Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http://www.radioj.fr/node/145 ) sea en direkto, sea kuando se kyere: mis emisyones son enrejistradas a mi nombre.
Oy estamos en medyo de los Yamim noraim, los diyas de temor, ke korren entre Rosh Ashana i Kipur, ke este anyo va kaer en diya de Shabath, amanyana a la tadre. El djueves a venir, 9 de oktovre, va ser la fyesta de Sukot, dunke no avra radyo,i el djueves de despues, 16 de oktovre, vamos a kaer en Shemini Atseret, dunke tanpoko no avra radyo, i me oiresh solo, si kyere el Dyo, el djueves 23 de oktovre.
Entremyentres, el alhad pasado, tuvimos lo ke se yama el Tsom Gedalya, savyendo ke el byervo tsom kyere dizir ke no se kome, komo el byervo taanit. Ya me demandi ke diferensya ay entre los dos byervos tsom i taanit, syendo ke en los dos no se tyene derecho de komer. Deke se avla syempre del Taanit Ester ama del Tsom Gedalya? Me lo demandi, ama la repuesta no la topi. Un poko a vozotros de bushkar!
Mi amigo Jose Molho, ke me ayuda muncho para topar kozas de kontarvos aki, i ke rengrasyo muncho por esto, me dyo la idea de avlarvos oy de este tsom del alhad pasado. Kyen era este Gedalya i deke azer un tsom, un taanit, en rekodro de su muerte? No solo mi amigo me dyo la idea, ama tambyen me trusho dokumentasyon muy interesante, i vo aprovar de kontarvos esta istorya, ke mos embiya mas de 2.500 anyos antes, del tyempo de la estruisyon del primer templo, el templo de Shelomo.
Por esto, es menester de remembrarvos un poko los evenemyentos de estos terrivles tyempos, ke mos akodramos en diya de tish’a beav.
Estamos en el reyno dicho de Yeuda, ke tyene por kapitala Yerushalaïm. El otro reyno, el de Israël ke teniya por kapitala Shomron, ya no egziste mas, enteramente destruido por los Asiryanos en 722 antes del kristo (a kada vez ke agora vo dizir una data, va ser syempre antes del kristo), i kon este reyno se pedryo tambyen diez trivos. En el reyno de Yeuda, kedan solo los trivos de Yeuda, de Binyamin i de Levi. De este tyempo se puede avlar de djudyos, los moradores del reyno de Yeuda.
Este reyno de Yeuda, por su desgrasya, tyene tres vizinos muy fuertes i konkerantes: al oeste, el reyno de Mitsraïm (Ayifton), i al este los reynos de Persya, ke tomo a la Asiriya, i el reyno de Bavel. Entre estos tres, el chikitiko i flakito reyno de Yeuda se topa komo una muez entre las mashkaderas de un rumpedor.
Por egzemplo, en 608, el Par’o Nekao II kyere ayudar a su alyado el rey de Asiriya Asurubalit II i por esto kombatir Nebuhadnetsar (Nabuchodonosor) ijo de Nabopalasar, ke se izo rey de Bavel. Tyene, por esto, de atraversar el reyno de Yeuda. Dize a Yoshiyau (Josias en franses), rey de Yeuda, ke no tyene nada kontra el, ke su gerra es kontra Bavel. Ama yene el rey Yoshiyau no puede achetar ke armadas pasen a traves su pais, i va afrentar la armada de Nekao en Megiddo. Aya muere en la bataya, por tener luchado, es un paradokso, en ayudando, de una syerta manera, Nebuhadnetsar, ke va ser unos vente anyos mas despues, kuando va ser rey (dainda no lo es), el destruidor de Yerushalaïm i de su Templo, el primer Bet Amikdash.
A la muerte de Yoshiyau es su ijo Yeoahaz (Joachaz en franses) ke se aze rey de Yeuda. Ama Nekao II echa abasho a Yeoahaz i mete rey en su lugar a su ermano Yeoyakim (Joachim en franses) . El Tanah mos dize mismo ke este rey se yamava en vedra Eliakim, i ke es Nekao II ke troko su nombre en Yeoyakim (no mos dize deke).
El Par’o Nekao II se va en Bavel azer su gerra, i pyedre la bataya de Karkemish en 605. Karkemish se topa al norte de l’Assiriya, al nord-este de Alep. La armada ejipsyana se fuye para aboltar en Ayifton, i esta vez son los Babilonyanos de Nebuhadnetsar, ke agora se izo rey, ke entran en el reyno de Yeuda para persegir a los Ejipsyanos. I de muevo el rey de Yeuda no acheta ke una armada ajena entre en su pais, ama esta vez la armada es la armada babilonyana. I durante unos tres anyos, Yeoyakim no puede azer otra koza ke someterse a Nebuhadnetsar.
Ama al kavo se rebuelta kontra los Babilonyanos en 598. Los Babilonyanos i sus alyados ganan esta mueva gerra i Yeoyakim muere para ser remplasado por su ijo Yeoyahin (Joaquin en franses). Para meter fin al enserramyento de Yerushalaïm por Nebuhadnetsar i sus alyados, Yeoyahin se va a ver Nebuhadnetsar kon su famiya i los grandes de su kaza, i se rende. Nebuhadnetsar toma lo bueno de su palasyo, i yeva 10.000 prezoneros en Bavel, i entre eyos el rey Yeoyahin.
I, mos konta el Tanah, Nebuhadnetsar mete komo rey de Yeuda, en vez de Yoyahin, a Matthanya su tiyo (ijo de Yoshiyau i ermano de Yeoahaz i de Yeoyakim) i, mos dize el Tanah, le troka su nombre en Tsidkiyau (Sédécias en franses). Esta vez de muevo, no savemos deke.
La idea de Tsidkiyau es, el tambyen, de luchar kontra Nebuhadnetsar, malgrado las profesiyas del profeta Yirmiyau (Jérémie en franses) ke lo akavida de no luchar kontra Bavel. Tsidkiyau no lo oye i se mete de la vanda de los Ejipsyanos kontra Bavel. Negro eskojimyento: los ejipsyanos se izyeron flakos i los Babilonyanos fuertes. Hizkiyau refuza de pagar el dasyo a Bavel i dize su reyno independyente de Bavel.
Esta vez, arravyado, Nebuhadnetsar vyene de muevo a enserrar Yerushalaïm. El enserramyento empesa el 10 de tevet en 587, kijo dizir al empesijo del invyerno. La djente empesa de ser muerta por komer. El 17 de tamuz del anyo despues, kijo dizir 586, dunke al empesijo del enverano, los Babilonyanos logran de burrakar la pared de la sivdad i de entrar en Yerushalaïm. El 9 de av, menos de un mez despues, los Babilonyanos estruyen i keman el Bet Amikdash, el Primer Templo. Los Babilonyanos toman a Tsidkiyau, le degoyan a sus ijos delantre de el i despues le asyegan los ojos, lo enkadenan i lo toman kon eyos para yevarlo en Bavel, el i la mayoriya de la povlasyon de Yeuda.
No tengo menester de dizirvos ke desgrasya fue la koza. Uno de los nisim los mas inkreivles de los djudyos es: komo es posivle ke el puevlo djudyo, despues de tantas desgrasyas ke konosyo, i antes i despues ( la estruisyon del sigundo Templo, 2.000 anyos de galut, las Cruzadas, las matansinas en todos lugares, la Inkizisyon, la Shoa) dainda bive i se fraguo de muevo su pais, malgrado tantas gerras todas ganadas. Ashkulsun!
Esto dicho, abaoltaremos en Yeuda ande kedan solo los mas proves del pais, los ke no tyenen nada, mos konta el profrta Yirmiyau.
Para governar sovre esta djente, el rey Nebuhadnetsar mete komo governador a Gedalya ben Ahikam, permityendo tambyen al profeta Yirmiyau de kedarse ande el, Gedalya, ke mora en la sivdad de Mitspa, ke vyene ansina a ser la kapitala de Yeuda (ke ya no es mas un reyno) en vez de Yerushalaïm, ke kaji no egziste mas.
Kuando se ambezan ke ay en Yeuda un empesijo de govyerno, los djudyos ke aviyan reushido a fuirse en paizes ajenos aboltan verso Mitspa para meterse basho el governo de Gedalya. Entre eyos, mos dize el Tanah, aviya Yohanan i Yonatan ben Kareah, Seraya ben Tanhumet, los ijos de Efaï de Netofa, Yezanyau ijo del de Maakat, i, para eskapar, Ishmaël ben Netanyau (si, tenesh byen oido, el padre de Ishmaël se yamava Netanyau, komo el Primo ministro de Israel de oy, i su ermano Yonatan, de bendicha memorya, el gibor de Entebbe). Estos todos no vyenen solos, vyenen “kon sus ombres”, mos konta el Tanah en el livro de Yirmiyau. I el livro de Yirmiyau (kapitulo 40, pesukim 9 a 12) mos konta:
“Y juro a ellos Gedalyahu, hijo de Ahikam, hijo de Saphan, y a sus varones, por dezir: no temades de servir a los Caldeos, morad en la tierra y servid al rey de Babel, y sera bien a vos. Y yo, he yo estan en Mizpah por estar delante de los Caldeos que vernan a nos, y vos apanyad vino, y (frutas) de verano, y azeyte, y poned en vuestros vasos, y estades en vuestras ciudades que tomastes”.
En mas de los ke vos dishe, todos los djudyos ke se aviyan fuido en Moab, Ammon, Edom i otras tyerras aboltan a Yeuda serka de Gedalya en Mitspa. Gedalya ovra en tres direksyones:
– ekonomika: enkoraja los kazalinos a sembrar i kultivar vinyas i trigo;
– relijyoza: los enkoraja de selebrar las fyestas de Tishri afillu la estruisyon del Bet Amikdash;
– politika: los enkoraja de kedar sometidos a Bavel, unika solusyon para kedar bivos i pueder lavorar.
Ama los djudyos son un puevlo “duro de cerviz”, no so yo ke lo digo, es el Dyo el mizmo (Shemot, XXXII, 9). I no les agrada ser sometidos. Ishmael ben Netanyau kyere luchar kontra Bavel, i por esto se va ver al rey de Ammon.
Yohanan ben Kareah i los otros kapos se van a ver a Gedalya en Mitspa i le dizen ke Baalis, rey de los Ammonitos, a enkargado Ishmael ben Netanyau de matarlo. Ama Gedalya no los kree. Vyene en sekreto Yohanan ben Kareah i demanda a Gedalya de permeterle de ir a matar a Ishmael. Ke si no lo aze, es el, Gedalya, ke va ser matado, i todo el puevlo ke keda de Yeuda se va dezazer.
Todo lo ke disho Yohanan es vedrad, ama malorozamente Gedalya no lo kree, i dize a Yohanan de no matar a Ishmael porke es el, Yohanan, ke avla falsedad.
I el dia de Rosh Ashana, primo de Tishri en el anyo 586, vyenen Ishmael i grandes del rey i diez ombres, para komer ande Gedalya en Mitspa. Gedalya los resive kon amistad, ama Ishmael, ayudado por los diez ombres ke aviya traido kon el, trava su espada i lo mata, el i todos los djudyos i los Babilonyanos ke se topavan serka de Gedalya.
