Voltaire

LA POLITIKA ES EL MEDYO DE DIRIGIR HOMBRES SIN MEMORIA DE LA PARTE DE HOMBRES SIN PRINCIPIOS !

VOLTAIRE

Egzisten dos tipos de ladrones :

a. El ladron ordinaryo : El ke rova dinero, djoyas, karos ets.
b. El ladron politiko : El ke vos rova vuestro futuro, vustros suenyos, vuestro salaryo, vuestra edukasyon, la salud, la fuersa i la soriza…

La grande diferensya entre estos dos tipos de ladrones es ke sosh eskojidos por el ladron ordinaryo alora ke el ladron politiko es elejido por vuestras proprias manos !

La otra grande diferensya, i muncho mas importante, es ke la polisiya i las fuersas de sekuritad se vengan de la alma del povre ladron ordinaryo ke munchas vezes rova porke esta ambyerto alora ke los otros, sharonfonfones, son bien protejidos i eskortados por las mizmas fuersas!

Todo esto kijyendo avlarvos de una persona ke no me gusta del todo !
Ohhhhh sin razon ! Empeso ansina des de los dias ke me iva a la eskola, puedeser porke las monhas, muestras profesoras, mos aviyan rekompensado (!) un diya kon un egzamen sovre este hombre de Letras i grande filozofo…. I yo, no preparada del todo, aviya resivido un 2 ke nunka me olvidi ! I, no basta kon esto, me izyeron vinir a la eskola el Shabat dospues de midi para estudyar Voltaire ! Me lo ambezi ma odyi el tipo !

Nsyo en Paris en 1694. VOLTAIRE es un nombre ke se dyo muncho mas tadre. Su verdadero nombre era Francois Marie Arouet. Lo ke mos riyiamos de este nombre! Aviya deklarado ke en su eskola le aviyan ambezado nada mas ke el Latino i “tonteriyas” ! Kontribuo muncho a la Revolusyon de Fransa i a la epoka del saverisyo i illuminasyon. Gano su fama por sus ovras defendyendo la libertad de ekspresyon i eskojer la relijyon, kreyer o no en Di-o. Es rekonosido por sus ovras satirikas, kritikando Eglisyas, kostumbres relijyozas, Autoritades, Sosyetad, politika ets…

Voltaire eskojo de ser Hombre de Lettras malgrado ke su padre izo todo su posivle para ke seya un Hombre de Leyes. Tuvyeron munchos argumentos ma el supo ganar el korason de la aristokrasiya kon su lingua puntuda ! Fue metido en la karsel porke aviya kritikado el heredero al trono Philip II, el Duko de Orleans, i el ermano del Rey Louis XV. Es en karsel ke tomo el nombrre de Voltaire i eskrivyo su “Oedipe”.

A Voltaire no le vino meoyo ! Kontinuo a burlarse de las personas mas sharanfonfon i esta vez lo egzilaron a Inglaterra. Aya se maduresyo i se puede dizir ke se izo un verdadero filozofo. Fue influensado por Shakespeare, eskrivyo las Letras Filozofikas Inglezas en Paris ande torno dospues de 3 anyos de egzilio.

Lo ke eskriviya dezrepozava la klasa elita. Fue ovligado de retirarse al Chateau Cirey, en la frontiera. Se namoro de la Marquesa del Châtelet, Gabrielle Émilie le Tonnelier de Breteuil, i sus vida enjuntos duro 15 anyos fina la muerte de Gabrielle. Endjuntos arrekojeron 21.000 volumes para sus biblioteka. Kale sinyalar ke la Markesa era una grande erudita tambien…

Fue el grande amigo de Isaac Newton i lavoraron endjuntos. Paso un tiempe kon el rey Friedrich ma supo ofensarlo i a el ! Voltaire torno a Paris ma el Rey de Fransa no lo desha entrar en la sivdad. Alora se fue a Geneva, ma era defendido de eskrivir piesas de teatro en este payis. Eskrivyo su ovra la mas famoza CANDIDE O EL OPTIMIZMO. Mas tadre el Diksyonaryo de la Filozofiya no manko famozo.

Dospues de abandonar Geneva se installo en Ferney i bivyo ayi fina su muerte en 1778, a sus 84 anyos.

Voltaire emposo a su karyera de eskrivano kon poeziyas largas i kurtas ma plazyeron mas al publiko las kurtas. Eskrivyo livros de historya, i muncha proza. Uno de los eskrivanos en el mundo ke dyo lo mas de ovras eskritas. Tiene unos 20.000 letras a parte de sus livros.

Eskrivyo el “ANTI-MACHIAVEL” komo repuesta al “PRINCE” de N. Machivelli, eskrito por el rey Friedrich II de Prusya.

Diyas klaros para todos
[email protected]