Diario Judío México - LAS FAMOZAS MATRIOUSHKAS  (o BABOUSHKAS) TRADISYONALAS RUSAS

Son figurinas de tavla kortadas de manera ke  entren una ariento de la otra … 7 deyas en total ke van aminguandosen.  Se desparten en la talya de la kukla para ke entre la mizma kukla en mas chika.  Son pintadas de kolores bivas i kon grande arte i imajinasyon.  Se puede dizir ke son las maskotas rusas i se venden komo sandwichikos a los turistos ke vijitan Rusia.

Fue el karpentero Vasily Zvyozdochkin  ke izo el primero model en el anyo 1890 asigun un desino de Sergey Malyutin, un pintor de la sivdad Abramtsevo.   De manera tradisyonal la kukla reprezenta una mujer vistida del sarafan ke es un fostan simple i largo, vistido por las kampesinas rusas.

El nombre  Matryona, o Matriosha, tambien signifika una chika matrona, la duenya de kaza.  Baboushka, otra manera de yamar las kuklas, kere dizir aguela, i son kuklas de mujeres aedadas.   Pueden reprezentar, hombres, politikos, animales i varios figurinas tambien.  Muncho tiempo servieeron de jugete para las kreaturas.

Este arte fue prezentado al mundo entero en la Feria Universal de Paris en el anyo  1900.  La kukla gano la medalya de bronza en esta egzibisyon.  Dospues de este evento, la produksyon de las kuklas fue un echo lukrativo i Rusya eksporto las kuklas al mundo entero.  Pintar las kuklas de manera a travar el ojo tiene su importansa de mas en mas…  Son fihurinas de los politikos rusos, grande mzisyanos, astraunotes, atletes, las estreyas del sinema, a parte la inspirasion de los kuentos de hadas, Noel, la Paskua ets.

El set el mas grande de las Matrioshkas, es el de Youlia Bereznitskaia kon 51 kuklas pintadas a la mano i ke fue kompletado en 2003, La kukla la mas alta del set  tiene   53,97  cm.  i la mas chcika  0.31  cm  !  Mettida una al lado de la otra kovren una superfisia de  3,41  m  (11 ft 2.25 in)`

Matrioshka reprezenta la famiya rusa, es karinyo, fertilitad, bienestar… Yeva en su tripa su bebe i se entiende ke el puerpo, la miente, el korason i el espirito son UNO.

AVLANDO de BARBIE…..

La mas amada, las mas ermoza i dezeada de las kuklas…. Sin duvda ke es la mas konosida ke adorna todos los suenyos de las ijikas…. I, des de mas de 60 anyos !  Es una lokura ke nunka pasa,porke esta kukla kon largos kaveyos blondos fina la talya, troka de modo de vida, de fantaziyas, de vistimienta  (i ke fostanes i aksesuares  !!!  de kazas, i koches i avion privado) inkluido todo lo ke egziste en la vida de los adultos, fina un marido o kompanyero  KEN !

Los juegos de las kreaturas kon un jugette asemejante no puede meter limitos a la imajinasyon i a las aktivitades kon kuklas asemejantes ke se pueden lavar i trokar de vistimiente asigun Barbie tiene ke irse a un balo, al tenis, al merkado, al doktor, ir a kaminar sola o kon sus amigas /o Ken, se puede penyar, arresivir sus amigas, kozinar, azer ski i mil kozas divertidas !

Ay personas ke tinen una grande kolleksyon de todo modo de jugette relatado a la vida de Barbie.   Un diya, kaminando por las kayes de Greenwich en Londres vide una botika ke vendiya solo kazas enteras i pedaso por pedaso todo lo ke entra en una kaza, aze parte de su dekorasyon ets… Me paresyo ke esto peryendo mi meoyo !  Nunka vide o me imajini ansina de lokura porke aviyan de estos chikos jugettikos miles i miles para todos los gustos… Unos eran kozas ke puediyan egzistir solamente en los palasyos real…. Echos de manera impekavle i por seguro karos komo sus modelos grandes  .   Otros mas simples, ma igualmente karos komo los meubles de las kazas, villas, kabanas rustikas ke vemos en la sivdad o en las kampanyas… Un grande arte de pueder reproduizir en tan chiko lo ke konosemos de talya normal !  Sali de la butika mareyada entera, demandandome ken eran los ke se puediyan permeter de merkar una kaza entera fina la tasika de kafe…. I entregar estas maraviyas a las manos de kreaturas chikas….

Yo me namoro por jugettes… Ma ken puede rezistir a ansina de ermozuras ?

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorEn un pueblo en Bosnia el tiempo se detuvo: siguen hablando Judeo-espanyol
Artículo siguienteEl presidente Rivlin es invitado de honor en una cena ofrecida por el presidente de Fiji
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.