Jabotinsky

Oy pensi de avlarvos de un ombre muy importante en la istorya del syonismo, porke es este ombre ke es a la orijen del partido oy al poder en Israel, kyero avlar de Vladimir Zeev Jabotinsky.

Nase en la sivdad de Odessa, en Ukranya, en 1880, en un tyempo ande la Ukranya aze parte del Imperyo ruso. Su famiya es de la burgeziya, su padre, Yevno,  es merkader de trigo, su madre Hava nasida Zach vyene de Berdichev, otra sivdad de Ukranya, konosida de los djudyos porke es la sivdad del famozo hasid Levi Ytzhok ,de Berdichev, i es konosida tambyen de los ke no son djudyos por ke aya bivyo Evelyne Hanska, la famoza mujer de la vida de Balzac, kon la kuala eskapo por kazarse en 1850, poko tyempo antes de morir a 51 anyos.

El padre de Jabotinsky se muere kuando el chiko Vladimir tyene solo 6 anyos. Su madre lo mete en eskolas rusas, ama en mismo tyempo le aze dar una edukasyon relijyoza, i se ambeza el ebreo, lo ke despues le servira muncho kuando se va azer syonisto.

Muy mansevo, a la edad de 16 anyos, se aze gazetero i lavora para una gazeta rusa de Odessa. Es embiyado por la gazeta en Suisa i Italya komo korespondante. Toma para sus artikolos el nombre de pluma Altalena (el byervo italyano para la meshedera, balançoire en franses, swing en ingles). Deke tomar este nombre no sé, ama este nombre Altalena va salir famozo munchos anyos mas despues, porke va ser tomado para un vapor del Irgun traendo armas en Israel, i batireado por Tsahal el 22 de djunyo 1948, por orden de Ben Gurion. Ama esto es otra istorya…

Jabotinsky aprovecha tambyen ke se topa en Italya para ambezar el derecho. Se interesa al nasyonalismo italyano i tyene grande admirasyon para Garibaldi o el poeta Leopardi.

En el enverano de 1901 abolta en Odessa i lavora para una gazeta rusa, ama despues va editar el mismo gazetas en ruso i ebreo.

Antes mismo del pogrom de Kichenev en 1903 (ama despues de munchos otros) Jabotinsky entra en el movimyento syonisto i muy presto se aze konoser komo un lider. Se va al sejen kongreso syonisto este mismo anyo 1903.Este kongreso es muy importante en la istorya del syonismo, porke es el kongreso ande Herzl, a la vez kansado de ograshear sin obtener nada de dingunos para el rekonisimyento de un derecho nasyonal del puevlo djudyo sovre Erets Israel, i en mismo tyempo entendyendo antes de los otros kuanto urjente es la salvasyon de los djudyos menasados de sekanas terrivles, acheta la propozisyon por los inglezes de un territoryo en Uganda, no en lugar de Tsion, ama antes de ir a Tsion i en asperando. No es entendido, al punto ke su amigo Max Nordau es ferido por un estudyante ruso ke trava sovre el, gritando “Muerte a Nordau el Afrikano!”

Trotsky, ke no se yama dainda Trostsky ama Lev Bronstein, i ke se topa aya, a 24 anyos, komo observador, va eskrivir un artikolo sovre “la fin del syonismo”. I es vedra ke el syonismo es kansado i hazino, komo Herzl el mismo ke va morir el anyo de despues, en 1904, a solo 44 anyos.

Uno de los ke van azer arrebivir el syonismo hazino i kansado va ser el mansevo Jabotinsky kuando mas tadre va fundar la Armada djudiya; ama dainda no estamos en esto. Al empesijo, funda la Organizasyon djudiya de defensa, para defender la povlasyon djudiya kontra los pogromistos. Su idea es: “Mijor tener una arma sin menester ke mesnester de una arma i no tenerla”. Su orden: “Mansevez djudiya, ambezate a travar!” Esta organizasyon va muncho ayudar a los djudyos. No es ke no va aver mas pogromes, ama esta vez va kostar mas i mas a los pogromistos. En 1905, por egzemplo, en el pogrom ke se tuvo en la sivdad de Ekaterinoslav, grasyas a la organizasyon de Jabotinsky, uvo mas muertos en los pogromistos ke en los djudyos.

Ama Jabotinsky, ke agora se aze yamar Zeev en vez de Vladimir, lucha tambyen, esta vez kon su pluma, kontra syertos djudyos: los asimilasyonistos i los del Bund.

En medyo de esta lucha syonista, se kaza en 1907 kon Yohana Galperina, i kon eya tendra un ijo yamado Eri (ke sera un diya deputado en la primera Kneset).

I ayegamos a la primera gerra mundyala. La idea de Jabotinsky no es de kombatir en la armada antisemit rusa kontra los Almanes, ama kontra los Turkos otomanes en una lejyon djudiya djunta a la armada ingleza, kon el eskopo de liberar la Palestina del yugo osmanli por provecho del puevlo djudyo. En 1915, kon su amigo Joseph Trumpeldor, ke pedryo un braso en la armada rusa kontra los Japonezes, se va en Ayifton para ver los Inglezes, ama les responden ke no pueden tomar ajenos en las fuersas kombatantes, solo en fuersas de ayudo, komo por egzemplo tashirear kozas. Jabotinsky no acheta i se va bushkar en otros paizes de Evropa, ama Trumpeldor acheta i funda el Zion Mule Corps ( Puerpo de Mulas de Sion) ande reune unos 600 veluntaryos djudyos en lo ke va ser la primera armada djudiya regular desde 1800 anyos. Ya ize aki una emisyon sovre las armadas djudiyas. Djudyos ke kombatyeron en las armadas de sus paizes uvo syempre, grupos de djudyos defendyendosen komo en Rusiya uvo tambyen, ama aki estamos avlando de armada djudiya regular.

Van a servir en Gallipoli, ande amostran un grande koraje, yevando sus kargas, inkluyendo agua, malgrado el fuego turko, i las feridas: Trumpeldor el mismo resive una bala en la espalda.

El Puerpo de las Mulas de Tsion es disoluto en 1916. Jabotinsky abolta, i kon Trumpeldor i 120 ombres venidos del Puerpo entran en la Seksyon 16 del 20en batalyon del London Regiment.

Enfin, en 1917, los Inglezes achetan de tomar djudyos syonistos en un batalyon djudyo armado, el 38en batalyon de Fuzilyeros Reales. Esta vez Jabotinsky vyene kon djudyos syonistos ke fue a bushkar en todas partes del mundo. Dos muevos batalyones son kreados, el 39en i el 40en. En 1918 son unos 5.000 i Jabotinsky eskrive: ” 34% vyenen de los Estados Unidos, 30% de Palestina, 28% de Ingletyerra, 6% del Canada, 1% de prezoneros de la Armada Ottomana, 1% de Argentina”.

Esta armada djudiya va luchar en 1918 kontra los Turkos al norte de Yerushalayim, en el vaye del Yarden, i eya es ke entra la primera en Transjordaniya. Jabotinsky  eskapa la gerra kon tres medayas ke se pueden ver en el Instituto Jabotinsky en Tel Aviv. Sovre la fotografiya de Jabotinsky se ve ke sovre su kasketa komo sovre su uniforme yeva la menora djudiya, el signo de su batalyon. A basho de la menora esta eskrito en ebreo Kadima (Adelantre!)

Despues de la gerra es desmobilizado, ama keda en Palestina para ambezar a los djudyos komo servirse de armas para rezistir kontra los arabos. En 1920, despues de las rebueltas arabas, los inglezes topan armas ande Jabotinsky i es kondenado a 15 anyos de prezo, ama poko tyempo despues va ser amnistyado.

Jabotinsky entra en 1921 en el konsejo egzekutivo de la Organizasyon Syonista. Aze tambyen parte de los fundadores del Keren Hayesod (Fundo de Fondasyon, ke akoje las paras ke son de menester para fundar un estado djudyo en Palestina, i arrekojer a los imigrantes). Kon el, Chaim Weizmann i Albert Einstein.

En 1923 Jabotinsky se pelea kon Chaïm Weizmann, el Prezidente de la Organizasyon syonista, i en vedra no solo kon el ama kon toda la Organizasyon, i esto por dos razones:

La primera razon, es el fakto ke la Organizasyon a achetado ke el estado djudyo sea solo en la parte de la Palestina al oeste del Yarden, lo ke kyere dizir abandonar a los Inglezes i arabos la Transjordaniya. Nunka Jabotinsky achetara esta separasyon.

La sigunda razon, es ke la Organizasyon no entendyo deke Jabotinsky firmo, a eskondidas de la Organizasyon, un akodro kon el Ataman Petlioura, akuzado de los pogromes ukranyanos, djustamente para krear grupos djudyos de defensa kontra los pogromes.

Jabotinsky se va de la Organizasyon i funda un muevo partido yamado Alyansa de los Sionistos Revizyonistos, kon un movimyento de mansevez yamado Betar, a la vez en rekodro de la ultima bataya de Bar Kohba, i en rekodro de Trumpeldor, kaido en 1920 kon syete otros kompanyeros i kompanyeras en la defensa de la kale de Tel Haï. Trumpeldor era muy de syedra, i en mismo tyempo amigo de lucha kon Jabotinsky, i agora es onrado a la vez por los de syedra komo los de derecha.

La grande idea de Jabotinsky es de fraguar el estado djudyo sovre las dos vandas del Yarden, un estado moderno alyado a los Inglezes i ayudado por eyos. Era a la vez un nasyonalisto i un demokrato liberal. El no es partezano de un governo autoritaryo a la manera fascista, a la kontra de syertos de la vanda derecha de su partido, ke admiravan a Mussolini. Sovre la kuestyon ekonomika, a la kontra de la mayoriya de los syonistos de su tyempo,  es liberal.

En novyembre de este mismo anyo 1923 tan importante en la vida de Jabotinsky, Jabotinsky eskrive un teksto intitolado: “Al kir abarzel. Anahnu veaaravim” (Sovre la pared de fyerro. Mozotros i los arabos).

http://uia95.com/Cours%20UIA/Israel%20Palestine/Flash%20OK%202/Muraille%20acier%20integral.htm    (en franses)

http://en.jabotinsky.org/media/9747/the-iron-wall.pdf  (en ingles)

Jabotinsky mos dize ke, de prima parte, los Arabos de Palestina son en Palestina, i de aya no se iran. De sigunda parte, nunka achetaran de si para si un estado djudyo. Es despresyarlos de pensar el kontraryo. No kale pensar topar kon eyos dingun akodro todo el tyempo ke tendran la idea ke pueden echarmos afuera. Tenemos de fraguar una pared de fyerro ke nunka podran derrokar. Ansina solo, solo si mos amostramos los mas fuertes, vyendo ke no ay hayre de echarmos afuera, los arabos eskaparan por achetar un akodro kon mozotros. Nunka antes. Esto dicho, ser syonisto kyere dizir kerer la djustisya. Kale dar a los arabos los mismos derechos ke a los djudyos.

En 1930, Jabotinsky se topa en Afrika del Sur por una vijita, i se ambeza ke los Inglezes no le permiten mas de aboltar en Palestina. Jabotinsky va toparse leshos de Palestina, en Evropa, en Ayifton, en Amerika.

Ama mismo de leshos, el es ke keda el kapo de los revizyonistos, i tambyen, ofisyalmente, del Irgun, la organizasyon militar.

Kuando empesa la grande rebuelta araba de 1935, ke va surear asta 1939, Jabotinsky se topa travado de dos vandas: luchar kontra los arabos, ama los terroristos se eskonden. Matar a arabos inosentes, es lo ke empesa de azer el Irgun. No plaze a Jabotinsky, ama no lo impide. Al kavo el Irgun mata a arabos sin demandar la otorizasyon de Jabotinsky ke esta leshos.

Jabotinsky es leshos de Erets Israel, ama serka de los djudyos de Evropa, i entyende antes de los otros la sekana ke ay para estos djudyos kon la venida de Hitler al poder en Almanya en 1933, i en 1936 se va a ver a los dirijantes  de tres paizes: Hungariya, Polonya, Rumaniya para demandarles ke permiten a todos los djudyos de fuirsen en Palestina. Los tres kapos antisemites son de akodro para ke sus djudyos se vayan. La koza deve azerse en 10 anyos Son los djudyos ke no son de akodro, sovre todo los de Polonya, porke esto va traer asigun eyos antisemitismo (komo si ya no aviya dainda). Ensima  de esto, los Inglezes se oponen. El prezidente de la Organizasyon Syonista mundyala, Chaïm Weizmann, se esvachea.

En 1938, Jabotinsky aze un diskorso dizyendo ke los djudyos de Polonya “biven sovre un volkano” i tyene muncho espanto de super pogromes.

Lo ke ay de terrivle es ke Jabotinsky tyene razon, ama ni los Inglezes deshan entrar en Palestina, ni dingun pais aprova de akojer a los djudyos. Los esfuersos de Jabotinsky no reushen.

En 1939, pensa organizar una rebuelta djudiya kontra los Inglezes i tomar el poder por sorpreza, i azer entrar en Palestina 40.000 mansevos imigrantes armados. Los kapos del grupo Stern i del Lehi estudyan la koza kon dikat, savyendo ke va kostar munchas vidas. Ama empesa la gerra mundyala i ansina se keda este plano. Kyen save? La istorya del puevlo djudyo uvyera sido diferente si este plano aviya reushido.  Imajinad un estado djudyo, no en 1948, ama en 1939…Un suenyo, porke los Inglezes no uvyeran deshado la koza azerse…Ke pekado…

En agosto 1940, vijitando un kampo del Betar en los Estados Unidos, Jabotinsky muere en supito del korason, a la edad de sesenta anyos.

Su enemigo David Ben Gurion no va achetatar ke el puerpo de Jabotinsky sea enterrado en Israel, es solo en 1964 ke Levi Eshkol lo va azer enterrar en el Monte Herzl. Yo me fui ay dos anyos en Yerushalayim i me fui al Monte Herzl i vide la tomba de Jabotinsky. Me akodro ke un guardya muzulmano se metyo a azer la orasyon muzulmana, kavesa abasho, a unos kuantos metros de la tumba de Jabotinsky…Espektakulo un poko surrealisto…

Esto dicho, la influensa de Jabotinsky kontinua, syendo ke Menahem Begin, el eredero politiko de Jabotinsky, despues de entrar komo ministro en un governo de Unyon nasyonala en 1967, va toparse primo ministro en 1977, i el va ser ke va resivir a Sadate, i despues firmar kon el la paz kon Ayifton.

I oy en diya, Binyamin Netanyahu es el eredero tan de Menahem Begin komo, antes de el, de Jabotinsky.

Oitesh ke Jabotinsky fue gazetero, militar, ombre politiko, ama no kale olvidar ke, al lado de estas todas aktividades, fue tambyen un autor literaryo, ke kontinuo de eskrivir en ruso, al nombre de Altalena, romanses komo Samson Nazorei (Shimshon el nazir) en 1927, o Pyatero (los sinko), en 1936, un romanso sovre una famiya djudiya de Odessa.

Jabotinsky eskrivyo tambyen Sipur yamay (istorya de mi vida) en 1920, kijo dizir a los kuarenta anyos.

Al djueves ke vyene, si kyere el Dyo!

Edmond Cohen
Paris Fransya