LA SUPA DE PULI DE GUEYSOS YENNOS I DE VERDURAS
“LA GRANDE SOUPE SHARANFONFON”
Keridos David Hazzan Mis Amigos i mis Amigitas,
Es vedra ke le prometi la resefta de esta supa maraviyoza a muestro kerido David ma la esto eskrivyendo aki, pensando ke todas vash a kerer azerla ! Es una supa muy saludoza i muy savroza…
Merkamos karne de puli (jarret, ossobuko, shank, la pierna ma no el pie de la vaka) i guesos yennos de tutano (muala) ke se salan se deshan en la agua fina ke les salga toda la sangre.
Se buyen los guesoz i la karne fina ke salga toda la muela i la karne empesa a dezazerse. Los guesos se echan dospues de vazyar la muala a la supa i la karne se aparte en un resipiante . Se mete a kozar arriento de este kaldo (kon muncha agua) patatas, karotas ,sevoyas , muncho ajo, prishil, seleri/apyo (munchas ojas tambien de apyo) todo lo ke es oja i verdura kortados finamente , sos tomate (salsa) pimyenta korolada, pimyenta preta sal… Fina ke empesa a dezazerse…. Ke no kede sin agua ! – Ke vos venga al ojo una ermoza supa kalduda i no komida de legumes ! – La karne se echa ariento de la supa kaynte antes de servir. Sale una grande supa i tenesh por tres diyas de kualo komer kon muncha savor.
Sharope kon el chapeyo alto de los gizanderos
——————————————————————–
Kerida Sharope Duls,
Mersi muncho por la reseta de supa. Ay solo una koza, ke lo ke tenesh en Turkia, karne de pulia aki lo dan para los perros.
Ya me kansi de ir a los supermerkados i demandarles “puli”. No entienden kualo es… ni yo se kuale es puli, a la fin le demandi a ta cousine (prima) Meri,
– A si bivas tu Marioucha, tu prima Sharonfonfon me dyo resefta maravillosa de carne de puli, no tengo sintido de esta karne, ya es kasher?
La amigita Meri me ekspliko ke karne de puli se vende en Turkia i no egziste ande mozotros. Por trokamiento de karne de puli, merki trout fish (pishkado) i arrekoji todos los guesos de los fish ke ya estavan gizados para komer, i los meti azer una supa de “pulifish.” Lo deshi en la lumbre el tendjere (kaldera) de agua kon los guesos de tres troutas mansevas i fui a la komputadora para meldar Sefaradimuestro, veremos kualo ay de muevo, solo ay una koza, es ke kuando empeso a meldar los mesajes de Sharope el tiempo pasa tan presto ke no me di kuento ke tengo en la lumbre supa de puli de pishkado, korri a ver si ya se izo i ke savor tendra.
No demandes Sharope, lo ke kedo en el tendjere era solo una kupa de agua, i los guesos desparesieron, aparamente se dezazieron tanto buyeron, dishe metere un poko de sal a gostar esta pulia ke savor tiene, parese ke me se fuyo sal de mazia en la kuchara, i kuando gosti la supa a la Sharnfonfon, salio ke la agua de Yam Hamelah de Israel es manko salada de la supa ke yo Chef David me yerri por azer trokar karne de puli ala Sharonfonfon, kon guesos sekos de pishkasdos dezmazalados. A la ves ke viene yo vosh dare una resefta komo azer una omelette sin puli.
Ciao
Chef David Hazzan / cordon bleu
———————————————————-
Ayyyyyyyyyyyyyyyy ke me izites riir riir riir !
Perros vana komer esta karne savroza ? Madre mia !
Dudiiiiii ke mos avlas aki ?!!!
El puli es las piernas de la vaka (no los pyes) Es la mijor karne para la supa. Si es kasher ? Oy mis aguelas ermozas ! I komo ke no va ser kasher en Sefaradimuestro ?
Kasher de padre i de madre, 7 jeneransyos !
Ke se aziya supa kon los guesoz de pishkado es la primera vez ke oygo ! Mozotros echamos estos guesoz al chop/garbage ! Fina este punto estash ambiertos en Amerika ? Guay guay guay !
Las puedes envitar a mis dos primikas a tomar de esta supa de guesoz de pishkado…Mil grasyas…Yo estare muy okupada akel diya para aresponder a un muy buen amigo miyo de SM, no se si lo konoses, se yama David Hazzan 🙂
Puliya es una kreatura (o hombre !) ke no keda de chornishar – biervo de Sharope blanco komo sharonfonfon -. Chornishar es yorar, mayuar, gritar, demandar kozas sin kola ni kavesa, echarse d’en basho en basho…No se de ande me vino este biervo ma me plaze muncho ! NO CHORNISHES ! No me mauyes la alma ! No me komas la miga del meoyo ! No me enfasyes kon tus keshas sin fin ! Ke keres de mi vida etc….. CHORNISHAR es maraviya kuando keres kitar loko a alguno… a mi me plaze chornishar kuando kero una koza ! YA entendites kualo es puliya agora !
PELEJO es lo ke damos a los gatos i alos perros dezmazalados ! Pelejo es karne ke NO ES BUENA ! Yikesssss… Kuando el kasap (boucher) judyo enviyava karne a muestra kaza mi mamita avriya el paketa i gritava ! “Kualo es este pelejo ke me ’embiyo Jak ! Yevatelo esto atras i si va kontinuar ansina yo no le vo mas demandar de mandarme karne ! ” ” No madam ! Esto lo embiyo para vuestros gatos ! Aki tengo vuestro paketo ! ” Lolllllllllllll
Komo kuentiziko de Alhad por la vida mia !
——————————
Mashalla a muestra primika Meri-Mariouchka – Komo se
imajino ke las vakas amerikanas no tyenen pachas?
Komo van a kaminar? (Etty, riyete, OK?)
El puli en inglez se yama “shank of beef”.
Guler de Estanbol
——————————
Merika se fue allado de los angelos…
No esta mas…. Durme en paz primika….
Sharope Blanco
Artículos Relacionados: