Lilly Wolf tiene unos rekuerdos buenos de su chikez, biviendo en un apartamento grande, arriva de una tienda en “Sudeten/Alemania. Oyia a sus parientes jugar el piano kon su ermano mas mansevo “Fredi”. Pero en 1936 se introdusieron las leyes ke forsaron a la firma ande lavorava su padre, de echar afuera a todos los empleados Judios. Asi fue ke la famiya fue dispersada. Embiaron a Lilly a Bratislava kon sus avuelos i después a Budapest para unirse kon la madre. Komo bivir en Budapest les venia karo, metieron a la ija en una eskola afuera de Budapest. El padre nasido en Vienna no avía renovado su sivdadania Austriaka i tampoko avía echo la demanda de ser Hungaro. En 1938 se fue a Béljika ke era el solo país preparado a resivirlo. La famiya korrespondía kon el en letras i el les embiava de ves en kuando moneda. Al fin en 1942 las letras fueron tornadas atrás. Una kosa ke se pasava en el tiempo era ke a los Judios los yevavan a los Kampos de Konsentrasion. Por esta razón pensaron ke el padre estava muerto.
La madre estava devastada i esta situasión afektó su salud i se murió en 1943 a la edad de 36 anyos. Lilly i Fredi eran agora orfelinos sin estado i tenian ke reportar al offisio del governo kon sus papeles una vez kada mes. En 1944 “Heinrich Himmler” estava en karga del “Problem Judio” en la Hungaria. Todos los residentes Judios de la Kompanyia fueron embiados a Auschwitz i a los de Budapest los metieron en Kampos de Lavoro. Después de un mes se anunsió ke todos los Judios entre 16 i 60 anios tenían ke ser asemblados en el Sitio de Deportes. Les disheron ke ivan a marchar. A ke destino? No se savia. En la primera noche, 250 personas durmieron en el suelo en una fabrika abandonada. La marcha kontinuo i esta ves durmieron en el suelo de las fermas, sin lecho i komida. Tuvieron ke arrankar los raízes de zanahoria i patatas de la tierra fría. La tia de Lilly “Irmus” komo tenia talones altos en sus sapatos, tuvo sangre en los pies al treser día. El SS forsava a todos a kaminar i si no puedian, los matavan. Un Fermero tuvo piedad i eskondió la tia i a Lilly en su kasa i después las metio en un treno para ke se tornen atrás a Budapest. Les avía dado la Karta de Identidad de su mujer.
Despues de 5 dias sin komer I bever los sovrebivientes yegaron al Kazal de GONDU. Un soldado los miro i seleksiono a los mas joven i flakos para embiarlos atrás a la aivdad. 30 de eyos se fueron a Budapest i 5 días después Lilly se metio a bushkar a su ermano Fredi en el Getto Judio. En 24 Disiembre 1944 “Raoul Wallenberg” entro en el getto i tomo unos kuantos Judios a las Kasas de Proteksión. Kon todo el bombardeo i los soldados Alemanes kaminando por las kayes se sentían mas en seguro en el getto. Ademas ninguno avlava el Aleman i Lilly tuvo ke tradusir del Aleman al Hungaro. Asi se fue eya kon Wallenberg a un lugar mas seguro, sin tener los papeles ofisiales. Un dia sonaron las sirenas i se oyeron las bombas kayendo. Lilly estava separada de su grupo. Eya no tenia konfiansa en los soldados Rusos.
En 14 Enero vido a los primeros soldados Rusos. Los Judios estavan alegres i kontentes. Ma, una kosa inesperada se paso i 3 soldados Rusos la violaron i la desharon abandonada en un apartamento ke fue bombardeado. Kamino por 2 días i se fue al getto por detrás de la Armada Rusa. Topo ayí a Irmus, a su prima “Elsa i a su avuela. Se bezaron i abrasaron. A Fredi lo topo en un almazen. El Geto estava yeno de muertos i avían enfermedades komo Tifus. Avian piojos i suziedades. Ella venia de atrapar la Gonoria. Komo no tenían nada para komer se vido forsada a romper las vitrinas i rovar unos alimentos. Después eya kon Irmus se fueron a la Kompanyia para trokar sus joyas i vestidos kontra patatas i aroz.
Al fin de 1945 el tio de Lilly “Sandor” topo la famiya a través La Kruz Kolorada. Los invito a venir a la Australia. Lo akseptaron de korasón i kerian irsen lo mas leshos possible de la Europa.Sandor les embío paketos de alimentos i ke faltava en Europa. Vinieron a la Australia en 1947.
Oy después de 70 anyos Lilly tiene 2 ijas, 4 inietos i un messaje a dar a la Komunidad Judía “Pensar de manera positiva i no pasar el tiempo, pensando al pasado. Ser jentil entre uno i el otro”
Trezladado por Simon Geron
Sydney
Fuente: Ladinokomunita
Artículos Relacionados: