El rey Shelomo, ke konosia la lengua de los animales tambien, uno de los dias, pasenadose en las guertas del palasio, se apersivio del buey ke estava tornando de su duro lavoro en los kampos. Estava muy kansado siendo ke duvo lavorar solo porke, en akel dia el azno estava hazino i avia kedado en la estable. “Na” le disho el rey. “aki tienes un monton de paja, kome i artate!”
“Komo estas”, oyo el rey Shelomo al azno demandar al buey. “No demandes” le respondio el, “mi vida no es vida!! Esto lavorando en los kampos de la demanyana asta la tadre, sin tener ni un minuto de repozo!!”
“Oye mi konsejo – le disho el azno – espandite enbasho i no komas ni un bokado de la paja para ke muestro patron se kreyga ke estas hazino. “Esto es lo ke yo ize yo la semana pasada, i ansina kedi aki, me arepozi i no sali a lavorar en los kampos.”
Este konsejo del azno plazio tanto al buey ke el no komio de la paja ke tenia a su lado. A media noche se alevanto el azno komo la paja suya i la del buey.
El rey Shelomo ke vido esta echa del azno, yamo a uno de sus mosos i le disho “El buey esta hazino i no puede salir a lavorar en los kampos, toma al azno en su lguar, ke lavore por el buey tambien.”
El moso se yevo al azno a los kampos i lo izo penar asta ke mas ya no tuvo la fuersa de estar en piez de tanta kanseria.
Oras de tadre, el rey Shelomo oyo al buey demandar al azno “Komo estas?” “Mijor ke no demandes” le respondio el, “oyi ke si el buey no se va sanar asta amanyana, lo van a degoyar i van a komer su karne!”
El buey ke oyo esto, salto de su lugar i se komia toda la paja ke tenia delantre de el.
Al rey Shelomo le salto la riza, kuando vido la hohma del azno i la manera de la kuala el supo enganyar al buey.
*Azno batal provecho para mal
*Azno kayado por savio kontado
*Aspera azno a la yerva mueva
Artículos Relacionados: