Diario Judío México - El jarriko de la atzlaha
(De la mizma «famiya» de mi artikolo)
https://diariojudio.com/idioma/djudeo-espanyol/superstisyones/303176/

Somos superstisyozos…. Es una vedra por lo mas de las pesonas ken ke seyan, hombres i mujeres, pretos i blankos, edukados o no, urbanos o kampesinos, rikos o proves, todos todos sin eksepsyon… El mas no kreyente, i ay munchos, tendra un chiko pedasiko apegado a su kola, detras de la oreja, en una parte eskondido en su miente… de una manera…. mizmo si lo niega, (komo mi !) i pensa ke son tonteriyas kon razon !

Son kreensyas okultas ke mos kedaron lo mas…..houuuuuuuu… de muy muncho tiempo antes, de kuando aziyamos partido de las tribus paganas ! Fina muestro tiempo ? He.. Si ! Porke es muncho mas fasil de kreyer en fantaziyas ke en la realitad… Da esperansa, se kreye ke dingun mal va afitar, permete de tomar prekosyones para ke seyamos salvos del mal, ke tengamos atzlaha (reushitad, ganansya, buena suerte), ke no ayga pletos i bivemos en paz ets….

Por egzemplo ay personas, i muy sezudas, ke dizen «pensa al bien i te va salir bien !» Puedeser ! Un buen moral i ver las kozas de manera pozitiva da un buen rezultado porke se save ke en medisina el puerpo se siente mijor kuando la persona no esta deprimida i tiene la rezolusyon de kuarse ! No siempre por seguro…. Ma vale la pena de intentar. De mizmo por un projekto o un tiempo difisil en kaza, en el echo, en sus estudyos…. Es kuaji seguro ke kuando la persona tiene konfiensya en si, lavora duro sin pensar a no reushir, da toda su ardor, yega a lo muncho mijor i mizmo a lo ke kijo yegar… El esfuerso moral, la buena voluntad en otros biervos, paga en dando satisfaksyon.

Pensi a todo esto pormodo del kazamiento de mi ijo ! Me vash a demandar komo de relasyon puede tener la superstisyon kon el kazamiento de mi ijo ?

En mi kavesa de sinko gramos de meoyo, ay ! Kuando la persona no tiene ke azer i todo esta perfekto, empesa a fraguar mil kozas en su tino fina ke lo «bola» por entero !!! No ! Grasyas al Dio no esto aya… Leshos de mi ! Solo ke pensi ke puedra ser la reaksyon de mi ijo, absolutamente «ateisto» en superstisyones kuando le iva demandar de aparejar un «jarriko de atzlaha» en su kozina, arriva en un estante (raf). Es un bote (kavanoz) ke se inche kon aroz, arina, asukar, un gueventero i azeyte de oliva. I un jarriko yenno de oro !…. No ! Moneda basta…..

Lo vide ande mi granmami i kon mi mamita i siempre lo ize pensando a eyas kon una soriza. Agora lo kijyera para ande mi ijo (en Inglaterra !) para kuando mi ernuerizika se va ir aya, a su mueva kaza… Penso ke le va salir el permisso fina Enero 2011….

[email protected]

———————–

Me akodro ke mi madre, ke en GanEden este, kuando trokavamos de kaza
aparejava un poko de sal, pan i aroz en una bolsika i lo dejava en la kuzina para buen mazal i beraha.
Uri Carabatakis-Behar de Orlando

———————–

I yo konosi la tradision del jariko kuando pasavan a morar en kaza mueva, ….. I ansina fue, le dishe a mi novia (oy mi mujer) ke la kaza la va estrenar en el dia de la hupa. Akel dia mi esfuegra izo este seremonia i incho el frijider yeno de todo bueno (guevos, leche, sukar I mas kozas ) i yo ize mezmo en los kazamientos de mis 3 ijos,
joseph negrin <[email protected]>

———————

Yo so fija de selaneklis, i mozotros tambien uzamos estrenar kaza kon kostumbres semejantes.
guevo: «ke sea yeno komo el guevo»
asuka : dulse komo el asuka «ke sea del siman bueno»
arroz: «ke puje komo el arroz »
azeyte: «puro i klaro komo el azeyte»
se bendize: «ke tu kaza i vida sera syempre dulse i repozada».
mi fijo se entro kon su novya a morar en sus kaza, i les ekspliki a la novya ke es eshkenazia el uzo. Se tresalio de alegria.
lsarahbejerano <[email protected]> Israel

———————–

Sovre la tradisyon de traer syertas kozas a una mueva morada. Yo me akodro de este uzo porke lo vide de mi nona, ke en paz deskanse. Las kozas ke se traian eran simbolikas: asukar, para ke ayga dulsor en la kaza, pan, para ke no ayga ambre, i una mueva eskova …
Benny Aguado – New York

 

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.