Yosifachi Toledo era más konosido komo Yosifachi el Kumardjí. En los anyos 1920, el padre djunto a los ermanos, se echaron a la mar desde Rodas para morar en la Argentina, tiempos de venir a la Amerika.
Lo ke tuvo sintido de djente del kuartier era ke en Rodas algunos ombres eran konosidos komo kumardjís, por djugar muncho, ama no para embelekarse, sino por parás. En este ambiente se engrandesió Yosifachi. De mansevo en la eskola, kombidava a los kompanyeros a djugar por las tadres a las kartas en kaza.
No era bien visto en la eskola, mezmo los maestros no estaban de akordo ke los djovenes djugen, en vez de pasar el tiempo estudiando o en mijores butos.
En la kaza avía un grande moble yeno de djugos de kartas, algunas gastadas, otras muevas i mijores. Las merkava en un afamado magazén ke vendía kozas importadas de la Evropa. Algunos dizían ke Yosifachi en el djugo era diez dedos, diez marafetes, seguramente por estar al lado de afamados kumardjís, djugando al tavli, kartas, dominó i más.
De mansevo, avrió un magazén de chapeos para mujeres en el sentro de la sivdá. Una tadre entró una mujer de kaveyos kolorados, ojos vedres, luzia, de buen puerpo i bien atakanada. Merkando los chapeos, Yosifachi se embelezó i kedó tresalido de verla; le pidió el numero de telefón, deshó pasar unos días i la kombidó a tomar kafé en la meaná de Buchuk. Se enamoraron pedridamente a lo ke merkó una kaza y se kazaron ama no pasó muncho tiempo para ampesar kon los problemes.
Ayegando a los días de Pesah, la madre de Alegra la vizitó, se asentaron a tomar kafé kon dulse de narandja, mientres le dizía ke los asperava la primera noche de Pesah. Komo buena madre sintió ke algo le akontesia, supo del modo de demandarle. Alegra avrió su korasón i disho lo ke akontesia, no se sentía sigura i más agora ke el mediko le disho ke estava prenyada de tres mezes… La madre le dio konsejos i fuersas para los tiempos de vinir. Komo kaji todas las mujeres, devió asperar para darle la notisia al marido. Ma este día no podía, Yosifachi kon dos amigos kumardjís fueron a la Mar del Plata a djugar al kazino. Estó avlando de tiempos ke no los avía en la sivdá. En el enverano la djente ke dolasheavan ayí era siguro ke por lo menos una vez ivan, no solo para djugar, también para ver i en munchos kavzos ser testigos, del modo ke ganavan i pedrían.
Kuando Yosifachi aboltó a kaza, Alegra vido la kara demudada ke seguramente era por piedrer lo ke yevó i afilú ganó. Kuando se asentaron a komer, le tomó la mano i mirándolo a los ojos, le dio el haber ke aresivió kon grande alegria. Solo asperava ke deshe un pokitiko el diugo i partajar más oras djuntos, buto ke ampesó a pasar… Nasió un ijo, ilo ke tanto ansiava akontesió, solo iva a djugar una vez a la semana.
Esta alegria no fue por muncho tiempo. A los pocos mezes vino el djugador Yako Treves a bushkarlo. Es de imajinar ke las parás se ivan en esto, el magazén lo serrava antes de la ora, entravan a merkar i demandavan por chapeos kon plumas de abistru ke estavan a la moda. Ansina ke en poko tiempo derrokó el magazén ke tuvo de serrar. Alegra, kon el ijo chikitiko de dos anyos, desidió despartirse de Yosifachi. Las angusias eran munchas i estava firme en sus penserios… Ir a morar kon sus parientes, lavorar i darle al ijo una vida buena.
El djugo ni traye nada bueno, solo inyervos, angusias i más. Eya tenía djoyas de oro, algunas kon briyantes, kolyes, orejales, manyas, aniyos, ora i liras sterlinas. La idea era de vender estas i asentarse ande bivir para lavorar. Bushkó la kasha ande guadrava, tomó la llave i kuando avrió, kualo vido! La kasha estava vazía, ni una djoya avía. Adió Santo, Patrón del Mundo, kualo izo Yosifachi? No kedó dudas ke vendió las djoias para djugar, ansina komo el pedrió todo. Agora Alegra kedó sin sus djoyas. Ama para eya era más importante ser libre, ver engrandeser a su ijo, i estar leshos de este guerko kumardjí, ke lo úniko ke izo i aze es piedrer, mezmo a su ijo i mujer.
Lo triste ke kon los penserios en el djugo, no vido más a su ijo i lo más peor, ke nunka demandó por él. Pasaron dos anyos, i en el avenir (futuro) de Alegra, konosió a un buen ombre bivo kon un ijo, se kazaron i fueron a morar a Rio de Janeiro – Brazil. Era mediko de chikitikos i tenían un buen pasar. La vida les dio dos ijos i lo importante, fue feliz komo meresia, leshos de Buenos Aires i de Yosifachi el kumardjí.
Artículos Relacionados: