EL DJEZVE I LA KOSTUMBRE DEL KAFE
Muncho mas aya de su aroma i de su savor, el kafe turko es una tradisyon de mas de 500 anyos ke nunka peryo su importansya, de las kazas las mas povres a los kuartos de los palasyos de los Sultanes. Una de las dichas las mas konosidas es “Un findjan (tasa) de kafe es rekonosido durante 40 anyos…” La palavra es “un kafe tiene 40 anyos de hatir ” kere dizir ke kuando beves un kafe en una kaza tienes de akodrarte de la amistad i de la onor ke te izyeron durante 40 anyos ! (Todo tu vida !!!).
El kafe turko tiene su rolo kuando la famiya del mansevo se va a demandar la mano de una mansevika para sus ijo, i es la novya ke deve preparar el kafe i servirlo. Es kostumbre ke el kafe seya echo kon sal al lugar de asukar para ver si el novyo va azer una remarka i no va bever el kafe negro de savor ! Se sierve kon un plato de plata, una kupa de agua i el tradisyonal “lokum” un dulse del payis.
El kafe se prepara en un “djezve”…..El kovre es mijor. I si se koze en un brazero muy avagar ensima de las brazas mizmo mas mijor. Se obtiene mas spuma i es lo ke konta en un kafe bien echo. Siempre se topa en las kuzinas del Medyo Oriente ke seyan Judiyas, Kristianas o Muzulmanas.
Se trata de “keyf” (desfrutar) alora, se da importansa al djezve de kovre kon figuras, de emaye kon flores de kolor o simplamente de metal grizo brilyante !
El “djezve” i el “findjan”
El kafe Turko es muncho mas fuerte de los otros kafes. El “telve” es la “marka” del kafe ke no se derrityo i ke keda en el fondo de la tasa. Sierve a “meldar” el pasado i el destino de la persona, kuando se eskapa de bever el kafe se bolta la tasika fina ke se yele enteramente ! Es la kostumbre de aboltar la tasa ensima de su platiko porke kuaji todos “saven meldar” el futuro, el mazal, si ay un ojo malo ensima de la persona, si estan malavlando, si “ay un kamino de ir” o kazamiento en serka, reushitad a la eskola, en los echos…. No vos vash a kreyer ma ay dayinda munchas personas ke se van a las endevinas para “meldar” la marka del kafe o ke no kedan de demandar “saves mirar el kafe ?” Entre ojos i sejas te aboltan el findjan i va eksplikales ke no te entiendes del todo de esto i no kreyes en ansina de kozas ! Es parte de la vida, de la vijita a una amiga i de los uzos muy viejos de la rejyon.
Se dize ” ven a tomar un kafe ” kuando keres envitar una persona. Los inglezes te envitan al chay (te) mozotros al kafe…..Este “kafe turko” ke no puedimos topar en los merkados por anyos i anyos porke la importasyon era muy restriktiva ! No mas por seguro ! El kafe ke mos viyene del Brazil, de Kolumbya, de Yemen… Tiene la savor de estos payizses tropikales i tan leshos !
El kafe es echo de keyf ! Es para relaksar, arepozarse, diskutir, echar lashon kon amigos, pensar klaro, espertarse, “ver” la novya, eskapar un echo en la plasa, en las kazas de dolyo dospues de los funeralyos, asperar….Sin fin ! Se puede bivir sin esto ?
Ke tengash “keyf” siempre kon o sin kafe !
Artículos Relacionados: