JACA ILE KAMINO ARAGONES EN LA FOTOGRAFIYA
(El payis de mis bis-aguelos !)
El Judeo Espanyol es el Aragones Medyeval Oksidental !!!
Ke fueronn a bushkar kon el ladino no se !!!
…… I ke dishimos ? Ke kale meter un poko de asukar en todas las komidas ke se guizan kon domat, para tomarles la agror. Espesyalmente en las verduras de enverano komo de invyerno para ke tengan un mijor savor. Muy poko por seguro ! No tenemos dinguna intensyon de azer una marmelada de spinacha o un pastel de kalavasikas.
Mi kerido Eliko, por seguro ke no vamos a meter asukar en los makarones al orno ! Oh nonono….. Kon salud i plazer ke lo komas ! No se ande se eskonde la salud en ansina de komida, para paladar de reyes, ma en bueno pensaremos i bueno ke salga!
Lo bueno keda ! Si mos vamos a ansyear por kada pasiko ke tiyene ke pasar por el garon mos vamos a murir de ansya.. Alora….” Tant va la cruche a l’eau qu’a la fin elle se casse ” kere dizir ke la kanata se rompe en el kamino a la agua ! I es esto ke va afitar para las personas komo ti i komo mi ke no azemos heshbon (kuento) a lo ke kale ma a lo ke mos plaze ! Let it be !
Siempre penso a la dezmazalada de la bovika de la Prinsessa Diana ! Kuanto se miro i la miraron ! Gramo aki gramo aya jimnastik para el kuero jimnastik por el kaveyo i jimnastik por la unya ! Todo por la salud i la ermozura i el buen estar… I leshozzzzzzzzz ! Por la dezgrasya ke le afito tan manseva i tan ermoza ! Por esto lo ke es eskrito sera i solo mi Amigo arriva en los Sielos save la repuesta ! El kusur…Koza ke no mos inche…. Es Su echo i yo Le ago konfiensya Ad ha sof (fin a la fin) ! Va tomar mi manizika i sin ke me espante me va trayer a un Lugar Ermozo ande me vo arepozar de tanto eskrivir ! Dizes ke me aze Su sekretarya ? Kon plazer ! Deke no !
Ansina es muestro Espanyol luzyo ! Un poko Turko, un poko Fransez, un poko Ebreo, un poko Inglez. Esto es el halis (verdadero) ! Ma yo el Aragones Medyeval Oksidental no lo troko por nada ! Deke no lo troko? Porke ….porke Es sharonfonfon ! Chik i mostrozo ! Ay Historya en esto… Es noble… Aragon ! Oksidental es sivilizasyon avansada… Nada komo los muestros oryentales kayintes ! Kale ser ansina… un poko yelado para ke tengas mas valor! No riyir komo riygo yo ! Todo los diyentes afuera ! (Porke son todos miyos dayinda ! Mis perlizikas presyozas… ) Una medya soriza i te kontan por leydi leshozzzzzzzzz ! Muncho “ley” no es bueno.. Kale azer i lo ke te viene de aryento ! El mas negro es kuando te kortan las alikas i keres bolar…bolar ayyyyy bolarrrrrrrrrr i no puedes ! No ay alikas para esto… Ke dezgrasya ! El Di-o ke no de ! No ay mas negro de kerer i no pueder ! Ya se izo otra vez todo una limonada ! No ! Era Chorba (supa) ke kaliya dizir ! Bueno basta de bavajadas… No ay fin kuando empeso i ni mi boka se kaya ni mi mano keda !
Amistades keridos…
Artículos Relacionados: