El eskrivano djudio Romano eskrivio en tiempo del Olokosto “No ay mas fatigue en este Mundo de Desastre. Tantas trajedias i luchas i tanto tristeza en la eskuridad.” Estas palavras fueron dichas por “Elie Wiesel” sovrebiviente de Auschwits i Buchenwald en 2009. Mismo en medio de la eskuridad se pudo kriar una luz i partajarla. Unos individuos komo los rabinos “Naftali Stern, Sinaí Adler i Zvi Hirsh Meisels” reusheron a krear una luz en Rosh Ashana.
“Yad Vashem” rekordo en 1944 ke el Rabino Stern nasido en Romania kon su mujer i kriaturas estavan en el Getto “Satu-Mare”. Despues de unas kuantas semanas todos los residentes fueron deportados a Auschwitz i venían a 18.863 personas. A su yegada, el Rabino Stern ke avía servido komo Hazan un tiempo se topó separado de su mujer Bluma i de sus kriaturas “Gittel, Tzvi Hirsh, Moshe i Ariel Yosef” ke eran entre 14 i 6 anyos de edad. No los vido mas después. El tenia 34 anyos, fuerte de konstitusión, lo mandaron a “Wolfsburg” ke era un kampo de lavoro forsado en la Austria. Kon 2000 de otros prizioneros eskavaron túneles, trinchas i búnkeres para los Almanes en retreta. El Rabino pensó sempre a kedarse en vida i al ver ke se aserkavan de Rosh Ashana, kijo organizar un Minyan. Vendio sus rasiones de pan del desayuno por un lápiz i unos sakos de chemento. Aranko los sakos en pedasos i eskrivio el Servisio de Rosh Ashana de su memoria. Despues trusho ayi a los prisoneros kansados para selebrar el Rosh Ashana del anio 5705.
Dekadas después los sovrebivientes ke estavan ayi kon el Rabino Stern avlaron de la impresión ke tuvieron. Asta la fin de la gerra el Rabino Stern eskondio estas pajinas i después de la gerra disho “Izimos nuestras orasiones de Rosh Ashana i el servisio salio bueno, ma yegando al Dia de Kippur no pudimos rezar. Los Almanes los speravan. Eyos avían tolerado el Rosh Ashana i me avían dado mismo una rasión de mas de sopa. El servisio avía durado menos de lo ke se aze en tiempo normal.”
El Rabino Stern supo rekonstruir su vida después de la gerra, izo ALIYA i se asentó en ‘BNEI BARAK” Guadró las pajinas dentro el MAHZOR de la famiya por 43 anyos i kada anio en Rosh Ashana las sitava i ekspandia. Kuando se malograron kon el tiempo las dio a Yad Vashem para preservarlas esperando ke una otra djenerasión será inspirada. Era importante de guadrar el espirito mismo en tiempos tristes. Abrasar la identidad djudia i nunka piedrer la esperansa.
El Rabino “Tzvi Hirsh Meisels” ke avia konfiskado un Shofar a la entrada del kampo de konsentrasión era uno ke nasió en “Prague/Czecoslovakia” en 1928. El Rabino Adler tenia 15 anyos kuando a el i a su familia los transportaron al “Getto de Terezin ” En 1944 los transportaron a Auschwitz. Ayi se topo separado de sus parientes i nunka los vido mas. Siendo mansevo i fuerte le dieron la mission de korrer para fasilitar el kontakto entre las guardias del SS i la guardias de los prisoneros. Se metia en la entrada kuando se avría i kuando se serrava. Komo lavorava bueno el Komandante simpatizo kon el i le permetio de organizar un Servisio de Rosh Ashana. El Rabino “Meisels” de “Veitzin/Hunagaria” fue transportado a Auschwitz i tenia sovre si un Shofar ke las guardias no lo avían visto. En el Primer Dia de Rosh Ashana korrio de un kampo al otro kon el Shofar en la mano chuflando TEKIYOT. Metio su vida en peligro i tuvo ke evitar los Nazistos i los Kapos malevolentes. Grasias al Dio reushio a azerlo 20 vezes.
Kon todo esto el moral avía suvido por lo menos por una ves en aziendo la MITSVAH de Rosh Ashana. Durante este tiempo Adler izo una SUKA i en Hanuka alumbro las kandelas. A la fin de la gerra el Rabino Adler fue embiado a “Mauthausen” en Austria. Ayi pudo observar la Primera Noche de Pesah en resitando pasajes de la Agada de memoria. Los Alemanes puedian azer esklavos de eyos i matarlos. Ma no puedian destruir sus almas i espirito.
Oy somos libres i komo en kada Pesah dizimos “Be Shana Habaa Be Yerushalayim”
Una vez ke el kampo fue liberado en Mayo 1945 el Rabino Adler izo ALIYA i selebro el próximo Pesah en Jerusalem.
Rosh Ashana al raiz representa estar al punto de entrar en un anyo muevo. Se demanda de azer todo para ke el mundo sea un mejor lugar. Puedemos azer una diferensia en las vidas de otros?
72 anyos antes el Rabino Stern kon el Rabino Meisels i Adler estavan entre los bravos ke izieron eksaktamente esto. Fueron la luz en los lugares los mas eskuros en el mundo, dando esperansa a muchos ke no la tenian.
Tradusido por Shimon Geron
Sydney
Fuente: Ladinokomunita
Artículos Relacionados: