BOKER TOV-GUNAYDIN-BONJOUR – GOOD MORNING
El 11 de Febr. 2020…… fina medya noche …
Diya de Martes triste ke kale alegrarse !… Israel enterro sus muertos firyidos por manos maldichas. Los maldigo por lo ke izyeron !
Keridos Amigos i mis Amigitas
Un otro diya empesa oy… Fui mirando komo se aklaro el sielo, avlando a mi Amigo, reingrasyandolo por ver siempre la Luz dospues de la Oskuritad….El mos regalo el “olvido” ke sin esto no ivamos a pueder suportar las ansyas, las penas, las dolores el dezespero i la tristesa ke mos traye la vida no siempre ma por seguro d’en vezes en kuando !
Un Tsunami en el Pasifiko ke mata 300 000 personas….
Un terremoto en Turkiya ke mata 45 000 personas…
Todo esto en unos kuantos minutos…Epidemias ke
se yevaron miles i miles…Grandes fuegos ke englutyeron sivdades, erupsyones de volkanos ke efasaron rejyones enteras…. Hurikanos, innondasyones….Guerras…. Agora el terrorizmo !
No bivimos en un mundo seguro i no puedemos saver si kontinueramos a respirar otras kuantas horas. Es la realitad ma “miramos a otro lugar”, mos azemos “sodros” o preferamos no entender ! Porke no tenemos remedyo. Bivimos muestras vidas
de kada’l diya pensando en el subkonsiento “ira fina ande ira.. Kavos buenos ke tengamos! ”
Todos, SIN EKSEPSYON, pensamos de la mizma manera i ken dize el kontraryo se mente de si para si.
La trajediya ke afito en Fransia, en Espanya, En Inglaterra i en los Estados Unidos i en India mos toka mas ke las otras personas del mundo. Ansina es. Ermanos judyos… Mos duele. Mos duele mas la barbaridad ! Mos duele ma savemos ke todo se va enterrar en el olvido grasyas a El. Es la esperansa de la vida… Tenemos de no pensar mizmo a las kozas muncho mas odyozos ke afitaron al puevlo Judyo ! Oy endiya el malditto sinyo del antisemitizmo esta echo i pintado en las puertas de Gresya i Ukrania i ken save mas ande… Kon kuala konsiensya…. Kon ke motivo i kon kuala razon ???? Yo enkolgariya por los pies si aferrariyo estas suzyedades de personas ke se atreven DAYINDA a kometer delitos asemejantes…. Ma ay derechos humanos ! Si no les toka es ke no ay nada de azer ! Una apatiya, mizmo en Israel (!) ke kuaji invita las personas a pensar a abominasyones…. Di-o miyo !
Dayinda pensan a EKSTERMINAR JUDYOS ! Todos los Judyos! Porke nasyeron Judyos i nada mas.
El olvido i la esperansa ke komo el nasimyento i la muerte azen partido de la vida materyal. Mos keda a arrogar a el mas Alto i akseptar el sistemo ke kriyo, savyendo kon emuna (sin duvda dinguna) ke esto es lo mijor si ansina lo kijo por ke Su Ovra es Manyifisensya i no puede aver errores en lo ke izo !
Dunke es el OLVIDO, la ESPERANZA i la KONFIENSYA
ke mos enfuertese delantre de la muerte, nada mas ke un largo
esuenyo kon muestra alma liberada de su puerpo i en la “Luz de felisidad eterna.
SHAVUA TOV – SEMANADA BUENA A TODOS SIN HORAS PRETAS –
Kon el kuatren ermano : LA PASENSYA !
Artículos Relacionados: