Diario Judío México - TE PROMETO KE….. SI…..

Ehud estava tornando en kuatro para topar ande parkar su auto !  Era un dia de Viernes en Tel-Aviv i todos estavan tratando de terminar sus echos, lo ke teniyan de merkar para el Shabat, flores, unos serravan sus botikas i se metiyan en kamino, los vendedores gritavan a ken mas i mas para vazyar las kashas ke les kedavan de vedruras i de frutas, vistimyenta barata, alikas i tumbanikas para las kreaturas, telefones selular de segunda mano… Un kaos de trayer dolor de kavesa a la persona la  mas kalma !

De ande le aviya vinido al tino de enkontrar el amigo kon ken aziya negosyos un Viernes antes las serraduras para el Shabat !  I en Tel Aviv, en un kafe de Dizengoff, la avenida la mas popular de la grande sivdad… Deviya de asperarlo mirando a la hora i demandandose porke tadrava ansina ! A Ehud le pasava mil pensadas por la kavesa !  I se enfasyava i se alevantava ?  I si se inyervava i sus enkontro se pasava mal ?

Empeso a rogar a Di-o… ”  Oh Padre Piadozo !  Me topo en malas horas…. Ayudame a topar un lugar ande parkar este karo miyo…  Esto perdido si no lo konvenso a Shmulik de merkar estos produktos ke se estan importando a medyo presyo…. Si me topas un lugar te prometo ke vo observar de agora en delantre el Shabat, todas las Fiestas i ire a la sinagoga kon todos ! ”

Justo a este momento se vazya por mirakulo un lugar de parkar i oyemos Ehud dizir  :   “OK OK  !   No tyenes mas menester de toparme un lugar… Todo lo ke te dishe no es mas aktual, olvidatelo !”

ESTAMOS OKUPADOS EL I YO… NO LO MOLESTES !

Estamos en los Muros de Lamentasyon en Jerusalem…. Ay muy muncha gente todos muy seryozos kon sus vistidos de Shabat, talit i kipa, sus livro  de orasyon  avyerto  i rogando de todo sus korason…

Mos aserkamos de uno  bastante mansevo, sus dos manos ensima de la impresyonante pared i rogando al Di-o para ke le embiyo unos  10 Milyones para salvarlo de una situasyon muy negra… Entero en yoros i kuaji implorando el Elohim de vinir para ayudarlo….

Allado de el un povretiko de unos sesenta anyos de edad, relijyozo asigun sus vistidos viejos, avriendo sus brasos a los Sielos roga al Di-o para unos 50 Sheqels, lo ke lo ayudariya a merkar komida para su mujer i sus 6 ijos el Shabat.

El mansevo de allado oye sus orasyones.  Se le  alevanta los pelos de su kavesa…. Se meneya a la siedra, se meneya a la derecha i kita de su aldikera un bilyeto de  100 Sheqels  ” Va, va tiyo !  Toma esta moneda es el dopyo de lo ke keriyas !  No me Lo distrayes al Elohim.   Esta okupado agor kon mi i tiene muncho echo importante…. No es hora de molestarlo por  50  Sheqels ! ”

DAR SANGRE

Un Judyo da siempre su sangre al ken lo tiene menester.  El tiene bastante i de esta manera ayuda el ke lo nesesita..

Un diya uno de los Emirates Arabes, un Sheikh muy riko, nesesita sangre para sobrebivir a una operasyon muy komplikada, es sangre rara i la tiene Abraham, el ke da su sangre kuando es nesesaryo.  Lo konvokan i la transfuzyon es reushida.  Le dizen al Sheikh komo toparon su sangre rara i dos diyas dospues el Sheikh embiya a Abraham una Ferrari mueva entera briyando…

Dos anyos dospues el Sheikh kaye hazino otra vez i nesesitan la sangre de Abraham de muevo.  Abraham korre al hospital i da su sangre kon sorizas i se mete a asperar su regalo.   Le viene dos diyas dospues un Twingo !  Abraham se dize mijor de nada i rende grasyas al Sielo por su suerte….

La treseera vez ke el Sheikh nesesita su sangre reingrasya Abraham kon una bisikleta !   Abraham se va a ver su Rabbi i le eksplika todo lo ke afito.  La repuesta del Rabbi es  :

“Kerido, te olvidates ke es tu sangre ke korye en sus venas agora ?”

——————————-

ARABO O JUDYO  ?

En una famiya el padre es Muzulmano i la maddre es  Judiya.   Tienen un iijiko ke les demanda una tadre   ”  So Arabo o Judyo ?”   El padre le reponde “Por seguro ke sos Arabo.  Yo so tu padre i nasites de mi !”   La madre le dize  : “Deshalo avlar !   Sos Judyo puro…  Te engrandesites en mi kon mi sangre,  Salites de mi al mundo”   Marido i mujer empesan a peleyarsen.  El chiko les dize  “No tenesh de peleyarvos.  Kije saver la repuesta para desidir si deviya negosyar para la bisikleta ke desharon abasho o deviya arovarla…”

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorLe ministre iranien des Affaires étrangères Javad Zarif : Nous sommes responsables de la sécurité dans le golfe Persique
Artículo siguienteEntender al crimen
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.