Kon la muerte del Rey Shelomo en 928 AE, el trono avia pasado a su ijo, Rehoboam. En akel tiempo, el reynado era konstituado de dos payizes: el payis del Sude, konosido en tanto ke Yuda i povlado por los Trivos de Yuda i Benyamin; el payis del Norte, konosido en tanto ke Israel i povlado por los otros Trivos. Yuda kon Yerushalayim, kapitala del todo el reynado, era basho la dominasion absoluta del Rey. Kuanto a Israel, su submetensia al Rey dependia de un tratato ke el Rey David avia echo kon los diez trivos ke moravan en este payis. I Rehoboam devia de renovelar a este tratato. Entonses, Rehoboam avia arivado a Sh.hem para diskutir este sujeto kon los reprezentantes de Israel.
Asigun el sistemo de taksa ke Shelomo avia impozado, trenta mil ombres rekrutados entre los sivdadinos devian ovrar en lavoros forsados, durante un mez en Levanon i durante, dos mezes en sus payiz. Otros miles devian de lavorar en los minos i en diferentes proyektos de fragua del Rey. Este sistemo estava provokando grandes difikultados por los farmeros ke devian deshar sus lavoro en sus tierras.
Yeroboam
Yeroboam era el lider de Israel en el litijo muevo ke avia esbrochado entre Israel i Yuda. Ainda, durante su renyo, el Rey Shelomo, avia nomado a Yeroboam en tanto komandante en kapo de los ovreros de lavoros forsados.
Un diya ke Yeroboam avia salido de Yerushalayim, el Profeto Ahija lo avia topado en su kamino. Ahija se kito el vistido muevo ke yevava, i lo despedaso en dodje pedasos, i.se adreso a Yeroboam:
“Toma para ti diez pedasos. Porke el Dio de Israel dize: ‘Mira ke esto para despedasar el reynado de la mano de Shelomo, i te vo darte diez trivos, portanto el tiendra un trivo, en respekto a mi servitor David i Yerushalayim, la sivdad ke eskoji de ser en riva de todos los trivos.
Esto, porke Shelomo se olvido de mi, i adoro a los dios de los Sidonianos, Moabites i Amonites, i no se hue en Mi kamino… Va tomar el reynado de sus manos i te vo darte los diez trivos'”. En esto, Yeroboam empeso a komplotar para ser el Rey de los diez trivos, i kuando esto fue deskuvierto, Yeroboam se refujio en Ayifto. Despues de la muerte de Shelomo, los diez trivos de Israel lo yamaron para ke sea sus Rey.
El enkentro en Sh.hem
Asigun fue akodrado mas ariva, Rehoboam, el muevo Rey de Yuda avia vinido a Sh.hem para diskutir sovre la subordinasion de Israel a su reyno. En este enkontro, los reprezentantes de Israel demandaron de Rehoboam:
“Ablanda el lavoro pezgado ke tu padre mos avia impozado, i te vamos servirte“.
Para responder a esta demanda, Rehoboam konsulto en primero a sus konsejeros aedados, ke avian servido su padre Shelomo. Estos le rekomendaron de konsedar a la demanda del puevlo, para ke Israel kontinua a ser parte del reynado. Portanto, Rehoboam prefero el konsejo de de los mansevos kon loskualos se avia engrandesido, de komportarse de una manera dura kontra el puevlo. Es reportado ke el Rey se avia respondido kon estas palavras:
“Va kargar mas el yugo ke mi padre vos metio. Mi padre vos avia kastigado kon el kirbach, kuanto a mi, yo vos kastigara kon skorpiones“.
A esto el puevlo avia ripostado:
“Kualo tenemos mozotros kon David. No tenemos nada kon la erensia de este ijo de Jese. A vuestras tiendas, Ijos de Israel! I vozotros a vuestras kazas, Ijos de David!”
De este modo, Israel eskojo a Yeroboam en tanto ke su Rey.
La nasion ebrea tuvo de esta manera dos reyes: Yeroboam en Israel, el estado del Norte, ke iva tener por kapitala a Samaria; Rehoboam en Yuda, el estado del Sude, kon Yerushalayim su kapitala.
* * *
Rehoboam avia kometido una eror grave en inyorando el konsejo de los savios aedados, i de esta manera provoko la divizion de la nasion. El estado del Sude, Yuda, era povlado por los trivos Yuda i Binyamin.El estado del Norte, Israel – en vezes yamado Efraim – era povlado por diez trivos: Ruben, Shimon, Dan, Naftali, Gad, Asher, Isahar, Zebulun, Yosef (Efraim i Menashe) i un parte de Binyamin.
El Reynado Unido Ebreo avia turado durante el reyno de Shaul, David i Shelomo, de 1020 AE fina 928 AE, durante serko de un siglo.
El reynado del Norte, Israel, turo mas de 200 anyos fina ke fue kompletamente konkistado por los Asirianos serka de 721 AE. Los diez trivos fueron deportados a la Asiria, i son konosidos en tanto ke “Los Diez Trivos Perdidos“. La vasta majoritad de estos nunka aboltaron a sus patria.
Despues de serka de 135 anyos, el estado del Sude, Yuda, fue konkistado por los Babileos. El Beit AMikdash fraguado por Shelomo fue destruido i los Djudios fueron deportados a Babel. Portanto, despues ke Babel kayo en las manos de la Persia los deportados aboltaron a sus payis, i la Nasion Djudiya kontinuo a egzistir.
Artículos Relacionados: