Al salir de la puerta grande de la kaza de la ermana de mi nona esto vyendo ke ay dos otombiles stasyonadoz. Me demandi kual sera ke vamoz a tomar para salir en kamino.
Pishin vino Yusuf mi primo, mos avriyo la puerta de atras del otmobil de kolor maron oskuro. Yako i yo mos asentimos en laz siyas de kuero, las mas ermozas ke tengo visto.
Papu YAKO le ayudo a meter las valizas i se asento en la siya de delantre kon Yusef.
orient_expressKuando el oto enpeso a kaminar miri atras de la ventana i vide ke la tanti BEKI esta echando atras de mozotros un kuvo de agua igual ke izo la tanti FURTUNI EN CHANAKKALE.
Para ke tengamos el kamino de myel…
YUSEF abolto la kara i me pregunto si mos agrado el otomobil ke era del tiyo HAYIM. Estos otomobiles son PONTIAC mos disho.
Los kaminos son todos muevos pretos kon una golor ke dospues me iva ambezar kualo es.
Ya ay una ora ke estamos andando kon las ventanas avyertas. Esto golyendo la mar i pensi ke estamos serka de eya.
Ah Dió santo! Ke es esto ke esta pasando allado de mozotros en su kamino!!… Papu YAKO pishin mos miro i mos ekspliko “esto ke vesh se yama SHIMENDIFER. Yeva i traye a multitud de djente de una sivdad a la otra”. Yusef sigyo eksplikando ke ultimamennte este veiykulo se esta yamando TRENO.
… I KE ESTE TRENO ES EL FAMOSO ORIYENT EKSPRESS KE SU VIYAJE EMPEZA EN EL KORASON DE LA EUROPA I TERMINA EN LA FAMOZA ESTASYON DE TRENOS KE SE YAMA SIRKECI EN ESTANBOL…
Me vino al tino la kantika muestra:
Los kaminos de Sirkeci son yennos de arena
Para pasar i retornar i verte a ti morena
Morena tu, moreniko yo ven mos frekuentaremos,
Si no te plaze frekuentar ven mos espozaremos.
Lo uniko ke no me agrado de este shimendifer fue ke kuando echaron kimur salyo un umo tan preto ke kaji no vimos el kamino ke estamos andando.
Yusef mos disho ke en medya ora ivamos a parar en un kazal al lado de la mar para arrefreskarmoz i komer pishkado en izgara.. (grill)
AHHHHHH KE KONTENTES SENYOR DEL MUNDO KE TENGO!
EL TIYO HAYIM I LA TANTI BEKI ME REGALARON UNA ORA DE SEB (aldikera) PARA KE ME AKODRE DE EYOZ.
Artículos Relacionados: