Diario Judío México
LA TRESERA NOCHE KON LA KANDELIKA KOLORADA
La primera noche asyendi la kandelika vedre ke es la kolor de la esperansa, de la manseves, de la freskura, de la paz ke rogo por Israel i todos en el mundo, i lo mas para una buena salud…
Rogi al Dio por todo esto kon mi kandela vedre ! Le rendi grasyas por los milagros ke mos izo i por siempre darmos fuersas para luchar kontra las difikultades de la vida i las dolores ke sufren los hazinos.
Rogi para ke la “LUZ ” i la “KAYINTOR” del amor , de la kreensya i de la esperensya nunka se amate en muestros korasones.
La segunda noche, asyendyendo la kandelika bleu, Le rogi al Di-o de apiyadarse de los ke estan leshos de sus kazas, en los hospitales, en la karsel, detenidos por enemigos o terroristos… En horas pretas….
Esta noche, ke es la tresera noche de la Fiesta de las Luzizikas vo asyender un kandelika kolorada. Me namoro mirarlas dospues ke las asyendo ! I… Es verdad ke dizimos ke no kale uzarlas para tener luz en kaza o kayintarmoz kuando tenemoz friyo ! Son solo para mirar !
Kandelika kolorada para los ke se aman i se sienten namorozos i la pasion buye en eyos ! El amor….El mas ermozo sentimiyento ke Di-o mos regalo. El amor ke troko la Historya munchas vezes, el amor ke mostra kamino a los mansevos, en lo mas de kavzos, i fraguan sus futuro kon el… El amor de fuersa derrokador o ke yega al Gan Eden… Ke mos puede azer esklavos voluntaryos de la persona amada.
Rogare al Di-o para ke mostre el kamino djusto a las personas enlokesidas i asyegadas por el amor i los sentimentos irrasyonales … Ke topen repozo en sus almas i puedan tomar las desizyones justas en sus vidas. ….I porke el amor no tiene kolor, edad, lojika, lugar i no entyende de “no es posivle ” rogare para ke ” La flecha de Cupidon ” entre en los korasones de akeyos ke se “pueden” amar i ke tiyenen los kaminos libres sin dingun obstakulo delantre de eyos….
Rogare para ke las personas se enamoren porke enamorados nunka pensaran a azer gerras o negrigura !
Ke la kandelika korolada del amor toke i kalyente todos los korasones ambyertos de afeksyon i de amor.
sharope.blanco@gmail
Artículos Relacionados: