Las Sufriensas de Iyov
Iyov era un morador riko del payis konosido en tanto ke Uz en la Biblia. Tenia syete ijos i tres ijas. Uzava a ofrisir olokostos al Dio para ke sus kreaturas sean purifiadas de todo modo de ideas malas ke puedian tener en sus korasones.
Portanto, el Diavlo diskutyo kon el Dio, menteniendo ke una persona tan rika no puedia ser dezenteresada, i demando ke Iyov sea deprivado de todo lo bueno ke tenia para aprovar su fidelidad. Entonses, izo peryer a Iyov, en un diya, toda su rikeza, i sus ijos i sus ijas.
A este dezastro, Iyov lo oyo de los mesajeros. En esto, Iyov performo los aktos en uzo del dolyo, portanto, no kito de su boka, ni un byervo kontra el Dio. Al kontrario, se eksprimio kon estos byervos:
“Dezmudo vine de la matris de mis madres / I, dezmudo va partir / El Dio dyo, i el Dio tomo / Ke su Nombre sea bendicho”.
Esta ves, el Diavlo pretendio ke la prova verdadera de la kreyensya es la sufriensya del puerpo. Kon la permision del Dio, aharvo a Iyov en kontraktandole de su kavesa fin’a sus pyezes, una inflamasion tan terible, ke Iyov devia araskarse en fregando su puerpo en la tierra.
Ma, de muevo, Iyov no kito dingun kesho de su boka. Al kontrario, kuando su mujer se eksklamo ke el Dio aprovo su fidelidad de una manera tan kruela, Iyov le respondio:
“Estas avlando komo una mujer basha!I Puedemos akseptar del Dio solo lo bueno, i refuzar lo negro?”
Iyov tenia tres amigos sinseros en diferentes payizes: Elifaz el Temani, Bildad el Shuniti i Zofar el Naamatiti. Estos amigos kuando supieron las desgrasyas ke avian afitado a Iyov, vinieron ande el para konsolarlo.
Iyov, despues de aver terminado los syete diyas de dolio, se lamento amargamente kontra el nonsensyo de azer naser a las personas, destinadas a yevar tan pena, i ke en estas sirkonstensyas se puede dezear solo la muerte.
Los amigos de Iyov miraron de sulajarlo. “Todo finira bueno,” ekspliko Elifaz, “porke Iyov es una persona djusta, i solo la persona malisiyoza finise de una manera negra”. Elifaz adjusto: “Dinguno no es perfekto, en vezes una persona buena es kastigada para su propria provecha. Portanto, si Iyov se abolta al Dio kon remorso, i atakana a los yerros ke izo, es absolutamente seguro ke arivara a un estado muncho mas briyante ke antes”. Bildad i Zofar se adjuntaron a Elifaz. Sus amigos afirmaron kon konfiensa ke, en serka, kuando Iyov sera en paz kon el Dio, el Dio lo restorara a una alegria ke nunka tenia konosido.
Portanto Iyov no fue d’akordo kon sus amigos i les respondio ke el Dio no kale ke sea tan duro por una persona komo Iyov, ke sus anyos son tan kurtos, i kualkere ke sean sus pekados, estos pekados no reprezentan un menaso al Dio, i enfin el mizmo, es la ovra del Dio. Akuzo a sus amigos de ser sin piadad, i deklaro ke no son kompetentes para djuzgar su kavzo.
En supito, un kuatren vijitor, ke no es mensionado de antes, parese. Se ajisa de Elihu, una persona manseva, ke avia segido la konversasion entre Iyov i sus amigos. Elihu, konstatando ke los amigos de Iyov avian faltado de responder a Iyov de una manera bastante kovensante konsernando la fey en Dio, deside de intervenir.
Elihu eksplika ke la savidura no depende de la edad, ma ke es un virtud ke apartiene a la persona misma. Se adresa kon estos biervos a Iyov:
“Estas pretendiendo ke sos djusto i ke un Dio tirano refuza de oyirte. Lo mas, el Dio no komunika kon las personas. Portanto, no puedes niegar ke por el entremedio de shuenyos o de hazinuras, transmete su mesaje, i si la persona se komporta konformamente a El, su vida sera eparniada“.
En la ultima parte de la leyenda, el Dio se adresa a Iyov a traverso una tempesta:
“No egzistias mismo kuando el mundo fue kreado, i no vites mismo una fraksion de esto… Piadad por el mundo si el amanaser i la obskuridad dependerian de ti… ”
A la fin Iyov es tanto atristado i sufriendo ke avla ansina al Dio:
“En efekto, so una persona mizerable. Kualo puedo respoderte!”
Sovre esto, el Dio satisfecho rende a Iyov su salud i su rikeza, i le da una mueva famiya.
* * *
Al pareser, el Livro de Iyov parese terminarse de una manera oroza. Portanto, no es klaro si las kreaturas ke le nasen son de su mujer, ke avia maldizido o de una segunda mujer. De mismo ke no se puede realizar si sus muevas kreaturas puederan tomar el lugar de sus kreaturas ke el Diavlo avia provokado sus disparision.
El Livro de Iyov fue konsiderado en tanto ke una ovra illustra de literatura i de saviduria de todos los tiempos. Asigun su lision, aunke todas las mizerias ke le puederen afitar, la persona deve ser fidelo al Dio, sin aspirar a una eksplikasion. Porke el Dio no puede ser konosido, i al umano no es permitido de djuzgarlo.
De este punto de vista, el Livro de Iyov sulevanta la kestion universala i eternela de la djustisia divina.
Artículos Relacionados: