MATAR EN VEZES SIGNIFIKA “SOBREBIVIR…”
Es un terrivle biervo “sobrebivir” i en munchos kavzos mos viene al tino ke kale ambezarse a “matar” si no ay otro remedyo para kedar en vida ! En un mundo tan krual i tan sin dinguna piadad, el ke no save “sobrebivir” en matando merese la muerte ! Malhorozamente son los biervos de una trololo ke le afito de karesar mizmo ormigas….
Esto tan desgustoza de ver tanta injustisya, tantos krimes, bivir el terrorizmo ke mizmo el biervo me da terror… Meldar i ver en la medya i de mis ojos ke muy leshos de arrepintirsen, ay miliones de gente ke tienen sed dayinda de sangre judiya.. Saven odyar al punto de kerer degoyar un puevlo entero !
Es muestra responsabilitad de bivir i protejar muestro puevlo. Es por esto ke el Kadosh baruh Hu mos dyo el instinkto de konservasyon. No para ke vayamos a ser kucheyados komo kodreros ! Salvar muestra vida i el de muestro puevlo deve ser muestra primera ovligasyon… Dezgrasyadamente, malgrado todo lo negro ke se eskrive de mozotros somos un puevlo demasyado pasifisto.
Enimigos, de la manera ke son en muestro deredor, de muncho tiempo antes no ivan mas egzistir si se tratava de un otro puevlo ke el muestro ! No veygo komo
se pueden observar los derechos humanos i la demokrasiya en esta situasyon ! Estos son kozas ke deven ser aplikadas por todos i no solo por unos kuantos puevlos porke, si no, afita lo ke ya afito, i es muy tadre de tornar atras ; los ke no observan los derechos humanos ENGLUTEN los ke los observan !
La ideya del holokosto i lo ke afito, siempre esta afitando durante toda la historia, kon razon, sin razon, es demasyado fuerte para ser akseptado. Komo se puede bivir kon esto ? Saver mismo ke egzistyo, egziste en el mundo ? Ke afito al puevlo Nazi ? Ke les manka dospues de todo lo ke izyeron ? I los otros ? I Sefarad ? Si esto es permetido i nada no afita, deke mos demandan kuentos de las kazualitades de la guerra ? Deke lo permetemos ? Komo damos el derrito de ser juzgados syendo justos i tenyendo razon ? Kon esta politika Israel no yego a la paz ! No yego a tener frontieras seguras… No yego mismo a ser akseptada en munchas kartas jeografikas ! Perye su dinyitad en las medias internasyonales ke la atakan, le avlan sin respekto, la menasan…
Ay de dar pasos para ke esto troke… Kale ambezarse i saver ser vayentes enfrente de la injustisya i de la violensya a todos los niveles. Lo devemos a muestra desendensya si keremos sobrebivir, a muestras frontieras si keremos egzistir en Israel, a los miles de mansevos ke dieron sus vidas para kombatir por muestro payis i enfin para los miliones de Judyos ke fueron assasinados, sin dinguna kulpa a parte de ser ermanos muestros…
Artículos Relacionados: