Savores I Golores

Di-o mos dyo, en Su immensa Buendad, las
savores i las golores para ke no komemos i
no golemos kozas ke no son buenas para
mozotros i lo mas importante de todo
LO KE NESESITAMOS PARA BIVIR…
Metyo kolores, savores, formas para ke los
alimentos mos vengan ermozos i mos atrayen,
mos den ganas de gostar i de komerlos.

Las savores son tan importantes ke se uzan
por el karakter de las personas ! Dizen ke los
viejos son agreyados i amargados por la vida….
Yo no esto de este avizo ! Puedeser por unos
kuantos ma lo mas son amables i es un plazer
de avlarles, kontarles, tomar sus avizos… Por
seguro ke depende de ken, komo, kuando…

LAS PERSONAS

Una persona agra …
Komo limon !
(La esuegra ? – Ay i komo bonbon )

Una persona amarga …
Komo kura !
(La enfirmiera ?- Ay i komo manteka..)

Una persona dulse ….
Miel le eskure..
Dizen ke es komo sharope..

Ma ay el ke es komo tosigo
No se saves si es amigo o enimigo
Te morye kuando te asperas lo manko !

Una persona kon pimienta …
Asperate todo de eya !
La vez kon riza i enseguida se inyerva !

Me gustan las personas ke reaksyonan
La birra les asuve i supito saltan i gritan
Ma el momento dospues se kalman..

Una persona sin savor…. Komo yerva !
Keda kayada, ni avla, ni riye ni se inyerva
Nunka saveras lo ke le pasa por la kavesa.

Komo asukar ke no se ata !!!!
Pipino en el sesto i gato en la guerta
No sierve ni al vizino ni a su espoza !