En el Daily Telegraph del 30 de agosto avia la istoria de “Gene Wilder”, un komediano bien konosido. Este ombre viene de murir a la edad de 83 anyos. Era uno ke azia reír a todos, ma del otro lado se veía una tristeza en sus ojos azul. Kisas porke preferava dar un aspekto profundo a sus karakteres emosionales, sean neurótikos o bizarre. En realidad la tristeza venia de su vida personal.La hazinura de su madre le dava un sentimiento de kulpabilidad kuando era mas mansevo. Ensima de esto tuvo unos kuantos divorsios i la muerte de una de sus mujeres, “Gilda Radner”, ke lo toko mucho en 1989. Estava muy desesperado.Mismo en su tristeza las mujeres le darán koraje.
Saludes a todos
——————————————————————————-
LA VIDA DEL KOMEDIANO “GENE WILDER”
Gene Wilder nasido “Jerome Silberman” en Milwaukee/Wisconsin el 11 Julio 1933, tenia un padre ke se yamava “William” i ke era un imigrante viniendo de la Rusia. Tenia un kommersio de ridomas de bira i de chokolates. Su madre “Jeanne” tuvo un attako de korasón kuando el tenia 8 anyos. El mediko le disho ke tenia ke evitar de entrar en argumentos kon eya porke esto puedia matarla. Asi fue ke el penso de azer el kontrario i azer reír a la djente, Imitava los aksentos diferentes i kantava komo “Danny Kaye” justo komo el mediko le avía demandado.En la eskola azia reír a todos kon sus performansias. Kon todo esto era un mansevo popular.
Se desidió ke keria ser artisto kuando tenia 15 anios.Tuvo su primer rolo en el Teatro de Milwaukee Players. Kuando tenia 16 anyos su ermana “Corinne” le topo lugar en el Teatro dirijido por el Aktor Australiano “Reginald Goode” i entro sin pagar. Termino sus estudios de liseo en 1951 i estudio en la Universidad de Iowa. Despues se fue al “Old Vic Theatre School” en Bristol/Inglaterra antes de tornarse atrás en 1955 kon la idea de estudiar en “HB Studio” en New York. Sus estudios fueron interrumpidos por 2 anyos kuando lo yamaron a servir en la Armada. Despues se torno atrás resiviendo rolos profesionales.A este punto troko su nombre a “Gene Wilder”.
En 1960 se kaso kon una estudiante Inglesa “Mary Mercier”. Komo los 2 estavan siempre en kamino el kasamiento se rompió. Se divorsiaron en 1965. Yegando a este tiempo se avía enkontrado kon una ke iva kambiar su vida. Performando en el filmo “Mother Courage And Her Children”. En 1963 se enkontró kon “Anne Bancroft” ke lo introdusio a “Mel Brooks”. El pensó ke era perfekto por el rolo de su filmo. Wilder no oyo nada de esto por 3 anyos i en 1967 lo metio en el filmo “The Producers” jugando en el rolo de un kontable neurótiko “Leo Bloom”.
En 1968 gano el Oscar i estava avansando en su karriera, kuando un día enkontró a una amiga de su ermana “Mary Joan Schultz” ke tenia una ija de un otro kasamiento. Se yamava “Katherine”. Ansi se kaso kon Mary Joan en 1967 i adopto a su ija. Despues de 7 anyos se separaron porke eya supsonava ke tenia un amor kon la “ko-Star Madeline Kahn”. Jugando en el filmo “Young Frankenstein”.
En realidad el korría detrás “Teri Garr” después del divorsio en 1974. En 1981 se enkontro con “Gilda Radner” jugando en el filmo “Hanky Panky”. Eran inseparables, ma eya estava kasada kon el Gitarristo “G.E.Smith”. Era un kasamiento ke no kaminava bueno. Asi se divorso en 1982 i se kaso con Gene Wilder en 1984. Kijeron tener kriaturas i no pudieron.
En 1985 tornando el filmo “Haunted Honeymoon” Radner se sentio kansada. Tenia dolor en las piernas i salio ke era un kanser en los ovarios. Se murió en 1989.Antes de morir eya lo enkorajo a azer filmos. Jugo en “See No Evil, Hear No Evil”. En este filmo se enkontro con “Karen Boyer” i se izieron amigos buenos. A la muerte de Radner se kaso con Boyer en 1991 i fueron amorosos asta su muerte. Nunca tuvo ijos i perdió kontakto kon la ija adoptada. Su sovrino “Jordan Walker Perlman” era komo su ijo.
Tradusido por Simon Geron
Sydney
Fuente: Ladinokomunita / telegraph.co.uk
Fue un gran actor sin duda, pero su vida personal muy viseral , acelerada y muy triste . Siento mucho su deceso .