Uno de los mas grandes violonistos de todos los tiempos ITSHAK PERLMAN resivyo el PREMIO GENESIS de Un Million de Dolares de las manos de Binyamin Natanyahu en Yerushalayim. Perlman fue el treser a arresivir el Premio Genesis.
El primer era Michael Bloomberg, el ex-alkade de New York en 2014. Kijo en primero developar projektos Israelo-Palestinyanos ma el komite del Premio se lo refuzo i desidyo por fin de finansar 9 projektos ke tyenen valores judiyas. Mas de la mitad de estos projektos se realizan por organizasyones sin dingun profito
ke se topan fuera de los Estados Unidos i de Israel.
El segundo era Michael Douglas en 2015, aktor/produktor de padre judyo i de madre non-judiya ke se komprometyo de uzar los fundos para prevenir los kazamientos mikstos i ayudar los ke izyeron kazamientos asemejantes.
Perlman resivyo tambien el PREMIO PREZIDENSYAL DE LA LIBERTAD -Estados Unidos- de las manos de Barak Obama, el Nov. 24, 2015.
Stan Polovets, el Fondador del Premio Genesis dize ke la ideya es de honorar el individuo i avlar de las valores judiyas kon la esperanza de pueder inspirar los ke tienen sus sentimientos neutros i no les importanta el judaizmo i sus identitad judiya. Los ke arresiven este Premio son enkorajados a investir en ovras de karitad.
Perlman tiene un program muy kargado de konsiertos en el mundo entero. Milyones de personas korren a oyirlo i malgrado esto se dedika a los talentos mansevos en siendo sus profesor. No le importa de ayudarlos en todo i de darles sus tiempo libre. Es un avokato enflamado tambien por los derechos de los dezhabilitados. Perlman dize ke su buto sera de promover el bien en el mundo -tikun olam- , de ayudar las personas, de azer buendades por ser judyo. Es muy sensible a todo lo ke toka los invalidos i a los ke sufren del terrivle polio.
Perlman se sintyo orguyozo de arresivir el Premio Genesis komo rekonosensya de su ekstraordinarya karyera por seguro ma, mas de todo, por su dezeyo de dar lo mijor al mundo. Ademas su erensya judiya konto muncho en su vida. Tuvo influensa en su muzika i en su vista del mundo. En kada de sus vijitas a Israel i en estando akompanyado por la orkestra filarmonika de Israel, teniya la impresyon de estar kon su “mishpaha” – familya-.
Los paryentes de Perlman, Haim i Shoshana Perlman, aviyan emigrado de Polonya a Palestina en 1930, antes ke se konoskan. Itshak nasyo en Tel-Aviv en 1945 . Fue aharvado por la POLIO a 4 anyos kuando solo empeso a ambezarse a jugar el violon. Kuaji muryo ! Dospues de un anio de konvalesensya sus piernas eran paralizadas. Ma el kontinuo a jugar el violin. A sus 5 anyos estudyo en la “Academia Shulamit” de Tel-Aviv. Performo a sus 10 anyos . La familya emigro a los Estados Unidos kuando el teniya 13 anyos.
Itshak gano una beka i empeso a estudyar en la famoza eskola de muzika JUILLARD. Izo su magnifisente entrada al CARNEGIE HALL dospues de 6 anyos. En 1959 djugo con Ed Sullivan Caravan Stars . En su karyera meteorika fue Soloisto, Conductor de Orkestra, djugo el Classico i el Jazz i la Muzika Klezmer. Djugo en filmos i todo esto no se lo olvido. Djuga asentado i kamina kon bekillas (muletas). Itshak i Toby, su mujer, tienen 5 kreaturas, i 8 inyetos. Los 3 djugan muzika klassika, uno el Rock i el otro es avokado.
Perlman estava detras de la maraviyoza muzika, el solo ke se oye en el famozo “Schindler List” ke gano el GRAMMY i el OSKAR. Resivyo 16 Premios GRAMMY i dyo konsiertos delantre de munchos kapos de Estados.
Sin duvdas, es un artisto ke meresyo mas de todos otros el prestijyozo Premio Genesis.
Artículos Relacionados: