“So Judyo i Israel es un Estado Judyo. Todo lo ke toka a Israel me toka i a mi. Los enemigos de Israel son mis enimigos tambien i no kero ser apartado de los muzisyanos judyos kuando reprezentan el estado Judyo mas aya de sus frontyeras.”
E. Kissin
KISSIN es un pianisto konsertisto de muzika klasika, Judyo-Ruso ke interpreta lo mas las ovras de los kompozitores komo Chopin, Schumann, Rachmaninoff, Listz, Beethoven, Brahms, Tchaikovsky, Bach, Grieg, Schubert, Mendelssohn etc..
No se de ande empesar a kontarvos un talento ekstraordinaryo ke Di-o otra vez regalo al puevlo judyo… Ande ? Komo lo mas de los kavzos en Rusya ! Nasyo de Emilia, una madre profesora de piano i de Igor Kissin, un ingenior, ke ya teniyan una ijika de 10 anyos, Alla, pianista tambien. Era el 10 de Oktubre 1971….
Ma este bebe no era komo los otros ! A 11 mezes kantava las notas ke se oyian del piano ke Alla jugava…. A los 2 anyos, kuando puido alkansar a las yaves del piano empeso a kitar de oreja las melodiyas ke oyiya… A sus 6 anyos emposa a ir a una eskola espesyalizada el Moscow Gnessin School of Music. Su profesora fue Anna Pavlovna. A 10 anyos dyo el concerto de piano de Mozart K.466 i su primero resital en Moskova a 11 anyos. Fue rekonosido un genio kon su interpretasyon del Concerto de Chopin No. 1 i 2 a sus 12 anyos en la Grande Sala del konservatorio de Moskova kon la orkestra filarmonika de Moskova. Sus diskos aparesyeron…
En 1985 empeso a dar konsertos en Europa i en 1986 era aklamado en Japan kon grande entuzyazmo. Dospues fue lokamente aplodisado en Londres, Berlin, New York, Vienna. Su fama koryo en el mundo entero. Los mas grandes chefes de orkestra estavan dirijando sus konsertos. Los premyos los mas distinguidos le fueron prezentados en munchos payizes. Rusya lo gratifyo kon la Madalya del Triumfo, el mas prestijyozo del payis. Siguio el Doktorat honorifiko de la Skola de Muzik de Manhattan, la madalya de la Akademia de Muzika de Londres i el Premio de Muzika de Herbet von Karajan. I no puedo enumerarlos todos ay muy munchos ! Grand prix… Grammy…
Se puede entender ken es Evgeny Kissin en oyendolo jugar las ovras romantikas i la Toccata ke el mizmo kompozo i ke kreyo ke dingunos pueden jugar kon esta performansa sinyada Kissin. Una ovra muy poderoza jugada por manos muy poderozas….
Fue interviewado en Israel de lakuala resivyo la sivdadanya dospues de sus konsiertos en Yerushalayim i Tel-Aviv. Avla munchas linguas i un Yiddish impekavle… Es poeto tambien i melda las poeziyas de los grandes poetos judyos al grande entuzyazmo del publiko ke lo adora….
Es un hombre alto kon sus miradas innosentes, bien batido i una ermoza kara. Lo ke lo karakteriska es su enorma masa de kaveyos frizados ke nunka son kurtos. Era soltero fina sus 46 anyos ma namorado de su amiga de chikes Karina Arzumanova kon raises Armenis, se kazo el 10 de Marso 2017 en Prague porke eya es Czeka.
Dize ke la muzika es el mas grande misteryo del mundo i es el mas abstrakto i el mas spesifiko tambien de todos los artes. Entra direktamente al korason de las personas…
Un grande virtuozo por sierto i a mi entender el mijor del mundo ke por sierto merese toda su fama i la rekonosensya de los amantes de la muzika klasika i espesyalmente de Chopin… Ay diyas ke no me enfasyo de oyerlo horas i horas…
Artículos Relacionados: