate kontra Israel kon boycott, blocus, terrorismo i gerra total. Poko despues del establesimyento de Israel, se aboltaron kontra las komunidades djudiyas en los paizes arabos. Una ola de opresyon, ekspropriasyon i ekspulsyon dyo un egzodo de masa de unos 800.000 djudyos de paizes en ke moravan de antes del nasimyento del Islam.

(…)

Syenes de miles de arabos palestinyanos biven en chosas konosidas komo kampos de refujyados en Gaza, Djudea i Samariya. Las tentativas por Israel de reabilitar i dar kazas fueron refuzadas por los arabos. Sus suerte no fue mijor en los paizes arabos. A la diferensya de los refujyados djudyos vinyendo en Israel de paizes arabos, la mayoriya de los refujyados arabos no fueron ni akojidos ni integrados por los moradores. Solo el Reyno de Jordaniya les dyo la sivdadaniya. Sus situasyon a sido utilizada komo una arma politika kontra Israel.

(…)

I embiyamos una yamada a los Arabos Palestinyanos: esvacheavos de vyolensa i terrorismo, utilizad las universidades en los territoryos administrados – a kyen solo Israel izo posivle sus egzistensya – para el ensenyamyento i desvelopamyento, no para la ajitasyon i la vyolensya, kedadvos de meter vuestras kriaturas en sekana en embiyandolas para echar bombas i pyedras a  askeres i siviles.”

Estos son pedasikos del primer diskorso de Shamir. No tengo bastante tyempo para meldarvos el diskorso de Shamir el diya de despues ande se amostra arravyado por lo ke oyo el diya de antes de los diskorsos de los arabos. Solo vos meldaré un muy kurto pedasiko de este sigundo diskorso, dicho ay 25 anyos, un kuarto de siglo, ama parese tener sido dicho oy:

“No solo son los djudyos viktimas del rejimen syryano. La Syrya es la kaza ke abriga organizasyones terroristas ke embiyan vyolensya i muerte a todo modo de mendirizes (cibles, targets) inosentes, inkluyendo avyasyon sivil, i mujeres i kriaturas de munchos paizes. Podriya kontinuar de kontar un alay de echos ke amostran a ke punto la Syrya merese el onor shupeli de ser uno de los rejimenes lo mas tiranikos en el mundo. Ama no es por esto ke vinimos aki”.

En 1992, Shamir pyedre las eleksyones. En 1993, desha la direksyon del Likud, i va ser un syerto Binyamin Netanyahu ke va venir detras de el a la kavesa del Likud. Shamir lo topa demaziya flako frente a los arabos i dechida de salir del Likud en 1998, i entra en el partido Herut de Benny Begin (el ijo de Menahem). Despues ke Netanyahu pyedre las eleksyones, Shamir entra de muevo en el Likud para sostener Ariel Sharon.

Ama a poko a poko Shamir pyedre su salud, i es esta desgrasya de hazinura de Alzheimer ke lo aharva. Shamir va bivir asta el 30 de djunyo 2012. Va tener funerales nasyonales, i ser enterrado en el Monte Herzl.

Kada uno puede pensar lo ke kyere de este ombre, a la vez matador i primo ministro. Ama una koza es sigura:  su eskopo no era de enrikeserse o de kedar al poder para el poder. Su eskopo era su idea del syonismo, para el byen de su tyerra i de su puevlo.

Al djueves ke vyene, si kyere el Dyo!

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: