LA VIEJES DE HABAKUK KULI.
Mis keridos,
Oy no es dinguna fiesta ni mizmo fin de semana…. ma tengo una koza muy savroza a eskudyarvos kon mezetim, raki, karpuz (sandia), berendjena frita kon sos, koftikas (albondigas) fritas, salatas i dolmas (ojas de vinya reynadas), un banquete de las komidas las mas savrozas de la kozina Otomana i del mundo….
Estash todos envitados a estas mezas virtual ke se aprontoran en los bodres del Bosphoro, en la kosta Europea de Istanbul, i en la terasa del Palasyo Ciragan Kempinski.
Buyrun, buyrun……Asentavos i vos kontare…
Para vozotros todos traduizi un maraviyozo mail ke resivi de Moris Eskenazi Z”l “tiyo Moshon kon el baston”, muestro muy kerido amigo de Israel ke mos se bolo al Gan Eden. Repozo bueno tenga Amen.
YO, HABAKUK KULI, PENSI I DESIDI KE SER VIEJO
ES UN REGALO !
Por la primera vez en mi egzistensya so de verda la “persona ke kije ser ” toda mi vida. No ! No mi puerpo por seguro ! En vezes me dezespero pormodo de esto ! Rugas en todas las partes, ojos aunflados, i mas otros defektos…I me allesho de esta persona ke bive en los espejos i ke asemeja a mi nono !
Ya me pasa presto i trato de no komerme de mi para mi sovre lo ke veyo…De dinguna manera no trokariya mis keridos amigos, mi ermoza vida, miembros de mi famiya por mankos kaveyos blankos o un puerpo sin la tripa indo antes de mi !
Avansando en edad me topi kritikandome menos, Si ! Me ize mi amigo.. No me esto aravyando kon mi mismo si komo biskochikos ke me dan la gana o no ago mi kamika por 1, 2, 3 diyas ! I..Si afito ke merki unos materyales para azer kozikas un poko fantastikas “avant-garde” en mi guertizika, ke vayga i ke seya! Me da ganas de ser un poko ekstravagante i gastar en kozas ke no son menesterozas de vezes en kuando ! Ke ay ? Tengo el derrito de komer, azer lo ke kero, ser dezordonado i ekstravagante. (..esto no sinyor ! Ayyyyy ke no puide kontenirme yo !!!! >>>>>> Sharope)
Vide tantos buenos amigos mios ke mos desharon la buena vida siendo mansevos dayinda i sin gozar de la libertad ke se tiene kuando se entra en edad !
A ken le importa si kero jugar fina las 4 de la demanyana en el Internet
i me da ganas de durmir fina midi dospues ?
(Todo bueno ke tengas ! Siiiiiiiii 🙂 )
Vo baylar kon las maraviyozas kantikas de los anyos 60 i 70 de mi para mismo, i si me akodro de un amor i me viene de aryento de yorar porke no puedimos kedar endjuntos, lo azere…Yorare todo lo ke kero i si me viene de aryento de echar le una kupa en la kara porke me mallogro mi vida, i ESTO lo azere ! I komooooo !
No me va importar (hmmmmm !) kaminar kon el mayo de banyo ensima de mis karnes eskuryendo (yikes !) o apegado a mi puerpo ke peza 10 % de una tona en medyo de la djente elegante de un klub, mirandome komo si vine de una otra planeta o kon miradas de piyadad o mas negro… Elohim ! …Kon sorizas ke keren dizir dezgrasyas de kozas ! Delantre de sus ojos me vo echar kon ke plazer a las olas i vo nadar a mi gusto !
( No topates una plaj asolada un poko Benadam ???? )
Ya lo se ke munchas vezes me olvido de kozas. Bueno…Se puede bivir i en no akodrandose de todo ! De los mas importantes me akodrare puedeser de una manera !
Kon tiyempo mi korason se kanso ! Komo no ? Tantas muertes en mi deredor, personas ke me eran keridas, la ke amava…..Komo kedar de piedra kuando un chiko sufre i mizmo se firye o muere debasho de
una otomobil el perriko o el gatiko de kaza.
Korasones rompidos mos azen entiender la valor de lavida, mos enfuertesemos i sintimos mas kompasion… Un korason ke nunka se rompyo no puede todo entender, no es fekunda….Es kaji muerta i no puedra gostar de la alegriya de NO SER perfekto en la vida.
ESto tan feliz de yegar a una edad en la kuala ya tengo todos mis kaveyos grizos i las rizas de mi manseves…. Kuantos nunka rieron komo yo riyo,
kuantos no ayegaron a tener kaveyos blankos !
Es muncho mas fasil de ser pozitivo kuando uno esta aedado ! No se aze atensyon a lo ke los otros pensan….No me demando si tengo razon o no…
Gani el derrito de yerrarme i no tener razon siempre !
Todo esto no es sin fin, ya se save…Por el tiempo ke vo bivir no me vo lamentar en “LO KE PUEDIYA SER” i en “LO KE VA AFITAR” I vo komer Siiiiii Pastas i burekas i dulses i kremas si me da la gana !
I esto es…Ansina va ser ! I si kero ? Kada diya !
———————————-
(Bravoooooooooooooooooooooooooooooooooo! )
Veygo ke es “Fresko” ke se lo embiyoa a “Albert Basan” ke lo embiyo a “Moris Eskenazi el bueno” ke me lo embiyo a mi i de miiiiiiiiiiiiiii a vozotros todossssss.
This is called a good job !
Agoraaaaaaa…Ya puedesh entender todos ke ay munchooooooo de Sharope en estas linyas porke no solo las traduizi hehehheh ma les meti
taponikos i biblos i flores i kandelas i kanti kantikas ets…. Para ken? Para mis keridos amigos i amigitas por seguro …. i por…. NO LO VO DIZIR !
SOVRE LA VIEJES MAS :
Artículos Relacionados: