Del livro: Los Sefardíes de Jose M. Estrugo Paj. 73-74.
…Por las kayes de la djuderia vendian el “Pan d’Espanya” (ke ansi tambien los yamavan los turkos i los gregos) ke es pan esponjado a baza de guevos i asukar. Rekuerdo el pinyonate ke es igual ke el de Espanya. Las “revanadas de parida” ke en Toledo davan a las paridas, son “torrijas” (pan frito untado en la leche i guevo) ni mas ni menos, i aunke las yaman de “parida”, las kome todo el mundo. Los “travados” untados kon miel o asukar son los “pestinyos” de Andalucia. Los “mustachudos” son tambien los “mostachones” andaluses i se elaboran kon los mizmos ingredientes. Ay pastelikos de ojaldre, “kezadikas” de kezo i guevo, empanadas de pishkado, komo las de Madrid, ansi ke empanadas de arroz kon guevo i de karne pikada. Para merendar komian un “kantariko de azeyte” ke en Aragon lo yaman “canterico” i en Andalucia “joyo”, ke es un kantariko de pan al kual le kitavan la miga inchendolo de azeyte de oliva i adjustandole sal o asukar, segun el gusto. Los “mogados” ke en Espanya se yamavan “nuegados” en tiempo de Covarrubias*, i ke en el diksionario de 1610 es deskrito komo “golosina ke se aze kon miel i muezes”, se konfeksionan kon miel i susam, de mizmo ke en Valencia. La “pepitada” es un djenero de “horchata” (bevienda a baza de almendras)ke save igual ke la de chufas. Se aze kon la karne de la pipita de melon i tiene una kolor blanka ke akodra la leche. Esta es una bevida muy popular i arefreskante ke fue mizmo adoptada por los turkos i los gregos (los djudios bevian la pipitada para kortar tanit, a la salida de Kipur). Sus “boyos” de espinaka, acelgas (ojas de pazi), de kalavasikas i de “handrajo” son paresidos a los ke komi en Alcala de Guardaira. Los “bimuelos” kon arope, son simplemente bunyuelos. Sus biskochadas son las “biscotadas” de Valencia. Tambien tienen biskochos. Yaman masapan al “pazapan” de Toledo i lo azen kon los mizmos ingredientes. Los dulses son muy variados: de sharope, de almastiga kon asukar i almendra, de kayisi (albaricoque), de igos, de narandja amarga, de bimbriyo, de sidra, de kalavasa, i mas. I yaman “alegria” a una espesie de “jalea” (dulse kaldudo a baza de frutas) , elaborado kon todo modo de sumos de fruta freska, kon un apetitozo kolor rozado i kon adornos de semiyas de ajonjoli (susam).Entre los “guajiros” kubanos ay algo paresido ke tambien yaman “alegria”.
El kezo mas famozo en el Oriente Proksimo es el “kashkaval”, paresido al kezo manchego seco i azeitozo ke trusheron los sefaradis, i ke se yamava “Qeijo Cavallo”. De ayi su nombre “kashkaval”. Es muy popular entre los turkos, bulgaros i gregos.
Artículos Relacionados: