ISTIKAMET HAN – BANKALAR CADDESI
Los anyos 1950 – Era antes ke empese a ir a la eskola. Tiempos bendichos ke nunka puedremos olvidar. Estas memoryas estan eskritas en lingua judiya de Istanbul. Las ekspresyones de la lingua de kada dia, las kostumbres, komo las kreaturas i los mansevos judyos eran i biviyan en akeyos anyos. Si avra personas ke se vana rekonoser en estas memoryas les rogo de eskrivirme para ke mos topemos de muevo.
Yo peryi a todos de vista.
Sharope blanco en Istanbul
Papi se fue a lavorar. Mamita esta ande Madam Beki, ariva, kon Klara i su madre Madam Perla. Fatma esta alimpyando la kaza i me disho ke tiene muncho echo. No va pueder jugar kon mi…. Ya eskapi de koloriar todas las figuras de mis livrikos de boyadar.(to color) Ay una ke me plazyo muncho, kon la prensesa ke durmiya en el palasyo i el prens ke vino kon su kavayo para espertarla kon un bezo.
Bankalar Caddesi
Tantine me regalo estos 24 kalemes(coloring pencil) de boyadar “Faber” justo a tiempo ! Son una ermozura estos kalemes… Los tomi en mis brazos i me durmi kon eyos. Kale ke le diga a Papi ke me trayga el mismo livriko de boyadar kon la prensesa. Esta noche se lo va dizir sin olvidarme i ke me trayga tambien de estos dulses blankos i kolorados ke azen para Purim ande Belifante. Kero en forma de guevo i de shaday !
Madam Beki tiene un bebe agora. Se yama Perlette. Es tanto chika ke no puedo jugar kon eya. Todos saviyan ke iva ser una ijika porke su madre se engodro muncho i se izo feya kuando Perlette estava dayinda en su tripa ! I mi mamita se izo feya kuando yo estava en su tripa ? Nooooooo. No es posivle porke yo la kero muncho bien i eya es la mas ermoza del mundo !
Me vo ir ande Grasyela al treser etaj i va ver si tiene ganas de djugar kon mi. Mi kukla “Dilek” es amiga de la kukla de Grasyela “Dorit”. Las banyamos i las vistimos enjuntas. Eyas jugan en un kanton i mozotros aparejamos a komer kon papelikos ke kortamos komo fasulyas (fijones) i azemos koftes (albondigas) de lodo. Dospues tomamos muestras “ijas” i mos asuvimos a la terasa ande el han (building) entero enkolga el lavado. Es una muy grande terasa kon muncho sol i kuando no ay lavado es un lugar maraviyozo para koryer i jugar komo keremos. Si ay lavado la gente se estan keshando kuando jugamos. Dizen ke estamos ensuzyando la ropa i la estamos echando embasho. No es verdad. Yo nunka ago esto ma no se kualo afita kuando Moshiko i Rafel jugan aya. Grasyela i yo mos asentamos en un kantoniko ensima de los tabures de paya i mos burlamos de Madam Kohen. Mos kontamos lo ke vimos kuando salimos kon muestras mamis, todos muestros sekretos i ke vamos azer si Moshiko mos aferra en las eskaleras !
El ponte de Galata 1950
Moshiko es el guerko ke abasho a este mundo ! Grasyela i yo mos espantamos de el i no savemos ande fuir kuando lo vemos. El lugar el mas seguro es estar kon los grandes enjuntos. Muestras mamis… Porke mismo al lado de las mosas mos puede azer miliuna maldad ! Su mijor amigo es Rafael, el ijo de Madam Kohen ke moran al kuatren etaj. Moshiko mora al sinken i kuando mos suvimos a la terasa avrimos los ojos grande grande para estar siguras ke no lo vamos a enkuentrar supito i no mos va danyar. Rafael es el mas grande de los chikos kon Anjel ke ya tiyene 11 anyos. Rafael tiyene 8 anyos i esta en la segunda klasa de muestra eskola, la Aliyans. Esta es la eskola ande todos los ijikos judios se van. Ay la Bene Berit tambien. Tiyenen uniformas maron ! Ke komik ! Yo me vo ir a la Aliyans i vo tener komo todos la prostela preta i el kolar blanko. El Dio ke aga ke no seyamos en la mizma klasa kon Moshiko !
Taksim Tepebash
Empesaremos a la eskola Grasyela el i yo al otro anyo. Janet la bova i Esterika tambien empesaran kon mozotras. Yo ya se meldar i se eskrivir el nombre de todos mis konosidos. Se azer figuras de personas de otobus del sol i munchas otras kozas. Lo ke no me plaze del todo es kuando granmami i mamita me forsan a jugar piyano ! De esto no kero saver ma eyas son profesoras de piyano i me disheron ke yo tambien sere profesora kuando me va engrandeser ma yo kero ser doktora komo mi granpapi o lavandera porke me plaze muncho jugar kon las aguas enshavonadas… Kayintizikas… La ropa se arezvala aryento de la grande payla i las finyo para ke salga todo lo suzyo i se agan blankas blankas. Ma es difisil de esprimir. No tengo muncha fuersa komo Roza ke viene para azer el lavado. De todo modo Roza i todos en kaza se inyervan kuando kero lavar i yo ! Mi echo es dar las trankas en la mano de Roza kuando vamos a la terasa para enkolgar. Un dia me apanyi la nariz kon una tranka, no se deke i echi vardas de la dolor ! Eskularichas de trankas son para riyir tambien ! Komo marido, sonyava de un dondurmadji (ice cream seller) o de un ombre polis o zabit (officer) por modo ke me tresaliya de sus uniformas i ke todos se espantavan de eyos ! Mizmo Moshiko se iva fuyir komo raton si me viya al lado de mi marido zabit.
Las dammas elegantes
Un dia Grasyela i yo apegimos la oreja a la puerta de los Kohen porke saviyamos ke se estava aparejando una muy grande boda por la sovrina Lili. Todos estavan aya… Kantes..pransos..regalos ma mozotros no pudiyamos entrar ! Mizmo Moshiko i Rafael kon Anjel se ivan ido de kaza no se ande. No saviyamos ken avlava ma sintimos todo !
– Asibiva madam Klara..Asentavos ayi, vaj a estar muncho mas konfortable. Kualo ke vos meta en el tchini (plato) ? Las borekitas estan muy savrozas. Un poko de likorino ? Las salatas las ize yo ! Todo fresko de oy. Vos va dar de estas dolmayikas chikitikas…Una lokura ! Es Korin ke las izo ! Dezmazalada peno tanto, No durmyo noche entera ! Ke vos kede lugar para los dulses…No me digaj dospues ke no vos di haber ! (to inform)
Abashada a Bankalar Caddesi – Las eskaleras de Kamondo
Korin ! No me iva imajinar ke Lili teniya un ashugar tan riko ! Ke ermozas kozas ke le izitej ! Mazaloza eya i su novyo ! Nunka vana tener de menester de merkar manteles, tovajas, literie, (todo lo ke es menester para las kamas) bogos. La lingerie ( chemises de nuit, kombinezones, robes de chambre ets..) esta maraviyoza ! Ke gusto ! (munchos biervos en fransez proke estas kozas no se uzavan en Sefarad kuando los djudyos yegaron al Emperyo Ottomano i es la epoka kuando todos lo judios estavan tratando de avlar el fransez o el franyol !) Me namori de las broderiyas. Kale ke me mostres este punto del mantel krem ! Nunka vide este lavoro ! Ya saves… I mozotros tenemos de aparejar ashugar. Mi ija es chika dayinda ma el tiempo esta koryendo ! En nada ya va tener edad de ser novya i ke mos ayege el Dio de kazarla kon un manseviko komo lo dezea muestro korason ! Pasame las filikas por mundo tuyo ! No las alkanso …. Estan por la otra parte de la meza ! Las izyeron kon pasturma (komo salami ma de karne no tartikada) i los sigaros son de berendjena.
Indo a Kadikoy pasando por Haydarpasha
– Ya lo saviya yo ke son ansina de djente ! No kaliya ke les disheras nada ! Selos ! Ansina es…. No pueden suportar ke los otros tengan bien i paz ! El Dio ke les page ! Kuando te vaz a ir a Burgaz de muevo ? Ya m’esta travanda la alma de ir kon ti ! Para boltar un poko ! Nada mas ! Ya me se sikilo la alma d’estar en kaza kada diya. Ke bueno iva ser si tomava un poko d’ayre limpyo de las adas ! El otro diya las vizinas se fueron todas endjuntos a komer al Bosfor ! Yo no puide pormodo de los chikos…Tiyenen eskola i viyenen a kaza a midi. En la kaye los iva deshar ? No es posivle ! No eskaparon de kontar ke ermozo ke estava i el diya maraviyozo ke pasaron enjuntos. Jugaron kunkamiko (jugo de kartas) dospues de komer i se fueron al borekchi de Sariyer a la tadre….
– Atyooo…… ! Por lo ke les afito ! Oyites esto ? Ken lo puediya imajinar dospues de tantos anyos de bolluk (abundance) i de rikeza ! Dizen ke no le kedo ni un grosh ! Es el echo del haver (partner) parese ! Te lo sorvyo sin ke se de kuenta kon kara de buendad. Bensiyon teniya una konfiyensiya siega en el, se lo entrego todo i nunka penso ke lo puediya kucheyar de detras ! Yo siempre digo ! No te vas a fiar en dinguno ! Su mujer ? No me agas riir ! Lo esta deshando… Dize ke lo meresyo ! Esta resivyendo chaketon sovre chaketon ! Vaza dizir “A mozos ke mos sale ?” Si. Tienes razon. No es ke m’enteresa del todo ! Ma dime… No es pekado?
– Saves koza sovre la invitasyon para el hamam ?
– Kuando ? Kuando ? I yo me kero ir al banyo de novya ! Ya vide los “takumes de banyo” (bathing stuff) ke le metyeron en el ashugar ! Ke delgador de lavoros ! El “tas” (un djarro komo un chini, echo lo mas de kovre en forma redonda i ondo de unos 5 santimetros para echarse agua ensima en el hammam) es de plata halis ! Las “takunyas” (sabots) enklavadas de “sedef” (nacre). No se kere dicho la maraviya ke estan las tovajas, los “tulbentes” (pedasos kare de ropa muy muy delgada, brodado lo mas en los bodres para meter lo ensima de la kavesa dospues del banyo) i el “bournous” (vestimiyenta de ropa de tovaja ke se mete ensima, dospues del banyo). Van a yamar bayladeras i kantaderas al hammam (banyo turko) i el pranso no va ser manko de lo ke ves aki oy ! Apareja las lirikas de oro hanumika !!!! La vamos a kantar a la novya ! Guadrada de nazar i de ojo malo ! Esta un lokumiko de ijika. Muy manseva. No se deke la dieron tan presto ! Puediyan asperar a lo manko fina los 18 anyos ! Disheron ke va morar kon la suegra…Ya es buena persona ma ken save ! El chiko la kijo muy muy mucho disheron ! La esta tomando de baldes… Sin dota ni nada. Si si…el ashugar por seguro, komo no! Ya son rikos los onkles.. Me parese ke le vana dar una mano kuando va avrir su echo. No te merikiyes ! Los jeunes (mansevos) de oy no pizan en tavla rota ! Pensan a todo i no es por esto ke keren manko a sus mujeres ! Todo djusto ! A mi ke me sale ? Ma esta bastante enteresante …. No Janti ?
– Es Korin ke va aparejar las komidas i yo les aprometi las dulsuryas i las frutas.
El Hammam…. El keyf kon los regalos, los kantes, las bayladeras, el pranso i las bevyentas antes de la boda….I….el kafe dospues en kaza !
– Ke me dizes ? En vedra ? Yo no lo oyi esto ! Ken te lo disho ? Atyo! Ke manziya ! Komo fue ke la desho ! Esto es…. Va kreyete en los hombres ! El mijor al palo ! No ay de kreyer en eyos ! Ni en las mujeres ma en eyos del todo ! I esta… savyendo todo lo ke les izo a las otras mujeres lo tomo ? Komo no le kuadro ke i a eya tambien la iva azer sufrir i la iva deshar a la fin! Esto es… Ken derroka nunka tendra fin … Ay Dio en los sielos ! I a esta la va deshar. Ke te paresyo! No es muestro echo! Ke vayan i ke agan lo ke keren ! No mos interesa ma kuryozo komo no supo lo ke le iva vinir en la kavesa…. Vas a dizir: kualo peryo ? Hehe… La estima de todos i su propriya estima ma este modo de personas ni saven lo ke kere dizir estima ! Desha…. No vale la pena de avlar de esto… Ke mos sale a mozotros !
– Ven mos iremos aryento…. Te vo kontar lo ke oyi ayer ! Ma prometeme ke no lo vas a dizir a dingunos…
– Ke manera de avla es esto ? Kuando konti a alguno lo ke me dishites ? De mi no sale nada… Tu aze dikkat (attensyon) a ken kontas tus sekretos a parte de mi !
– Yo ? A dingunos !…. Solo me afito de……
Artículos Relacionados: