Ke ermozo es la inyorensya bre !!!!
Saves todo !
Albertiko Einstein
La mas negra inyorensya es kuando la persona rechessa una koza ke no save…..
J. Brown
La inyorensya es una malasuerte ke la persona kere de korason !
M.T.Cicero
Nada es mas negro de la inyorensya en movimiento
Bernard Shaw i Goethe
La inyorensya engendra la violensya
S. Freud
“Djahil/a” es un biervo ke se adjunto al Judeo-Espanyol del Turko i ke signifika inyorente/a, ke no se fue a la eskola o no tuvo la oportunitad de ambezarse kozas, la vida……
Pensando ke los muy mansevos no tiyenen del todo eksperyensa en la vida, konektaron este biyervo a los aktos ke se azen sin pensar o sin saver… uno mato a un otro ? Djahillik ! Uno peryo todo lo ke teniya en los kazinos ? Djahillik ! Una madre aogo su bebe porke kedo durmida ensima de el ? Djahillik ! I ansina munchos egzemplos ekstremos ke se
eskonden detras de un biervo ke areyeva muncha agua !!!!
Un otro egzemplo es el asassino ke viene al tribunal i dize al djuzgo kon lagrimas en los ojos : ” Muy estimado djuzgo …. So un hombre djahil.. Todos lo somos en muestro puevlo serka de la frontiera kon Irak…. Bivimos por muestra honor i lo ke mos komandan muestros grandes ! Ke puediya azer ? Disheron ke en la boda de la ija de mi ermano un mansevo del puevlo vizino kedo mirando a mi ija i avlo kon eya debasho del arvole ande enkolgamos ridas i pedasos de ropa para ke muestros dezeos se realizen ! Ke kijo dizir esto ? Yo tengo ojo en ti ! Entendesh agora lo ke se paso ? Mizmo si los grandes no me ivan a forsar a matar los, lo iva azer yo kon mi propria desizyon ! Los mati i alimpyi mi honor ! Ma la keria muncho a esta ijika mia… Era la dalkavo, muy ermoza i lavorava duro…. Ken va azer agora todo lo ke lazrava en muestras tierras ? Djahillik ! No pensi djusto i esto arepintido ! ”
Ke fue la kontinuasyon ? El hombre se kedo 6 mezes en prizyon i dospues lo desharon libre para kontinuar su “djahillik” !
Bolaron a los sielos una masevika de 16 anyos kon un chiko de
18 ! Meresyeron esta muerte porke pekaron ! Avlaron debasho
del arvole de los dezeos !
…..I kualo dizir a la mujer ke se muryo porke el marido le dyo una punta de piye (no supo bien kon ke fuersa se teniya ke dar esta punta de piye !) kuando estava prinyada de 9 mezes ? Esto es un uzo en estos puevlos “djahiles” para ke la mujer parya un ijo ! I ke ay si se muryo ? El Di-o le dyo este karar de vida ! Es el mazal suyo povreta ! El hombre ya tiene otras dos en kaza kon munchas kreaturas. No ay dingun mal ! Afitan estas kozas…. No…no.. La djustisya no tiene nada de ver kon ansina de kozas ! Por siguro ke no ! Es un aksidente ! No la keriya matar ! Esto es ! Esto era eskrito en su frente… Dingunos no lo kulpan !
Munchos i munchos otros kavzos asemejantes ke no mos pueden ni kuadrar en el siglo 21….. En lugares ande se bive komo en la Edad Medya… Sin eskolas, sin ayuda medikal, medyo muertos de ambre ma ande la relijyon de los inyorantes “hodja”s i la palavra de los inyorantes “aga”s (el shef del klan) son la Ley del lugar… Estos “aga”s ke se enrikeseron muy muncho kon el trafiko de armas, de drogas i ke tienen siyenes de lavorantes/esklavos para sus tierras sin fin ….Rikezas kolosales en la mano de djente ke ni fueron a la eskola !
Los “aga”s ke son los reyes medievales ke kon una palavra de sus bokas bolan las almas al Gan Eden…. Ande la mujer no tiene dinguna valor i es buena solo para lavorar i engrandeser los chikos…. La honor de la famiya por ser mujer ! Tiyene ke ser tapada i mirar solo abasho ! No avlar ande ay hombres….Estar kayada en frente de la esuegra i ser su esklava tambien…. Fina el diya ke va ser esuegra eya mizma i se va vengar de una ernuera de 13 anyos puedeser, por todos estos anyos ke kedo kayada, la aharvaron, la mataron de lavoro para engrandeser sus propriyo ijos komo los ijos de su esuegra…. Lavoro la tierra debasho del sol kemando kon sus manos firyidas… Sufriyo todo las sufriensyas ke se puede
imajinar en este mundo sin piyadad para tantos i tantos….
LA HUMANITAD DEVE DE SER SOLIDARIOS BENEVOLENTES KE GUERREYAN KONTRA LA INYORENSYA KAVZANTE DE TODOS LOS MALES EN LA SOSYETAD.
Ke dingunos no konozkan las desgrasyas ke egzistyeron i dayinda egzisten en muestros diyas….. Piyadad de los Sielos… Amen!
Artículos Relacionados: