“Antolojía De Kuentos Sefaradíes” De Pascual Pascual Recuero – Kapítolo Ii – Kuentos De Magriso: 48. El Segador I El Kulevro Trasliteración De Liliana Benveniste

48. EL SEGADOR I EL KULEVRO

Un segador estava segando trigo en el kampo i por la kalor, ke era muncha, arankó una yerva i se metió en la kavesa para arefreskarse; i le vino un kulevro muy fuerte, se alevantó i lo mató al kulevro.

Pasó por ayi un perkantador de kulevros, vido, el kulevro matado i disho:

– ¿Ken es ke mató a este kulevro?

Le disho el segador:

– Yo lo maté.

Le vido al segador ke tenia una yerva en la kavesa, ke se le avia metido por el kalor; le disho a el segador:

– Kitate esta yerva ke yevas de la kavesa, i despues alávate.

Se kito el segador la yerva de la kavesa, i se aserkó alado del kulevro muerto: i no yegó a tokar el kulevro, asta ke le salieron todos sus miembros del segador pedasos pedasos, del tosigo del kulevro.

Notamos de este kuento ke akeya yerva, ke no paresia nada, era melezina para el tosigo del kulevro ke no aga danyo.

—————————————–

Atado kon el kuento anterior, kon el mizmo buto, manadero i ensenyansa )folio 100 a). Ay de kudiar bien de ken viene un konsejo.

—————————————–

Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo II: Kuentos de Magriso.