Diario Judío México- LA EMIGRASYON SEFARADI III
SALONIKA – TURKIYA – EGYPTO – CONGO
En los Judyos de estos payizes el Judaizmo no es observado a la letra i se ve poka partisipasyon en la vida de la Komunitad…. Frekuentan sus sinagogas ma parese ke no se interesan muncho a las otras aktivitades. Se ven lo mas en las sinagogas en los Diyas de Fiestas. Lo mas en Rosh Hashana i en Yom Kipur kontribuan kon donos para mantener el ekilibro finansial de la kongregasyon .
EL NORTE DE AFRIKA
Empesando de los anyos 1980 i adelante, la emigrasyon de los Judyos del Norte de Afrika i del Marok sovre todo, da una mueva orientasyon a las komunitades. De “Espanyoles” se azen “Arabofones”. Se veran tambien la yegada de bastante Judyos Libanezos, Siriyanos i Iranianos dospues de la kayida del Shah de Iran….
LOS SEFARADIM OY EN DIYA
El Sefaradi es la persona ke aze partido de la rama Espanyola del puevlo Judyo, kere dizir del Judaizmo del entorno Mediterraneo i ekstendido al Judaizmo oriental.
“… Los egzilados de Yerushalayim ke se topan en Sefarad vana okupar las sivdades del Neguev ”
Es en el Verseto 20 del Livro de Ovadya, el kuatren de los Profetos menores (Su livro es el mas kurto de la Biblia) ke se enkuentra por la primera vez el nombre de Sefarad…
Margolis i Marx (Historia del Puevlo Judyo) indikan ke Ovadya aze aluzyon a la sivdad de Sardes en Lydia (Asia Minor – Anatolia/ Turkia oy en diya) alora ke St. Thomas d’Aquin (1223-1274) lo identifika al Bosforo (Istanbul/Turkia). Maimonides, el Rambam (1135-1204) se auna a la tesis de Ovadya sovre los egzilados en afirmando ke los Sefaradim son los desendyentes de los “Hierosolymitanos” (Es ansina ke se nombravan los Yerushalmites) ke se aviyan fuyido de la sivdad kuando afito la dezgrasya de la abolisyon del segundo Templo por Titos en el anyo 70 de la Era komun….
El famozo historyano Cecil Roth esta de avizo ke Sefarad se topa en Aspamia – Asia Minor…..
Del empesijo de la Edad Medya, Sefarad es sinonimo de Espanya i de Portugal. Los Sefaradim son los desendyentes de los Judyos ke fueron ekspulsados de Espanya el 31 de Augusto 1492 por los Reyes Katolikos Ferdinand de Aragon i Isabella de Kastilya ke aviyan appozado sus signaturas sovre el infamo Edito de Ekspulsyon, el 31 de Marzo 1492.
En todos los tiempos i en todo modo de lugar, siguiendo el egzemplo de Maimonides ke no vasiyava de eskrivir “Ha Sefaradi” dospues de apozar su signatura, los Sefaradis se konsideran komo los desendyentes del Rey David i la aristokrasiya del puevlo Judyo. Conrad Franco, el Prezidente de la Komunitad Israelita Sefaradi de Bruksel aviya dicho a su remplasante Maurice Renous : “Nunka te lo olvides ke kada Sefaradi es un prince !”
EL ritual de los Sefaradim asemeja muncho a el de sus ermanos los Ashkenazim. La diferensya es la prononsiasyon del Hebreo (el “A” sefaradi ke se pronunsya komo “E” o “O” ande los Ashkenazim, el “T” ke se melda “TH”). “Shabat” se pronunsya “Shabes” o “Shabos” i “Amen” lo pronunsiaran “Omen”…. Una otra diferensya es el kanto de un piyut (poeziya relijyoza) en el “mahzor” (el livro de las Orasyones), i unas kuantas linyas de mas en una elegia….
Dos grandes Komunitades Judeo-Espanyolas organizadas egzisten dayinda oy en diya… La de Turkia kon unos 20 000 Judyos -en Istanbul prensipalmente- i la de Israel. Kale presizar ke el Judeo-Espanyol no se avla komo la primera lingua de kaza en estas dos komunitades komo antes unos anyos…. Los mansevos la pratikan de manko en manko…. En los otros payizes de la Diaspora el Judeo-Espanyol se avla solo por los aedados i mizmo en este kavzo no de manera fluente. En Paris, la gente se akodran del d’alkavo restaurante judeo-Espanyol, del d’alkavo rabino Judeo-Espanyol, del d’alkavo kafe ets…. El Yiddish, la futura lingua muerta, se avla muncho mas… Kon todo esto, no se puede meter fin tan presto a este paragrafo !. En los empesijos de 1970 se toma konsiensya ke la lingua estava para dezapareser i la gente tomaron supito intereso a esta kultura ke egziste des de miles de anyos ! El-Judeo Espanyol se empeso a estudyar en la Universitad kon Haim Vidal Sephiha. Se formaron grupos para re-interpretar las kantikas tradisyonales. Esta kultura se selebra agora en varios festivales…. Bushkadas sovre la kozina Sefaradi, los kuentizikos i los proverbos en Judeo Espanyol fueron echos de manera ekstensiva i kon muncha seryozitad. Munchas publikasyones salyeron a la luz en los anyos 1980 i 1990 para publikar la historya i trayer endjuntos de muevo los Sefaradim. Se avriyeron kursos de Judeo-Espanyol, i se organizo lugares para ambezarse i pratikar la lingua. El Internet kontribua intensivamente i ay munchos sityos ke son dedikados al Judeo Espanyol.
Munchos livros en esta lingua puedyeron ser publikados grasias al suporto de la Alliance Israelite Universelle i La Lettre Sepharade. El genosidyo de los Sefarfadim ke fue eklipsado por munchos anyos fue divulgado i rekonosido dospues de largas batalyas ! Una plaka de piedra fue plasada en memorya de las viktimas del holokausto a Auschwitz el 24 de Marzo 2003. No es ke mankan inisiativas ma son dispersadas… Trayen endjuntos los ke estan en bushka i se keren akodrar de sus manseves i akeyos ke amariyan topar sus orijines. Les manka un lugar komun.
Los avlantes del Judeo Espanyol kedan marjinales i en la solombra de los dos grandes organizmos komunotaryos del Judaizmo en Fransa : Los Ashkenazim i los Sefaradis del Norte de Afrika, majoritarios dospues de la repatriasyon de los “pieds noirs”. Kon esto, los Sefarades Espanyoles, komo los nombra Elias Canetti i de loskualos aze partido, no pueden asimilarsen ni a los unos ni a los otros. I en kavzo ke el Judeo Espanyol se peryera, el mundo Judyo va peryer una de sus kulturas muy importantes, no solo su lingua, ma su guizado, sus kantikas, la manera de engrandeser sus kreaturas, dar este karinyo tan espesyal a su famiya, su vizyan de la vida ets…
Los primeros a darsen kuento de esta kondisyon fueron los proprios Espanyoles ke des de antes de la Segunda Guerra kijyeron attarsen a sus passado. Los Liberales i los Repuiblikanos Espanyoles fueron los primeros a kalifiar la ekspulsyon de 1492 de “una error trajika” i tejer (tisser) enlases, (liens) kon los dispersados. Des de 1924 los egzilados ke lo dezeyavan, puedyeron obtener pasaportes Espanyoles. Mas kuryozo, Franco en tiempo mizmo de la Guerra, establesyo el “Instituto Arias Montano” dedikado al estudyo de akeyos tiempos tan dramatikos. Diplomatos Espanyoles trataron a sus kuento personal de salvar los Judyos Espanyoles ke puediyan ser deportados. Los Judyos duenyos de un pasaporto Espanyol, muy pokos dayinda a esta epoka, puedyeron yegar a Espanya kon treno de la Gresya debasho de la okupasyon Nazi i salvarsen de estya manera de la Shoa. Komuniutades Judiyas enteras se reformaron.. Agora son unos 20.000 Judyos en Madrid i en Barselona. Prosperaron i se enfuerteseron espesialmente durante los d’alkavo vente anyos kon la asuvida de la demokrasiya en Espanya. Eskriven sovre una oja blanka el Judaizmo de la Iberika, historya ke siempre parese pronta para terminar ma ke sigue su kamino de una manera o de otra…..
(a kontinuar) [email protected]
Artículos Relacionados: