Pera es un lugar ke egziste dayinda en Istanbul ma ke peryo muncho de su karakter i se troko kon los anyos. Si me demandash a mi….Vos dire ke dingun lugar me dyo el mizmo plazer i oy en dia kuando salgo para divertirme i pasar el tiempo komo me plaze, la tomo a Sharopiko por la mano i me la yevo a “cicek pazari”.
“CICEK PAZARI” (chichek pazari – ke kere dizir el merkado de las flores) era i es un lugar muy popular en el korason mizmo de una avenida prensipal de Istanbul. La Istiklal Caddesi era la mas grande ke egzistiya en los anyos 40-50 i era ande biviyan los minoritaryos, judyos, gregos, ermenis i europeyos. De las dos vandas de la avenida eran los mas grandes magazenes de la sivdad. La gente no saliyan ayi sin vistirsen lo mijor ke puediyan. Era el sentro de la alta kustura, i de los magazenes de ropas de seda, de ropas importadas de Paris, de Londres… Me akodro del grande magazen de djugetos de tavla, de kuklas las mas ermozas del mundo ke diziyan ” ma mm a ” kuando las echavas…. Los topes (balls) de kolores bivas i de todo los boyes (sizes)… las bisikletas i los kavayos de tavla ke te kunavan atras i adelantre… Un Ganeden para las kreaturas, i para mi por seguro ke puediyamos ver kada noche en muestros suenyos !
Las perfumerias, los magazenes de kalsados, i los magazenes alavados de djoyas i oras, los magazenes ke vendiyan paltos i jaketas de samara eran los suenyos de las mujeres ! Yo bostezava kuando ivamos en estos ! El “Bonmarshe” de los djugetes era por siguro muncho mas atraktivo !
Beyoglu, este sentro, o Pera, kon su nombre de “al tiempo” era naturalmente el lugar ke se komiya el mijor tambien. ” Abdullah “, “Aziz”, “Rejans” “Hadjibaba” eran unos kuantos de los restaurantes alavados i “de punto” ande los mas rikos, los intelektuales i los mas konosidos se ivan para komer i “salir” kon amigos. Las mujeres eran muy elegantes las noches en estos lugares. Fostanes kon dantel i broderias, chapeyos, guantes, djoyas….. Los hombres siempre kon vistidos i kravata, galantes kon sus mujeres, komportandosen perfektamente. Spesyalmente en “Rejans” ke era un restaurante dirijado por dos mujeres de Rusya, aedadas, ke aviyan fuyido de aya kuando el payis se izo komunisto. Lo mizmo en “Abdullah”, un restaurante muy shik i ke vos deshava inolvidavles savores en la boka….
Mi padre mos yevava a mi madre i a mi a “Rejans” o a “Abdullah” kada ves ke teniyamos aniversaryos o dias de fiestar un evenimiento. En estos tiempos aviya “masha” para azer buklas en los kaveyos. Las mashas se kayintavan ensima del gaz i se apanyavan kon estos un pedaso de kaveyo ke se aboltava para formar la bukla. Se puediya sintir la golor del kaveyo kemado ! Ke dezgrasya. No aviyan las furchas (brush) i el fen (blower) de oy. Dunke dospues de formar las buklasmos, mi madre me metiya el grande fyongo de tafta ensima de las buklas, mos vistiyamos de fiesta, yo kon las kalsikas kurtas blankas i kalsados pretos de rugan brilyante, mi madre luzya komo una artista de sinema parfumada.. Ayyy ke golor de achileyar el korason i ivamos a Pera kon taxi. El tapet korolado i las almenaras de kristal en estos restaurantes mos akodrava ke teniyamos de azer attension a muestra lingua, muestra boz – no se avla a boz alta es muy verguenza ! – komo mos asentamos i mos alevantamos etc… Los servientes vistiyan el smoking i mos travavan la siya en asentandomos i alevantandomos. Aviya 3 tipos de kupas para kada uno i mizmo a mi me davan el “menu” mas grande de mi, afilu ke no saviya meldar o entender los nombres de las komidas en fransez o en zurzuvi ! Mis paryentes por seguro ke saviyan todo i yo me namorava por koftes i patatas fritas ! Mi padre siempre teniya ke dizirme ke esto lo puediya komer i en kaza i aki era bueno de gostar komidas muevas. Teniya razon! Otros lugares eran las patiseriyas…… Lebon, Markiz, Gloria, Inci…. En dingun payis no topi la savor de los gatos i dulsuryas de Istanbul…Oy en diya no paso por Pera sin komer el “profitrol” de Inci ke esta dirijado por la inyeta del patron del Inci, un maestro grego de la dulsurya ke ya era aedado kuando era chika yo !
El mijor lugar de pasar el tiempo kuando aziya luvya o por asperar la ora del filmo o tomar un dulse de leche o una supa kayente de gayna kon aroz era el “Muhallebidji Saray” por seguro, allado del simema SARAY. Muy karakteristiko kon sus mezas de marmol i los mueblos de tavla muy oskuro, las kanatikas de metal para la agua de roza ke se echava ensima del malebi, el dulse de leche. Kuantos amores empesaron ayi i kuantos se eskaparon kon los korasones mas duros de las mezas de marmol…..
Los mijores filmos se djugavan en los sinemas Saray, Melek, Atlas, Lale, dospues el Yeni Melek i muy munchos otros, todos en este sentro. Los Shabates i Alhades era muy difisil de topar bilyetos i eran los “karaborsadji” – los ombres ke vendiyan los bilyetos dopyo del presyo – ke ganavan de las espaldas de los mansevikos ke keriyan ver “absolutamente ” el filmo kon la semanada ke tomavan de los padres o de las madres i ke kontavan el sentavo ! Munchas vezes saliyamos de un sinema para entrar presto presto en el otro….I deke no a vezes al treser ! No kale olvidar ke no aviya televizyon en akeyos tiempos i el sinema i el teatro eran la mijor manera de pasar bien el tiempo.
El lugar ande komiyamos los sandviches “grandes komo kalsados” i ande inchiyan todo lo ke se puede imajinar de komida era ATLANTIK… No se si egziste en el mundo otra “sandvicheriya” asemejante. Mos fuyiamos de la eskola a midi para ir a komer sandvich a ATLANTIK. El pan era siempre kayinte salido del orno kon un perfume de kitar loko al ambierto ! Yo me tresaliya del sandvich de garato ke es la lakerda i todo modo de pishkado salado. El chiroz ke es el uskumbri salado i sekado, el likorino etc. A vezes tomava el del “arnavut cigeri” ke es ilgado frito kon sevoya i prishil o el de dolmas (stuffed leaves or pepper) o, kuando teniya munchas paras, el sandvich kon kaviar korolado o preto.. Mi mamita se namorava de esto !
“LALE ISKEMBECISI” era un restaurante espesyal ke se iva tadre las noches dospues del sinema o teatro o a la salida de “night clubs”. Es kostumbre de ir al “ishkembedji” en Istanbul dospues de medya noche. No vo dizir ke es la koza la mas saludoza en el mundo….Por siguro ke no ! Al kontraryo…Esto es kitar envitasyon al berahayim ! (en Istanbul dizimos berahayim i no betahayim. Beer ke ez pozo en ebreo. Dunke pozo de la vida para dizir simetaryo – En Israel uzamos dizir Bet Kvarod ke ez kaza del enteramyento ) En el Ishkembedji se vende supa de tripas o de pacha (los pyes) kavesaz, meoyo, ilgado del kodrero …. Nada de lo ke kale komer.. Tosigo por el korason i muestra salud.
En el sentro de Pera se topava el otel i los salones de te TOKATLIYAN. Yo abasti a ir una ves solo a este lugar eksklusivo. Era por el bar mitzva de Dogan, el ijo de amigos de mis paryentes. (Su ermanika era mi amiga. Dospues eyos se fueron al Kanada i la peryi de vista a mi amigita de chikes. Se yamava Rozi.. Su madre era Ines i su tiya Meri. El ijo de Meri, Mani, era un viyolonisto de muncho talento. Rozi deve tener unos 60 anyos agora.) Oyi muncho de este otel de mis paryentes. Era muy elegante. A la ora del te, Celal Ince ke era un kantador famozo de tangos kantava aya i la djente baylavan i pasavan tiempo agreavle kon sus keridos i kon sus amigos. Fiestas alavadas se davan en este Otel frekuentado por europeyos, artistas, gente rika i kultivada. Lo derrokaron antes de los anyos 60. Yo deviya tener unos 10 anyos…No mas.
Kuando se avla de los lugares enteresantes de Istanbul i dizen a los turistos ande ir i ke ver, por seguro ke el CICEK PAZARI viene enlos primeros rangos. No ay duda ke los palasyos i los lugares historikos vienen en primero ma immeditamente dospues es mi kerido lugariko kon sus mil i un plazeres…. Todas las kolores, todas las savores, las golores, el egzotizmo del oryente i el gusto i modo de bivir del oksidente. Es un kartye entero ke se puede divizar en tres partidas. El cicek pasaji, el cicek pazari i el aynali pasaj.
EL CICEK PASAJI se topa arriyento de un edifisyo ke deve datar del siglo 19. Tiene una arshitektura muy ermoza i muy ellaborada. Echo kon muncho gusto i ke asemeja tambien a los edifisyos de Paris fraguados en la mizma epoka. El pasaj tiene un tejado muy alto i serrado. De las dos vandas se topan restaurantes de dos etajes lo mas. Son “meyhanes” (tavernas) ande se beve i se kome mezes muy muy savrozos, pishkados, burekas, midyas, patatas, berendjenas fritas. Las noches orkestras i bayladoras zinganas kantan i baylan en kada meza i los klientes les echan paras. Antes solo los ombres ivan a estos meyhanes ma dospues se izo un lugar ande todos se van i turistos por sierto. Oy es frekuentado por los estudientes, artistas, merkaderes, jurnalistos i personas, komo mi, ke les plaze los lugares nostaljikos, estetikos kon savores, luzes i kolores ke dan plazer.
EL AYNALI PASAJ tiene mas o menos la mizma arshitektura. Djusto en frente del cicek pasaji se restoro muevamente. El tejado es tambien serrado kon ventanas ke deshan pasar la luz. En las vandas ay espejos i es por esto ke lo yaman aynali (espejo) pasaj. Toda manera de objetos antikos, vestimyenta i aksesuares etnikos, livros viejos, pinturas, seramikas muy muy ermozas i mil i una koza ke miramos kon maraviya i amor se topan en los magazenes de este pasaj.
EL CICEK PAZARI es una kaleja larga kon otra una kaleja a la siedra mas kurta. Es un merkado de mil maraviyas. El nombre lo tiene de las vendedoras zinganas del tiempo ke vendiyan flores (chichek en turko) al empesijo de la kaleja ke da a la grande avenida de Pera. Es el merkado de magazenes de karne, vedrura i frutas, gaynas i patos, pishkados.. Los mijores pishkados de los merkados de Istanbul se topan en este merkado. Magazenes de todo lo ke empleyamos para gizar muestras komidas alavadas en el mundo entero se pueden merkar en este merkado. En los anyos dalkavo munchos restaurantes de pishkado se avriyeron en las kalejas ke salen al merkado. Ay entre eyos muy elegantes i kon muzika turka i zingana de noche.
Pera es un lugar kozmopolito ande se avlava todas la linguas antes. Las variyas kulturas se kruzavan todas en esta djoya de la Turkiya. Ay anyos ke estan tratando de arrekojer i publiar dokumentos, livros i enformasyones sovre este sentro. Oy tambien es el sentro de la moda, del arte, de la muzika, de los kafes, de los livros i de la vida sosyal, kultural i entelektual en Istanbul.
Artículos Relacionados: