Ay madre!… Este es el titolo de la biografia de Ovadia Baruh, uno de entre los pokos djudios de Saloniko ke sovrebivieron a la barbaria nazista en los kampos de eksterminasion, por una seria de sirkonstansias ke algunos deskriven komo un milagro.
Asta oy, konta el en este livro, no entiendo komo pudi kedar bivo. Se puede dizir ke tuvi mazal? A vezes pensava ke uviero sido preferable de ir kon los ke murieron; diez minutos i ya se eskapa de sufrir… ma yo sufri la muerte kada dia, durante tres anyos…
Ovadia Baruh fue deportado a Auschwitz en Marso 1943, djuntos kon los siete otros miembros de su famiya i kon eyos, kaje todos los djudios de Saloniko. Al abashar del treno ke los trusho a este kampo, paso la seleksion i siendo ke era ainda mansevo, le fue tatuado sovre su braso siedro el numero 109432 i el fue embiado a un kampo de lavoro onde no le tomo muncho tiempo para entender ke avia yegado al inferno.
Una noche fue aferrado en lo ke estava bushkando a arovarse un poko de pan para afalagar su ambre, i el fue kastigado kon 60 latigas ke le arankaron gritos de dolor i el “ay madre!..” ke se gravo en su memoria…. Este grito atiro la atension de una djoven djudia de Saloniko, Aliza Tsarfati, eya tambien deportada a Auschwitz, ke estava pasando, akompanyada por una kapo, por el lugar onde Ovadia era torturado.
Eya demando de la kapo ke le ayudara a enkontrar este djoven de Saloniko. Esta aksepto i topo el medio de azerla entrar al lugar ande lavorava Ovadia. Es ansi ke se konosieron i pudieron enkontrarsen unas kuantas vezes. Eya le konto ke era del blok 10. Ya savia, apunta Ovadia Baruh en su biografia, ke este era el blok ande el Dr. Mengele azia eksperimentos sovre prizioneras djudias del kampo, ma no le dishe nada. Me enamori de eya desdel primer minuto ke la vidi i le prometi ke si salimos bivos de este inferno mos kazaremos.
Ma sus enkontros no turaron muncho. Dos semanas solo despues ke se enkontraron, Ovadia i Aliza son separados, saliendo kada uno kon otro grupo a una de las “marchas de la muerte”, organizadas por los nazistas en un ultimo esforso para kompletar sus plano diaboliko i eksterminar a todos los djudios, antes ke fueran liberados por las fuersas rusas i amerikanas.
Ovadia Baruh, ke fue de entre los pokos ke pudieron salir bivos de estas marchas, no ozava esperar ke podria enkontrarse de muevo kon la mujer ke amo. El torno a Saloniko en la esperansa de topar ayi a lo menos alguno de sus konosidos, i kada dia iva a los buros de la komunidad a ver las listas de los reskapados. Un dia, a su grande sorpreza i alegria vido a Aliza ke vinia djustamente de arivar de Almanya. Eyos se abrasaron, yorando i riyendo de alegria al mizmo tiempo, i apenas yegaron a su kaza el le akodro la prometa ke avia echo en Auschwitz i le propozo de kazarsen. La repuesta de Aliza fue ke no podria akseptar esta demanda siendo ke fue esterilizada en Auschwitz i no podia tener kreaturas. No importa, le respondio Ovadia, kero kazarme kon ti! I esto es lo ke izieron, despues de lo kualo suvieron a Israel.
Al prinsipio eyos no tenian kaza i duvieron areglarsen en una fragua ke era de antes un establo de vakas, ma ke para eyos era komo un otel de luso. Un dia Aliza disho a Ovadia ke tiene una sensasion estranya, komo si algo le esta kresiendo en la tripa. Fueron al doktor i le kontaron komo eya fue esterilizada en Auschwitz i no puede parir, ma aun kon esto se esta konsintiendo algo. Por mas seguridad vinieron otros dos doktores ke se konsultaron i, a sus grande sorpreza i alegria, yegaron al mizmo diagnostiko: eya estava prenyada.
Despues se supo ke el Dr. Shmuel, mediko de entre los prizonieros djudios de Auschwitz, ke avia sido enkargado por Mengele de azer operasiones de esterilizasion sovre las mujeres del blok 10, falsifiko la operasion de Aliza i dos otras mujeres, i aun ke les avrio la tripa i la kuzio despues, no les kito los ovarios. Es kontado de mas ke kuando Aliza i las dos otras mujeres ke el opero de esta manera, se keshavan i lo maldizian por las dolores ke les kavzava, siendo ke las operasiones eran echas sin anestezia, el les dizia: “Un dia entenderesh i me rengrasiaresh por lo ke ize.” El fue matado por los almanes, ma las tres mujeres ke salvo pudieron tener ijos i una de eyas yamo a su ijo Shmuel, a su nombre.
Aliza i Ovadia tuvieron dos ijos ke engrandesieron kon grande amor i eyos dedikaron el resto de sus vida a la dokumentasion de la Shoa i a transmeter los rekuerdos de esta epoka a la mueva jenerasion. Ovadia akompanyo 40 vezes grupos de djovenes ke van a Auschwitz, para kontarles lo ke paso ayi.
Su vida sirvio de baza al livro “Ay Madre!” i tambien al filmo “Ke biva tu rekuerdo, kerida”.
El murio el 11 de Fevrero, a la edad de 88 anyos, mueve anyos solo despues de la muerte de su mujer Aliza. Ke sus alma deskansen en paz.
Artículos Relacionados: