En el 2005 Selim Salti tuvo la inisiativa de fondar un foro ke tuviera komo buto prinsipal la konservasion del ladino komo lingua avlada. Su idea fue de azerlo asemejar a los salones kulturales ke tuvieron lugar en Fransia en los siglos XVII i XVIII. Despues de una konsultasion entre Selim Salti, Besim Kohen i yo, dechizimos de fondar el Salon del Ladino en la sede de la Itahdut Yotsey Turkia, ke mos dio jentilmente el lugar, kada primer lunes de kada mez.
El 18.3.2005 la letra sigiente fue adresada a los miembros potensiales del Salon, para eksplikar los butos del Salon mizmo:
“Kerido Amigo/a,
Es kon grande kudiado enverso de muestra kerida lingua ke dechizimos de fondar un salon de estudiozos, tomando el exemplo de la istoria de otras linguas.
En este salon se avlara solo en ladino, se trokaran ideas, se meldaran ovras antikas i modernas i se trataran kestiones konsernantes la lingua, en una atmosfera de amistad i komprension resiproka.
Este salon podra azerse en el futuro una emportante instansia para ken kerera un apoyo para su lavoro literario i linguistiko.
Planeamos un numero de serka 30 partisipantes, ke se enkontraran una vez al mez en el lugar ke sera deskojido de vez en vez.
Mos adresamos a ti, para ke agas parte de este salon, porke savemos ke el mizmo kudiado esta en ti también. Estamos siguros ke tu partisipasion va kontribuir grandemente a alkansar los butos ke mos propozamos, i va a enrikeser el salon mizmo.
Te rogamos de responder en too modo a esta letra, esperando ke tu repuesta sea pozitiva…
Kon muestros mas kordiales saludos,
Los promotores: Selim Salti, Matilda Koen-Sarano, Besim Kohen”
En prinsipio fueron deskojidos komo miembros los mas sovresalientes
sponentes del kampo del ladino en Israel, ma despues de poko tiempo el Salon fue avierto a munchos otros partisipantes ke demandaron de entrar. La kondision era ke supieran avlar la lingua, i ke dieran a lo manko una vez al anyo una konferensia en ladino.
Esto espanto a algunos partisipantes, ma se vido ke sus temor no era fondado. Komo de fakto en kada enkontro avlaron asta agora dos relatores por 20 minutos kada uno, kon 10 minutos dedikados a las demandas i repuestas. Ansi ke en el Salon se avlo en estos 4 anyos de sujetos muy enteresates i variados, komo los korsaros djudios, la famiya Camondo, el Kol Nidre, la sivdad de Estambol, los esuenyos, el Keren Kayemet le-Israel, un Djusto de las Nasiones, los karties de Yerushalayim i de Tel-Aviv ke eran puevlados de sefaradis, i no mankaron la medisina, los kuentos populares, los rekordos personales i familiares i mas….
Entre las dos avlas se degustan los rikos tratamientos aprontados por las sinyoras Mimi Salti i Zizi Kohen, a las kualas se adjuntan de vez en kuando otros partisipantes kon kozas ke “komio el rey i le dio a la reyna”, de la kuzina de muestros padres.
El moderator es Besim Kohen, mientres ke Selim Salti da siempre el tono al enkontro. Una vez al anyo, para terminar la sezon, el enkontro tiene lugar en Yerushalayim. Endimentikable fue el enkontro ke tuvo lugar en la kaza de Eli Matitiahu, kon la partisipasion de la kantante Betty Klein.
El Salon tuvo i tiene de vez en kuando musafires de Israel i del estranjero. Akodraremos a Rachel Bortnick de Dallas, promotora i moderadora de la Ladinokomunita, a la prof. Gloria J. Ascher, ke tiene 3 klasas de ladino en la Tufts University (U.S.A.), i otros mas.
El Salon del Ladino ya tiene una tala nombradia ke i en otros lugares en Israel fueron fondados semejantes salones. Esto trae onor a muestro Salon i mos alegra grandemente.
Grasias a Selim, a Besim, a sus mujeres i a todos los miembros del Salon del Ladino.
Artículos Relacionados: