Diario Judío México
Estamos kuaji a la mitad del mez de Desembre i ya eskaparon los dos mezizikos, Septembre i Oktubre, kuando kayen los pinyones de los pinos de esta vanda Aziatika de Istanbul…. Agora los partimos kon piedras de marmol i los komemos o los mundamos i los echamos a las komidas. Son la fruta de los Sultanes i aziyan por akeyos monarkos komidas i savores de boka ke se gizan dayinda oy en las kozinas alavadas… La komida la mas konosida kon el pinyon es el aroz por seguro i la savor de boka es el “zerde” kon el safran, las uvas sekas i el pinyon ke se syerve en las bodas i en las fiestas.
Ya paso el enverano i la kayntor ensima de los pinos ke no puediyan estirarsen un poko debasho del ayre i soriyir a las gottas de luvya ke van karesando i azer briyar sus finas ojas komo algujas emetyendo sus perfumo alavado…
Kada anyo Bilge (ke tomi de 14 anyos por ser mi ijika des de 2012) i yo salimos tresalidas para arekojer pinyones. Es muestra fiesta i un grande divertimiento ! Ken mas i mas los va topar debasho de estas algujas del pino ke trokan a la kolor de le tierra kuando mueren ? Forman un tapet ke emete sonidos alegres kuando se piza ensima ! Los pinyones aryento de sus kazikas duras i kuvyertas de un polvo preto kayen del kono maduro del pino. A vezes topamos el kono, avyerto, ke mos ofrese sus frutos savrozos. Bolamos de plazer…
Mozotros uzamos los pinyones para el gomo de las “dolmas” de peperushkas, domat, la oja de vinya ke se inchen de aroz, sevoya, uva seka, pinyones, prishil, menta, pimyenta, limon, sal i asukar.
Gizar dolmas es la mas grande maestriya de la mujer de kaza ! Ansina diziyan muestras aguelas…. Yo no so tan modesta i no vo tener verguensa de dizir ke son “mis dolmas” ke me plazen lo mas…. La yave es no solo en inchirlas por seguro ma saver el ekilibro de la kuantidat de limon i de la asukar, de la sevoya i del pinyon, de la sal i de la pimyenta, kon el tiempo egzakto de kochura…. 
Ayyyayayyy ande me fuyi yo kon este eskrito !
A mi grande alegriya moro en un lugar ande ay muy munchos arvoles de pinyones. La vedra es ke munchos de muestros vizinos salen a arrekojer pinyones i mas muncho de tomar plazer de esto lo azen para uzarlos en sus kozinas porke en el merkado kostan muy karo.
Mozotras vinimos a kaza kon muestro presyozo pezgo, mos asentamos a romperlos i komerlos en el balkoniko. A tal punto ke kuando tengo de gizar dolmas o siertas dulsuryas, me vo ovligada de afishugar mi ijika para ke vayga i mos merke pinyones… Nunka puedriyan kedar djarrikos de pinyones en el almaryo ande mozotros. “Gritan” fuerte i mozotros presto koryemos al mupak para “kalmarlos” ! Ahhhhh mi ijika luzya i su mamita kon tres gramos de meoyo ! Kuryozas somos las dos… Bilge i yo mos aflakimos de 12 kg.kada una… Una diyeta kon muncha voluntad ke, rogo el Di-o, va rezultar komo lo dezeyamos tanto ! Esta vez lo vamos a lograr kon el ayudo de mi Amigo en los Sielos… Amen ! – i no kon los pinyones ! –
No vo rezistir a la tentasyon de eskrivir, otra vez, kon ke prestor pasa el tiempo…. Los biervos de Viktor Hugo ke disho “los mansevos tienen flamas en sus miradas ma los aedados tienen luz” no me aze ni friyo ni kalor! Konosko mis anyos i se ke no vo pueder realizar todos mis planos i lo ke kijyera azer en mi vida. Ma no por esto esto desganada o tengo espanto….
Un poko triste solamente….. No suporto, por egzemplo, la ida de mis keridos ke no estan mas komo Robertiko Cohen de SM por egzemplo… Otros munchos munchos tambien sin avlar de Etika, mi prima ermana i mi perriko Jimmy en 1991, mis paryentes, amigos de mis paryentes a loskualos konsideravamos komo la familya, sus ijos/ijas kon loskualos mos engrandesimos endjuntos…. Mi nini Fatma… Mi granmamita Claire i Esther de la parte de mi padre… Unas amigitas keridas.. Otros ke nunka olvidi…
Kashones yennos de mis memoryas. Mis manos no yegan a kemarlas, portanto son kozas personales i no interesaran dingunos. Un diya kale ke tenga koraje i ezvacharme de guadrar fina la primera roza ke me regalaron….
Oy siento de vez en kuando ke esto kansada. Me se izo echo de tomar una douche ! Me vo durmyendo en mirando la TV! A vezes en eskrivyendovos. No tengo ganas de salir afuera i adoro el repozo de mis kantonikos, komo mis gatikos…. Bilge mos topa durmyendo los kuatro en la mizma kamareta !
De mas en mas es eya ke se karga de azermos komida, el lavado, enshaguar los platos… Trayerme agua i mis pillulikas ! Me desho mimar por mi presyada…. No se si lo nesesito o me plaze !!!
Mi trezoro !
La sola koza ke se, es ke esto arta… No tengo dingun regreto… Esto felis… Logri kuaji todo lo ke kije i no me manka nada…. Diya diya alavo el Di-o por darme esta alma kontente de todo, yenna de amor i de entuzyazmo, por amar la vida i toda Su Kreasyon…. Allelluia !
[email protected]
Artículos Relacionados: