La fruta ke en Israel se yama oy (por yerro!!) “afarsemon”, es “persimon” en Ingles. Ma, tambien en ingles, se yama “Kaki fruit”. En espanyol se yama “caqui”. El nombre latino del arvol de esta fruta se yama Diospyros Kaki, i al pareser su orijin es de China o de Japon.
El afarsemon verdadero, NO es fruta sino un arbustro aromatiko ke se avla por el en el Talmud en Masehet Yoma. Es una koinsidensia maraviyoza ke djustamente en Dia de Kippur es muestra kostrumbre de meldar unos kuantos fragmentos de esta Masehet…
Este arbustro aromatiko krese yabani (salvaje) en la Peninsula Arabica.
En tiempos antiguos se kultivava solamente en Erets Yisrael (en el vaye del rio Yarden i a la oriya de Yam aMelah). De las ramas, i afilu del troncho del afarsemon, se esprimiya una azeite muy aromatika, ke se mesklava kon otras espesias, i se empleava para saumario, para melizinas, kosmetika i mas.
El afarsemon bibliko se yama en muestra lingua, i tambien en espanyol, “Balsamo”. En ingles: balm o balsam. Bien entendido ke el nombre derive de la palavra ebrea “bosem”, ke es perfumo…
La azeite del afarsemon, djuntos kon azeite de oliva, kanela i mirto, era -en tiempos del Bet aMikdash- la azeite kon la kual se untavan todos lo atuendos del Templo, i tambien se untava la kavesa del gran saserdote i ansi la kavesa del rey en el dia de su koronasion.
Por seguro vos akodrash el piyut ke se kanta en la salida del Shabat: ”Mandamos a el UNTADO, Mashiah de Yisrael”.
En Masehet Yoma (39, 1) topamos eskrito ke kuando un benadam va a mizurar alguna kantidad de gaz (petrolio), le dize su amigo:
– “Mizura tu mizmo, tu solo, lo ke tienes de mizurar”.
Ma, kuando viene el ombre para mizurar alguna kantidad de azeite de afarsemon (balsamo), le dize el amigo:
– “Espera, esperame! Vengo mizurar la kantidad de la azeite djuntos kon ti. En esta manera, mos perfumamos tu i yo tambien”.
Esto es lo ke dezian muestros padres sefaradim: “Aleshate de los malos i adjuntate kon los buenos!”.
Todo bueno ke tengash!
Yehuda Hatsvi
Erets Yisrael
Gracias por tu explicación no encontraba información fue muy enriquecedor toda esta narrativa bendiciones shalom