El prezente

En desembre salyo a luz (por el Sentro Ladino al nombre de Moshe Gaon), el jurnal de estudios sefaradis yamado “El Prezente”.

En realidad, “El Prezente” no es jurnal sino una antolojia anual de algunos 300 pajinas, kon artikolos eskritos por investigadores de varyas universidades del mundo.

Esta vez, los artikolos todos, fueron al derredor del sujeto “Ekos de Shabetay Sevi”, Shabetay Sevi, i su movimiento provoko muchos trokamientos radikales en el mundo djudio en jeneral, i entre los sefaradim en partikolar.

Despues de mas de 360 anyos de kuando Shabetay Sevi aparesio en la shena de laestoria de muestro puevlo, i se deklaro Mashiah, la memoria traumatika de su fiasko, ayinda marka efektos sovre la literatura judia, en la relijion tambien, i afilu en la ideolojia politika.

Los artikolos en “El Prezente” avlan sovre muchos aspektos de estos kambios, i me dan la impresion ke dayinda ay mas i mas a diskutir i revelar sovre la personalidad enigmatika de tal “Mashiah”.

Ay en El Prezente artikolos en ebreo, ingles, espanyol i afilu en serbo (trezladado el ingles).

Esperava ver algun artikolo en judeo espanyol, o a lo menos una traduksion de algun artikolo a muestra lingua….

Yehuda Hatsvi
Erets Yisrael

Fuente: Ladinokomunita