El povereto de Gedalya governo solo 52 diyas a lo mas (entre el 9 de av i el primo de tishri). Ama la matansina no se keda a esto. No savyendo lo ke se paso, 80 djudyos ayegan a Mitspa dos diyas despues de esta matansina, venidos de Shehem, de Shilo i de Shomron, kon prezentes i ensyenso para traer, mos konta Yirmiyau, “a la kaza de Adonay”. Kualo era la kaza de Adonay 52 diyas despues de la estruisyon del Bet Amikdash? En la Biblia katolika, dizen ke el kulto se aviya puede ser mantenido afillu la estruisyon. Ama esta repuesta no me konvyene, porke si tal era, deke irse a Mitspa i no a Yerushalaïm? Es ke aviya una forma de kal en Mitspa? No se. Kale mirar lo ke dize Rashi sovre esto. Yo no tuve tyempo de azerlo.
Vyendo estos ombres, Ishmael va yorando delantre de eyos, i les dize ke los va yevar a Gedalyea. Ama en vez de esto, i kon el ayudo de sus askeres, los degoya todos salvo diez (sino no lo savriamos) i echa los puerpos en un pozo.
Despues, Ishmael aze prezoneros todos los djudyos de Mitspa inkluyendo las ijas del rey, i los toma para yevarlos kon el ande los Ammonitos.
Ama Yohanan ben Kareah, el ke Gedalya no kijo eskuchar, vyene kon askeres para atakar a Ishmael. Libera ansina a todos los djudyos prezoneros, ama Ishmael el negrinyado reushe de fuir i se va refujyar andel rey de Ammon.
La istorya, malorozamente, no se eskapa ansina. Yohanan ben Kareah i la djente ke salvo se espantan de los Babilonyanos, syendo ke son djudyos ke mataron al governador puesto por los Babylonyanos sovre eyos. Pensan fuir verso Ayifton. Yene demandan su avizo a Yirmiyau el profeta. El les responde ke el Dyo le disho de no tener espanto de los Babilonyanos i de kedarse en Yeuda.
Ama Yohanan no lo kree i le responde ke esto no puede ser lo ke le disho el Dyo, i se va kon todos los djudyos en Ayifton. Negra idea: se va pasar lo ke Yirmiyau les disho: poko tyempo despues, Nebuhadnetsar se va ir en Ayifton, i aya va matar a los djudyos o tomarlos para yevarlos prezoneros en Bavel.
De tal manera ke, komo lo vesh, el asasinato de Gedalya fue, komo disho Talleyrand despues ke el duke de Enghien fue fuzilyado por orden de Napoleon: es mas ke un krimen, es una kulpa…
Este asasinato de Gedalya tuvo por konsekuensa ke la tyerra de Yeuda se topo enteramente vazyada de sus moradores djudyos.
Por esto es ke los hahamim dechidaron de azer, por la muerte de Gedalya, un kuatren tanit en mas de los tres otros: 10 de tevet, 17 de tamuz, i, por siguro, 9 de av.
Por esto, ama tambyen, dize la Gemara, para ambezarte ke la muerte de tsadikim es tal i komo la estruisyon del Templo de Yerushalaïm.
Puede ser vos akodrash esta otra dicha del Talmud ke vos meldi aze tres semanas: Un solo ombre a sido kriado en Bereshit. Esto es para ambezarmos ke kualkyer toma la vida de un solo ombre, es komo si aviya destruido la djente umana entera; a la rovez, el ke salva un solo ombre tyene tanto merito komo si teniya salvado toda la rasa umana.
Esto dicho, esta muerte, komo oitesh, se paso en diya de Rosh Ashana. No se puede azer tanit en diya de fyesta. Por esto el tsom Gedalya se aze en jeneral el 3 de tishri, kijo dizir despues de Rosh Ashana. Salvo ke, este anyo, el tres de tishri kayo diya de Shabat. De muevo no se puede azer tanit, i por esto es ke kayo este anyo alhad 4 de tishri.
Kon esto me vo kedar agora porke ya vino el tyempo de eskapar mi emisyon.
Al djueves 23 de oktovre, si kyere el Dyo!
Edmond Cohen
Paris – Fransya
Artículos Relacionados: