Oy tengo ganas de avlar de una persona ke ayer la noche dayinda vide en un reportaje televizado. Esto dayinda influensada por el ermozo program ke izyeron en honor de Cemil Ipekci (Djemil Ipekchi) un hombre kon mil fasetas, ekstraordinaryo i ke siempre me desho kon la boka avyerta…. Si, yo lo konosi porke era el amigo muy intimo de la metresa de mi ex-marido i de el tambien !!! Nunka dishe ke tuve una vide perfumada de agua de rozas !!!! Ma la historia no es sovre eyos ke no le viniyan ni fina sus kalsas….. Es la vida de Djemil ke oy tiene 71 anyos i de vedra ke no los mostra del todo kon su puerpo fino, su ermoza kara i su vistimienta fantastika. Djemil es gay, komo lo puedrash entender malgrado ke se kazo una vez kuando era muy mansevo para tener une kreatura disho… Ma Di-o teniya otros planos para el.
De ande empesar a kontarvos ? Nasyo kon muncha suerte de una famiya muy rika, aristokrata Otomana, duenyos de sederiyas (ipek es seda en Turko), vastos terrenos ke se les regalaron por el Sultan Otomano, el mediko del kual era su padre. Ademas eran los duenyos de los sinemas los mas luxuozos, produksyones de filmos de al tiempo… No se engrandesyo kon sus padres ke teniyan un otro ijo i una ija ma kon el primo de su padre el “Ipekci” ke no puediya tener kreturas i le dyo su nombre de famiya i de todo lo ke gozo Djemil fina sus 23 anyos.
No kijo kontinuar dospues del Liseo i se fue a la Hollanda ande eskapo la Akademia de los Artes. Des de 6 anyos en su chikes adorava kuzir i ayudava su ermana ke fue una grande kuzendera en Bursa mas tadre. El vistiya sus kuklas ! Siempre sintyo la absensya de su madre i se selava de su ermano ke estava allado de eya. Disho ke la separasyon de sus paryentes tuvo un muy grande impakto sovre el. Su padre era hermozo ombre i teniya munchas mujeres. Su mujer no lo puido suportar….
Djemil kedo munchos anyos en Paris, en Londres, en New York, en Tokyo en todos los lugares tuvo sus salones de alta-kustura, partisipo a los defiles i gano serka 300 premios. Vistyo la jet-set internasyonal i por seguro las mujeres las mas en vistas en Turkiya. Se izo una figura de los mas famozos i lo envitavan en todas las okazyones. Es el ke vistyo las novyas i las famiyas sharanfonfon de los elites, la mas ermoza ija del mundo, una Turka, Azra Akin en 2002, artistas ets…
Agora solo va a vijitar sus atelyes i da sus ideyas a vezes. Su segundo asistante lavora des de 30 anyos kon el i es el ke dirija los echos. Djemil bive lo mas en Europa, en Japon… Es muy kerido de todos. La famiya de su padre eran Selaniklis i Sabetayistos, el tambien. La famiya de su madre orijinarios del Este de la Anatolia ma muy aristokratos. Se namoro una sola vez lokamente de un hombre 6-7 anyos mas chiko de el ke se muryo el otro anyo. Era kazado kon 2 kreaturas i siempre tuvyeron ke eskondersen malgrado la rikeza kolossal ke Djemil teniya. Tiene un palasyo en Bodrum por el enverano i se echa en la kama del Sultan Adulhamid ke merko en una “ventes aux encheres”…. Adora la historia i kolelsyona objetos Otomanos. Se keriya azer un ballet ma prefero ser un designer alavado. Bayla de manera inkreyivle ! Konose linguas, melda muncho, eskrivyo livros, poeziyas, le gusta la mar i los sielos. No ay munchas kozas ke no aprovo dayinda ! Es triste de no aver tenido kreaturas porke los ama muncho. Izo konstruir dos eskolas a su nombre…. Por seguro ke tiene munchas personas ke lo keren matar komo el Hizbullah ma el no se espanta i siempre fue sinsero sovre sus preferensyas i su manera de bivir. Un hombre muy selozo kuando esta amorozo i pronto a todas las lokuras !’ Dizen ke tiene un korason de oro kon mano avyerta i muy humano.
Miles de otras kozas se pueden dizir sovre el ma espero ke vos puide dar una ideya sovre komo de persona es….
Kon karinyo
[email protected]
Artículos Relacionados: