Kuando empeso la mueva era Judia ? En los anyos 40? 50 ? 60?
No uvo una transformasyon ke se puediya remarkar de un diya al otro por seguro ! Ma, oy, munchos anyos dospues de estas datas, lo puedemos ver klaramente. Kreyo ke empeso dospues de la Sigunda Guerra Mondial, kuando el puevlo empeso a no dar tanta importansya a lo ke estavan auzados, los prinsipyos relijyozos i sosyales… Koza ke se puede fasilmente entender dospues de las horrores ke konosyeron… Odyavan los biervos “es defendido”, “no es justo de….”, “ijika de buena famiya no deve de …” ets..
Antes, la lingua era un enstrumento para entenderse. El resto era vanitad ! Kultura, literatura, estudyos akademikos por segura ke tienen sus valores muy altas ma muestros ansestros no pensaron a esto ! O pensaron a esto, solo muy pokos de eyos…
Estavan felis de entendersen komo les plaziya, komo era valable en sus kazas, kon los suyos… Es esto ke les importava i es pormodo de ESTO ke guadraron sus linguas, sin pensar mizmo si kale adoptar biervos lokales de los payizes ande se instalaron o no ! Es muncho mas tadre ke la lingua de la kultura i del sharanfonfonizmo se izo el Fransez… Mizmo ke munchos se burlavan de los ke avlavan Fransez (medyo medyo al empesijo !) i los komparavan a akeyos trololos i a los “nouveaux riches” ke no eran makbul/estimados en sus entorno… Avlo del tiempo ke los judyos de Istanbul moravan al deredor de la KULA…. En los anyos 1940-50 …
La verdad es ke mas tadre, kuando el Fransez se instalo kon raises profundos entre los judyos, se vyo diferensyas de klasas, empesaron siertos a tener la nariz alta, o no kerer mas bivir ande “los otros” biviyan, a no frekuentar las eskolas judiyas, preferando las eskolas turkas por la eskola Primera i eskolas privadas fransezas lo mas i inglezas i Almanes (mas poko). La Eskola Italiana viniya a la fin i no era kontada por una buena edukasyon. De vedra ke ni se puediya komparar kon los grandes kolejyos fransezes, amerikano i aleman – Austrako.
Por seguro ke la “rikeza” de las famiyas jugavan un muy grande rolo en kestiyon de “klasa”, mizmo si la honor se iva a los grandes doktores, avokados o injeniores judyos.
Penso ke es una de las razones por la kuala las famiyas rikas davan tanto importansya a la edukasyon de sus kreaturas.. Era lo primordial para “apanyar” un buen marido (buen marido = riko i de famiya konosida) o una ija de “buena ventura” (edukada en un kolejyo fransez ets, de padre o tiyos rikos, kon una godra dota (paras !!!!) i buena nikochera (ke sepa brodar, kozinar, mirar kreaturas ets..)
No era fasil de yegar a estos objektivos ! Las madres penavan duro i un konkurso krual se biviya entre estas madres para la “publisitad” de sus “hanumika de ijika” ! Se ambezava a estas “ijikas” ke azer para plazer a las futuras esuegras i komo komportarse kon un “futuro novyo ” ! No kaliya ser muy entravada ni muy libera ! Kaliya ser elegante, ayudar en kaza kuando viniya gente, ofreser el kafe, el sharope blanco o el dulse kon agua, ser grasyoza i kon kara de riza, okuparse de las kreaturas si los envitados trayiyan sus ijos endjuntos !
Todo esto kontribuava a “tener un buen nombre” ! Se avlava en los salones i las madres de los ijos es ansina ke ivan komplotando de toda manera fina el kazamiento tan i tan pensado, mezurado, projetado, dezeado i preparado !
Por sieklos es esto ke era mas o manko la vida de las famiyas judiyas en Istanbul i kreyo en otras sivdades mas chikas tambien.
Kuando los ijos o las ijas se namoravan Has ve Halila de uno ke no konveniya a la esuegra oyyyyyyyyy ! Pletos, yoros, males, la fin del mundo ! Esto no se viya de un buen ojo i era el sujet de konversasyon el mas popular en los salones de todos los niveles ! Es alora ke los padres entravan en medyo, akuzando las madres de no aver edukado bien las kreaturas ! Mas pletos !
Bueno… Esto es lo ke se pasava en general. Ay siempre eksepsyones mas o manko. Di una ideya de lo ke era por los serka de 90 porsien de famiyas judiyas. Lo inakseptable, la dezgrasya i la horror era un kazamiento mixto por seguro ! Esto no ! Todo si ma esto no !
Oy ? No se si esto es un problem mizmo !!! No ay duvda ke se prefera un judyo/judiya ma se aksepta tambien fasilamente una ernuera o un novyo de otra relijyon… Oy lo ke konta es ke los mansevos seyan horozos i no importa kon ken, komo, ande….
Las famiyas se dezataron… La independensya ekonomika, el manko respekto a los paryentes i mizmo las obligasyones sosyales, el lugar ande se topa el echo ets. son los faktores ke implikan este fakto.. Todo troko, el modo de bivir, las valores, las preferensyas, la mentalitad, la edukasyon, las responsabilitades, los doveres de manko en manko, el respekto de manko en manko, la favorizasyon del egoizmo i del repozo individual, la importansya de los viajes i de las vakansyas (ke viniyan en el d’alkavo rango antes i oy son Ley de Moshe !!!!) la kozina tradisyonal, la manera de azer el merkado, de lavorar, de gastar, de dar importansya a la salud, al sport, al puerpo, de dar manko importansya a lo ke la gente van a pensar… Fina no dar del todo, al lugar ke se viviya por esto solo ! Una lista ke puede alargarse mas i mas i mas…..
Ke epoka es mijor ? La de antes o la de agora ?
Bueno…. LAS DOS ! Es la manera ke bivo yo !
Tadrada buena a todos
Artículos Relacionados: