LOS ASSASINOS DE MUMBAI
Kuaji 11 anyos pasaron des del horror de Mumbai en India… Estos anyos no mos trusheron el olvido i no se puido amahar la dolor de las almas judiyas ke fueron terrivlamente torturadas i assasinadas, ….El barbarizmo de los terroristos i sus krueltad era sin presedente !
10 terroristos del Grupo Pakistanezo Lashkar-e-Taiba terrorizaron Mumbai durante tres diyas… Atakaron dos famozos hoteles el Oberoi i el Tadj Mahal Palace, el terminal de los trenos, el kafe Leopold i malorozamente la kaza Chabad. 160 personas peryeron sus vidas i uvyeron 360 firyidos…. Lo ke mos tuye lo mas fue el assasinato del Rabbi i de su mujer kon los 5 konvivos ke se topavan en la kaza Chabad.
Los terroristos entraron a India por la mar i teniyan bombas i armas pezgadas ke aviyan trushido. Atakaron en primero el terminal de los trenos deshando 56 muertos aya… En segundo yegaron a la kaza Chabad Lubavitch en la kaza Nariman ande el Rabbi i padre de famiya de 29 anyos, Gabriel Holtzberg kon su dulse mujerika Rivka prinyada de 5 mezes i de 28 anyos de edad aviyan aresivido sus 5 konvivos. Fue un mirakulo ke la kozinera ke lavorava ande los Holtzberg, Sandra Samuel, puido salvar el chikitiko Moshe Holtzberg de 2 anyos para yevarlo mas tadre ande sus nonos en Israel. En mizmo tiempo se estava atakando al kafe Leopold i el Tadj Mahal Palace. El Oberoi-Trident Hotel fue atakado en alkavo. Ajmal Kasab fue el solo terroristo ke fue apanyado bivo. Este , kon un otro amigo suyo aviyan siblado el hospital Cama….
Fue djuzgado en Mayo 2010 i enforkado en Pune en Novembre 2012
Sandra Samuel kedo en Israel, bive en Yerushalayim i vijita los parientes de Rivka en Afula para ver Moshiko ke tiene 11 anyos agora. Siempre fue a mirar si todo estava bien, tomar el chiko, kaminarlo i merkarle kozikas ke le plaze. En Enero el otro anyo Binyamin Natanyahu, Sandra i Moshiko se fueron a la India en Mumbai para rememorarse del 10 en aniversaryo de la muerte de los Holtzberg. Estos kedaran siempre en muestros korasones…
Artículos Relacionados: