“Antolojía de Kuentos Sefaradíes”
Kuentos traskritos por Liliana Tchukran de Benveniste del livro “Antologia de Cuentos Sefaradíes” de Pascual Pascual Recuero, 1979
———————————————————–
7. LA MUCHACHA DEL POZO
Kuento traskrito por Liliana Tchukran de Benveniste del livro “Antoloja de Kuentos Sefaradíes” de Pascual Pascual Recuero, 1979 – Kapítulo I: Kuentos de Kulli
– – – – – – – – – – –
Una muchacha se kayo en un pozo kuando keria ir en kaza de su padre. Se aparó un mansevo en la boka del poso, diziendo:
– Si me aprometes de kazarte kon mi, aré modo de sakarte.
Disho eya:
– Muy bueno.
I la sako del pozo, i djuraron los dos ke el no tome otra mujer ni eya se kaze kon otro, I disheron:
– Dunke no tenemos testigos, ma este pozo i esta nifisa (1) ke va kaminando sean nuestros testigos.
I se fue kada uno a su kamino. Eya mantuvo a su djuramento; ma el se fue a otra sivdad i se kazo kon otra, i el primer ijo bohor ke le nasio los mordio una nifisa (1) i lo mato. El sigundo ijo, siendo grandeziko, se kayo adientro de un pozo i se murio. Se kesho la mujerkon el diziendo:
– ¿Ke es la razon ke nos mueren los ijos de ekstranya muerte? Sierto ke algun pekado mo lo kavza.
Entonses se akodró dicho kuento i le konto a su mujer todo lo akontesido, eya le disho:
– Siendo ke tienes promesa de tomarla, deves de de azerlo, i no me konviene tenervos de marido.
I tanto izo, asta ke le dio su get (2), i se fue a la sivdad de esta muchacha i se kazo kon eya.
(1) Comadreja (castellano)
(2) Divorsio
——————————————–
Kuento de la tradisión literaria djudía, arekojido por Kulli (folio 187 c-d p.859), para eksplikar las palavras ke Laban disho a Iakov: “Este monton es oy testigo entre ti i mi” (Gn 37-48) ke servira despues a Isaac Argueti en su komentario al Deuteronomio para el M.L. (6° edision, Esmirna 1873, folio 204 c-d) para ambezar a kumplir la palavra dada, dunke el testigo ke se meta sea una koza o animal.
—————————————–
Kuento trezladado de la notasión fonetika a la notasion AY (Aki Yerushalayim) por Liliana Benveniste del livro “Antología de Cuentos Sefaradíes” de Pascual Pascual Recuero, 1979 – Kapítulo I: Kuentos de Kulli
Artículos Relacionados: