La kualitad de los vinos produizidos en Israel es rekonosida oy internasyonalmente i no ay dudas ke promover i konsumar muestros vinos es una de las mijores maneras de suportar el Estado Judyo… Oy en diya Israel es uno de los eksportadores los mas bushkados por los produktos agrikoles i sus vinos. Las orijines del vino ande los Judyos van atras a 6000 anyos ma la industria del delisyozo likido i las experiensas para yegar a su dezeyada kualitad empesaron solo dospues de los 1970…. I se estan azyendo mas i mas bushkadas para perfeksyonar los produktos.
Meldamos en BERESHIT ke Noah fue el primero ke planto vinyas… I fue el primer ke se emboracho tambien ! Moshe Rabenu embiyo gente a las Tierras Prometidas i estos tornaron kon un rasimo de uvas ke se puido transportar atandolo por el ramo a un palo yevado por dos hombres ! El Talmud mensyona 60 tipos de vino ! El Rey David koleksyonava vinos i teniya mizmo un eksperto ke se okupava de su bodega. A los Judyos de akeya epoka les agradava muncho el vino ! En el Livro de Ishayahu se eksplika komo plantar vinyas i komo kudyarlas…. Se toparon presses i resipientes de akeya epoka para guadrar el vino en el Neguev, en el sur de Yerushalayim, en el Golan i en el monte Hermon. La epoka de oro del vino i el tiempo ke se eksportava a los otros payizes era durante el tiempo del Segundo Templo. A la konkista de los Arabos en los 600 de muestra era, el uzo del vino era defendido . Se arebivyo un kurto tiempo kon las Kruzadas ma lo mizmo afito kon la konkista de los Otomanos.
La primera plantasyon fue la del rabbi Yitzhak Shor en 1848. La famiya Shor es dasyinda duenya de los vinos Shor i tambien de los produktos Zion, la kontinuasyon de los Vinos Shor.
Rabbi Avrom Teperberg fundyo los vinos Teperberg en la vieja sivdad de Yerushalayim.
Kon esto la primera industrializasyon del vino empeso kon el Baron de Rotschild, el duenyo del famozo Chateau Lafite en Bordeaux (Fransa) ke izo azer bushkadas sovre los kampos de Israel i las plantasyones empesaron en 1890 en Rishon le Zion i en 1892 en Zichron Yaacov. La Kompanyia los Vinos de Carmel se fundyo en 1895.
I….. Savesh kualo ? 3 Primeros Ministros de Israel : David Ben Gurion, Levi Eshkol i Ehud Olmert lavoraron komo empyegados de los Vinos de Carmel ! Esto es ISRAEL !
Dospues, munchisimos kampos de vinyas fueron plantados lo mas kon el ayudo fiskal del Baron de Rotschild… Kon esto, los vinos fueron exportados en grandes kuantitades a Europa para ser vendidos para la aldikera de Rotschild…. Normal no ?
La mijor i la mas moderna ekspluatasyon de uvas se topa en el Golan des del 1983. Oy ay unos 300 kompanyias ke produizen vinos de diferentes savores. Unos mas dulses otros mas alkoolizados, unos mas kompleksos, una grande diversitad asigun las temperaturas, las luvyas, la tierra i la geografiya de los terenos.
EL VINO 2015 RECANATI SAUVIGNON BLANKO
Produkto de la Galliea 15 Dolares. No es uno de los mijores !
2014 GALIL VIOGNIER 20 Dolares muy maduro
kon aromas de miel, vanilya, ananas, mango ets…. Bastante asido. Uno de los mijores vinos i muy apresyado.
2014 Tulip Winery White Tulip. – Gallilea 24 Dolares. De la mizma kualitad del presedente. Muy aromatiko i un poko dulse. Aroma de flores i yerva freskamente kortada. Medyo asido. Una savor de flores de naranja i agua de roza. Akompanya maraviya verduras al orno i pishkado.
2014 FLAM Blanco… De los montes de la Judea. 30-40 Dolares. 60 % Chardonnay i 40 % Sauvignon blanko. Se konsuma kon produktos de mar.
2010 YATIR Petit Verdot. Negev. 55.- Dolares frutas del bosket. Savor de la pimienta preta… Klaro i muy savrozo. No se maduresyo dayinda…. Kale asperar otros 3 anyos. Vino de grande kualitad.
Kale gostar i los otros vinos de las varias regiones de Israel. Si estash vizitando Israel no mankar de ir a ver los Vinos DALTON i ADIR ansi ke sus Lecheriyas en frente del kamino. Adir vos va servir una maraviyoza meza de mijores kezos de kavra, ensaladas i panes. Konduizir otros 15 minutos para yegar al Kibbutz Yiron para vijitar los Vinos de la Gallilea. En kamino atras a kaza, se rekomenda de entrar al Duty Free Shop James Richardson en el Aeropuerto de Ben Gurion para eskojer los mijores vinos a buen presyo para yevarlos a kaza…
Ke pekado ke yo no bevo del todo alkool porke nasi borracha i el mijor vino del mundo me dara mareyos mizmo kon una kupika la mas chika ke egziste !
LEHAYIM !
Artículos Relacionados: