Penso i me demando komo fue ke las personas fraguaron o izyeron fraguar tantas fuentes grandiozas, gloryozas i tan ermozas en los mas importantes lugares de las grandes sivdades del mundo ?.. Fuentes de grande valor architektural, kon tanta estetika i buen gusto, echos por los mas grande skulpturos del tiempo, de marmol o de bronza para sobrebivir a los siglos sin peryer nada de sus belleza…
San Petersburg – El Palasyo i la fuente Triton en Peterhof
No se deke, kuando ago un largo viaje a mi pasado i a los lugares ande me fui, la primera koza ke me viene al tino son las fuentes, las aguas ke koryen i forman una pisina klara ande me imajino ke me arefresko en las noches kayintes del enverano. Me imajino debasho de los chorros, lo mas, aklarados i koloriados kon los juegos de luz, akompanyados de melodiyas ke me yevan a los jardines majikos de mis suenyos.
Dubai
Los duenyos de estas sivdades por seguro ke saviyan la valor ke las fuentes ivan regalar al entorno, la freskor ke estos ivan a dar i la fiesta por los ojos i la alma de kontemplar tanta ermozura….
Yo so namorada de la agua…. Es santa ! Es la vida, la limpyeza, la savor de bivir en nadando en las plajas, un vazo de agua klara i las dolores se van si estos provienen de kedar munchas horas sin bever…! Es kon la agua ke se engrandesen los arvoles, los boskes, las frutas i las verduras ke komemos… De vedra ke sin agua la vida no puedeser.. I komo mozotros, los animales tambien no pueden bivir…
Dunke la sekura es una dezgrasya ke malhorozamente okurre a vezes i puede derrokar la vida de la fauna i de la flora sin kontar el danyo ke aze a los humanos… En siertos kavzos se ven en la ovligasyon de emigrar i deshar sus tierras.
Artículos Relacionados: