La fiesta de Shavuot, ke es una de los tres Moadim, es la unika ke no tiene “medianos” (Hol aMoed), i toda la algeria esta konsentrada en un dia (en Erets Yisrael), o dos (en la diaspora).
Shavuot es la fiesta de la segada del trigo, i de las primisias ke se yevavan i seprezentavan al Bet aMikdash. Tambien, segun muestra tradision, es el dia en el kual “Abasho el Dio en Sinay, i milaryas de Mallahim kon El, a dar la Ley a su puevlo, kaza de Yisrael”.
La Tora mos konta ke Moshe Rabenu suvyo al monte, i kedo ayi por 40 dias. Muestros hahamim, divertiendosen kon la gimatria, topan ke esta mos da un senyal mas por kuala es la razon ke uzamos, espesialmente en Shavuot, komidas echas kon leche (sutlach, djadjik, pastelikos, borekas, etc.).
“Leche”, ke en ebreo se yama “halav”, tiene “valor” aritmetiko de 40, djustamente igual a los kuarenta dias de la estansia de Moshe en sima del monte.
Het = 8, Lamed = 30, Bet = 2 (total: 40).
De la otra parte, en la meza tradisional del Shabat, tenemos (i tengan siempre todos ijos de Yisrael !) vino, peshkado, karne i hala (ke es un tipo de frandjola, pan blanko). Ke maraviya, todas estas komidas tyenen valor numerika de 7.
Syete! halis komo por onorar al seten dia, el dia de Shabat.
Hala = Het, Lamed, He = 8+30+5 = 43. (4+3 = 7)
Vino (“yayin” en ebreo) = Yod, Yod, Nun = 10+10+50 = 70. (7+0=7)
Peshe/peshkado (“dag”, en ebreo) = Dalet, Gimel = 4+3 = 7
Karne (“basar” en ebreo) = Bet, Sin, Resh = 2+300+200 = 502. (5+0+2=7).
Moadim leSimha i Shabat Shalom !
Yehuda Hatsvi
Tel Aviv
Fuente: LadinoKomunita
Artículos Relacionados: