Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes ke vyene 7 de marso, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.
http://www.radioj.fr
La semana pasada no pude aparejar ni dunke azer kualkyera emisyon syendo ke arresivi en kaza mis inyetizikos por unos kuantos diyas, i no ay hayre por un papu de pueder azer kualkyer otra koza ke englenearlos kuando estan en kaza.
Aze dos semanas keriya eskapar mi tresera emisyon sovre la poeziya djudiya, i no pude por manko de tyempo de avla.
Vos deshi, kuando tuve de kedarme, sovre los poetas en djudeo-espanyol, i vos meldi un muy kurto pedasiko de un poema de Clarisse Nicoidski, dizyendovos ke, a parte de Clarisse Nicoidski, munchos otros son los poetas en muestra lingua.
Empesaremos por las mujeres: Entre otras, Henriette Asseo, Matilda i Rahel Barnatan, Lina Albukrek, Grasia Albuhayre, komo me lo akodro Rachel Bortnick (en vedra me teniya mesklado entre Albukrek i Albuhayre), i tambyen una mujer bivyendo en Estambol ke tomo komo nombre Sharope Blanko.
Aki una poeziya suya:
YITGADAL VE YITKADASH
La melodiya es una karesya a mi alma
Una boz ke de muy leshos me yama
Veyo un puevlo, firyido, solo, en el espanto
Mos vas a oyir ? Terminara muestro kastigo ?
Fina kuando Adonay tendremos ke sufrir ?
Kuando el odyo va amahar i mos vas a bendizir ?
Kuando konoseremos la paz para en paz bivir ?
Empesaremos por fin sin eskondermos egzistir !
Tus Paredes, Tu Luz i Tu Boz mos mankan !
Somos kreaturas sin kaminos ke mos yevan
No savemos komo yegar fina Ti, ke azer..
Komo kererTe, komo sintirTe, komo komprender ..
Sos Muestra Fuersa, El Uniko en Ken konfiyamos
Muestra sola Esperansa, el Braso de muestros ijos
Sos el Amor ke nesesitamos, Di-o de muestros Padres !
Amostramos kon tus maraviyas por fin ke mos keres !
Despues de las mujeres, los ombres. Me parese ke ay menos poetas ombres ke mujeres. Puedo yene sitar Shimon Geron, nasido en Sofia, ke bivyo en Turkiya i Israel, i agora bive en Australia. Ay tambyen otro poeta ke eskrivyo munchas poeziyas, publikadas en un livro intitolado Un ramo de poemas, kyero avlar de Haim Vitali Sadacca, ke bive en Montreal (Canada).
Aki un egzemplo de su poeziya:
Un diya luvyozo
Una luvya fuerte kon relampagos kaye,
Yo no veo ningunos kaminar en la kaye,
Un entorno muy asolado,un brusko dia,
Un sielo eskuro, esto sin alegria.
Me mankava sus miradas, su fizionomia,
Para mi era mi vida i la alma mia.
Mi oyido en sus pasos i mis ojos kansos,
Alegria siento mismo de sonidos falsos.
La luvya kontinua, esto kon dezespero,
La ora komo kedada, inyervozo de espero.
De la kaye se siente un gato ke mauya
No ay otra boz mas ke el bruido de la luvya.
Kedi fin la noche triste, sin pueder dormirme
Abatido sin gozo, sin saver onde irme.
Ya entenditesh, keridos oyentes, ke kon estas tres emisyones ke ize vos ize solo konoser o akodrar a manko de 1% de la tan rika i ermoza poeziya djudiya.
Fue djusto para darvos la gana de meldar i meldar.
I agora de kualo avlarvos oy? El 15 del mes pasado, vide un muy esmovyente dokumentaryo amerikano, de Owen Palmquist i Sharon Petzold, echo en 2014, kijo dizir 70 anyos despues lo ke se paso, kontando una vez mas este diya ekstraordinaryo ke fue el desbarkamyento de los alyados, sovre todo amerikanos, el 6 de Junyo 1944 sovre las playas de Normandiya. Yo, ke vide bastante filmos, meldi bastante artikolos, i me fui a vijitar las playas i los muzeos, pensava konoser la kuestyon, i me apersivi kon este dokumentaryo ke en vedra teniya mas de ambezarme.
Por esto, kuando mis rekodros de este dokumentaryo son dainda bivos, me pensi interesante de kontarvos lo ke me ambezi. Para mi el desbarkamyento, ke es una de la mas grandes batayas de la Istorya, i puede ser la mas grande, es la bataya ke me salvo la vida. Es klaro ke sin la yegada de los amerikanos, ke permityo muestra liberasyon, toda mi famiya i yo, malgrado los djustos ke mos eskondyeron, uvyeramos eskapado por morir, sea de ambre sin paras para merkar komida, sea de los almanes ke mos uvyeron topado.
El dokumentaryo es echo sovre los rekodros de varyos askeres dainda bivyendo en 2014, kontando lo ke izyeron eyos mismos este diya i los diyas ke sigyeron. Son todos amerikanos, sea parashutistas sea askeres de tyerra.
Vos akodro ke, syendo ke los Almanes no reusheron a entrar en Ingletyerra, esta isla servyo de portavyones para la armada amerikana kuando entro en la gerra. Desde Ingletyerra los avyones aliyados bombardaron la Almanya al punto ke le destruyeron su avyasyon. Antes de destruir la avyasyon enemiga, dingun desbarkamyento es posivle, i por esto es ke los Almanes no reusheron a entrar en Ingletyerra: nunka reusheron a destruir la avyasyon ingleza.
Por sus parte, los Almanes, para impedir toda entrada de los alyados en Fransya, konstruyeron la “pared del Atlantiko”, azyendo de las playas de Fransya una kalé djigante, kon bunkers de beton ke dainda se pueden ver, ama tambyen minas, orkas de fyerro, ets.
Los alyados teniyan menester de un puerto para azer venir los ombres, las armas pezgadas i las arabas. Entendyeron ke no era posivle de konkistar un puerto franses egzistante, todos syendo muy byen defendidos por los Almanes, i tuvyeron la idea de fraguar puertos artifisyales sovre las playas. I para sorprender los Almanes, no kaliya ke sepan ke el desbarkamyento se azeriya en Normandiya, i izyeron todo lo ke kaliya para enganyar a los Almanes i azerles pensar ke el desbarkamyento se pasariya en Calais, lo mas serka de la Ingletyerra. Yamaron Fortitude esta operasyon de dezinformasyon ke reusho i izo ke Hitler i Rommel pensaron ke el desbarkamyento era una operasyon de diversyon, i ke el haliz desbarkamyento seriya un poko mas tadre en Calais. I Hitler guadro munchas semanas lo mas godro de las armadas almanas en Calais, sin embiyar a Von Rundstedt el ayudo ke demandava.
El plano es de desbarkar 150.000 askeres (kon los ke vendran despues, van a ser unos tres milyones en todo) a la demanyana del 6 de junyo sovre sinko playas en djuntos, espartidas entre St-Martin de Varreville al oeste, i Ouistrehalm al este, lo todo reprezentando mas de setenta kilometros. Los alyados aviyan dado nombres espesyales a las playas : Utah, al oeste, atakada por los Amerikanos, komo Omaha al sentro, de 6 kilometros de largura, despues Gold, atakada por los Inglezes, despues Juno (Canadyanos i Inglezes) i al este Sword, atakada por los Inglezes, i los fransezes en Ouistreham.
En el dokumentaryo ke vide a la televizyon el 15 de fevrero, komo vos dishe, aviya los testimonyos de askeres amerikanos, veteranos de Omaha beach, i syertos parashutistas.
Ya saviya ke la bataya de Omaha beach fue muy sangriente i yuch, ama no saviya a ke punto.
Oy no vos vo avlar de las 4 otras playas, solo de Omaha, ke era al sentro del plano de desbarkamyento. Si los amerikanos no puediyan desbarkar en Omaha, kedava un burrako muy largo entre Utah i Gold i una grande difikultad para los alyados de aunirsen frente a los Almanes.
Omaha era el echo del jeneral Bradley. El plano era el sigyente: ayegar kon los vapores a las tres de la demanyana, i empesar una kanonada para destruir los bunkeres almanes; despues, embiyar a los avyones para bombardar a estos mismos bunkeres. Enfin, embiyar de los vapores tankes podyendo sözde flotar sovre la mar: aviyan sido aprovados en Ingletyerra i aviyan flotado.
I solo despues los askeres, todos amerikanos, teniyan de desbarkar lo mas serka posivle de la playa.
Ama, malorozamente, nada se paso asigun el plano. Kale dizir, por empesar, ke la mar era muy meneada. Por esto, el desbarkamyento, ke deviya azerse el 5 de junyo, aviya sido arrepushado de 24 oras. Ama, por munchas razones, no fue posivle de arrepusharlo mas, afillu si el diya despues, 6 de junyo, la mar kedava muy meneada.
Los vapores ke deviyan kanonear a los bunkeres almanes no se atrivyeron a aserkarse de la playa, por espanto a la vez de las minas i de la mar basha, i la kanonada, echa de leshos, fue un fyasko. Los obuses kayeron en la mar sin tokar a los Almanes.
A la kontra, los avyones, ke vinyeron a bombardar de noche las pozisyones almanas, de espanto de tokar o los vapores amerikanos, echaron las bombas en los kampos detras de los Almanes, matando puede ser a unas kuantas gayinas, i nada mas.
En kuanto a los tankes, salidos de los vapores, kayeron al fondo de la mar meneada, sin flotar. Solo dos ayegaron a la playa. El uno fue pishin destruido por los Almanes, un solo kedo.
I los desmazalados askeres amerikanos tuvyeron de echarse de las barkas en esta mar meneada sin ke los Almanes fueran aflakados. A la kontra, eran muncho mas numerozos ke lo asperavan los Amerikanos asigun falsas notisyas. Byen eskondidos detras de sus bunkeres de beton kon kanones i mitrayadoras, los Almanes puediyan travar muy kolay sovre los askeres amerikanos, ke eyos, apezgados por todo lo ke teniyan de tashirear en la mar meneada, eran okupados a solo aprovar de korrer en la mar kon los Almanes ke les travavan ensima sin ke eyos puedan responder. Munchos se aogaron en la mar antes mismo de resivir kualkyer kurshum. Los otros, ke deviyan korrer, puediyan solo kaminar avagar asta ayegar a la safra de la playa. I por siguro era muy kolay para los Almanes de mitrayarlos. Los ke abasharon los primeros fueron destruidos a 95 %. Todos los testimonyos kontan ke la mar era kolorada de sangre. I una vez ayegados a la playa, kaliya korrer en medyo de las minas i otros obstakolos.
Por esto es ke despues Omaha fue yamada por los Amerikanos “Bloody Omaha”, Omaha la sangriente. Solo este diya, 3.000 Amerikanos, de bendicha memorya, muryeron aya.
Entre los muertos uvo los ke deviyan avlar kon radyo para dar haberes al jeneral Bradley ke se topava en su vapor a 20 kilometros de la playa i no veiya nada. De tal manera ke el kapo de Omaha no puediya saver lo ke se estava pasando. Kuando enfin supo ke sus askeres eran muertos i no aviyan reushido nada, penso esvachearse. Ama esto era una desizyon muy difisil de tomar, porke deshava los de Utah i de Gold sin pueder aunirsen, i arrizikava de batirear el desbarkamyento entero.
Al kavo Bradley dechido de aserkar los vapores i de kanonear de muevo las pozisyones almanas, lo ke izyeron, i grasyas a este ayudo los Amerikanos reusheron a desbarkar, i a la tadre la playa i sus defensas kayeron entre las manos de los Amerikanos.
En mismo tyempo ke los desmazalados askeres de Omaha beach moriyan por syenes i miles, los parashutistas echados sovre la Normandiya para tomar los puentes i los kaminos ayegaron en basho a mas de 20 kilometros de ande teniyan de toparsen, al punto ke sus kartas no davan el lugar ande se topavan i no saviyan ande estavan.
Yene reusheron a tomar de los Almanes un puente ke aziya parte de sus objektivos, ama una vez el puente en sus manos, ke azer sin el ayudo de los otros, ke no ayegavan? Eyos, los parashutistas, teniyan armas muy livyanas, i na ke una armada de tankes almanes vino para rekovrar el puente. Al kavo los parashutistas, kon sus armas livyanas frente a los tankes almanes, reusheron a guadrar la mitad del puente myentres ke los Almanes teniyan la otra mitad.
Entremyentres los Rangers amerikanos teniyan de suvir a una punta yamada Pointe du Hoc, ande, asigun las notisyas de los Amerikanos, se topavan sesh kanones almanes muy pezgados i poderozos, ke puediyan azer grande danyo a los vapores amerikanos. Era grande menester de destruirlos desdel empesijo.
Los rangers ograshean i alkansan asta los kanones. I kualo ven? Los kanones no estan mas aya! Los Almanes los tomaron sin ke los Amerikanos lo sepan, i se los yevaron no se save ande. Kale toparlos i destruirlos. Ama ande estan estos maldichos kanones?
Los Rangers amerikanos bushkan i no topan. Ama dos de entre eyos kaminando solos en medyo de tyerras dainda okupadas por los Almanes, eskapan por toparlos. Los kanones son en djuntos i dingun Alman se topa al lado para guadrarlos, tanto estan siguros ke no ay Amerikanos ande estan. No es ke no ay Almanes, ama se topan a unos trenta metros de los kanones. Los dos Rangers aprovechan esta okazyon para meter a eskondidas sus granadas de basho de los kanones sin ke los Almanes los vean, i korrer para eskonderse kuando patladean las granadas. Ansina fueron destruidos por dos ombres solos los kanones almanes ultrapoderozos… Esta istorya, yo no la konosiya.
La istorya del koraje de estos todos askeres amerikanos venidos de tan leshos para afrentar la armada de los asasinos almanes, i ansina liberar la Fransya en jeneral i mi famiya en partikolar merese de ser kontada a kada vez. Es vedra ke yo fui liberado por los rezistantes fransezes, ama es siguro ke sin la venida de las armadas alyadas por el norte i por el sur, nunka los rezistantes fransezes uvyeran podido arrondjar a la armada almana.
Mi vida entera me akodraré la demanyana del 6 de junyo 1944, kuando Mme Carayol, la mujer kristyana ande yo morava, vino a espertarme en mi kama (ande yo durmiya de basho de un hach este boy) i me disho: “Enfin! Los Amerikanos an desbarkado!” Este haber, todos lo asperavamos desde mezes i mezes.
Por siguro, la bataya no se eskapo a la tadre de este diya. Munchos ombres kayeron en los diyas, las semanas i los mezes ke sigyeron. I no solo askeres. La povlasyon franseza de Normandiya pedryo unos 50.000 muertos en los bombardamyentos. Ama este diya del 6 de junyo todos entendimos ke los Almanes, ke ya eran byen aharvados en Rusiya, esta vez por siguro ivan a pedrer esta maldicha gerra.
Astal djueves ke vyene, si kyere el Dyo!
Artículos Relacionados: