Diario Judío México - Si, ma no todos son tan ermozos !
SOLO, SOLTERO, SOLTADO, SOL, LA, SI, DO….

No se de vozotros ma vos puedo dizir ke yo konosko muy muy munchos hombres, i bastante aedados, ke no estan del todo horozos i kontentos de no tener una kompanyera, una espoza para kompartir sus diyas, oyir lo ke pensa, tomar una mano. La ke kudyara i se interesara al hombre kon el kual biven endjuntos. …

Lo mas de estos se kitaron de sus mujer por varios razones, unos se embivdaron i pokos no se kazaron del todo. Los ke no se kazaron del todo i tuvyeron munchas relasyones en sus vida kon , no kijyeron tomar responsabilitad, fueron muy okupados en sus karyera, pensaron ke no tendran bastante plata para mantener una famiya, las vienen a eyos por sus plata, no toparon LA ke kijyeran por espoza, estavan hazinos o dezabilitados, preferaron o se vieron en la ovligasyon de kudyar sus paryentes, hermanos ets…. Fueron dezilluzyonados por ke no les konveniya o teniyan “manyikas” ke eran difisil a akseptar por una mujer.

Agora estan solikos ! A lo manko si teniyan perros, gatos, un papagayo !…. Ma, no ! Ni esto tienen i dayinda pensan komo enkontrar la perla rara… Ke seya flakita, enstruida, kon kara de riza, ke no tenga dingunos (!) -famiya ijos ijas, inyetos…- ke sepa guizar i alimpye la kaza diya i noche, aga el fregado, el lavado, de uti (planchar) las ridas, las tovajas…Todo ! Lo deshe gozar de la komputadora, de sus hobbies, de sus programes en la TV, ke seya perfekta en su salud i NO le demande dinero, i por esto, ke tenga bastante “de lado”….. Utopiyas…. Esto nunka va afitar mizmo si se aze chikas konsesyones por aki o por aya…

*
Kerido Miko presyado…. Te apareji fritadas de kalavasa, salata de berenjena, borekitas de ispinaka kon susam i un sufle de kezo para shabat. Te esto embiyando una karafa de naranjas i agranadas muevas esprimidas tambien, pensando a tu tristeza de bivir sin una kompanyera de tu gusto en tu kaza…

Es vedra ke la gente se auza a bivir solo ma ay siertos de estos ke siempre les viene al tino ke ser akompanyado kon una persona kerida es muncho mas interesante i fasil en la vida. Seya por la amistad en kaza, seya por saver ke no sera solo si le afita una koza, una hazinura, seya para kompartir el guizado, los echos de kaza, el merkado i las kompras, las fiestas i las penas…… El tablo es muy atraktivo por siguro kuando lo vez teorikamente i objektivamente. Muncha gente se tresaleriya de saltar en ansina de oportunitad i eskapar la vida en un “happy end ” ! I penso, komo mi, todos los ke estan solos i solas agora i ay muy munchos, mas ke hombres kreyo, para no dizir lo mas de la gente de muestra edad ke kijyeran tener un/una kompanyero/a.

Si si, maaaaaaa el gatiko no es siempre blanko ! I….el zurzuvi emleskado a lo preto en su blankor aze ke a este gato, no saves mas por ke ventana de tu kaza lo vas a kerer echar! Este gatiko ke va ver en ti “una salvasyon !!!” de sus mizeryas en la kaya, de la ambre de la vida ke le kedo en el tino, de los otros gatos ke no lo deshavan repozado i teniya siempre de protejarse de eyos i de mil otras kozas kuando estava sola, se va apegar a tus ombros i nada de lo ke le vas a dar no sera bastante ! Se va kerer apropriyar de tu persona, de tu kaza, de todo lo ke tienes i te va KOMER la miga del meoyo para sintirse Kerido (miaou miaou !) aregalado (i esto i esto i esto) espandirse en tus kantones (ohhhhhhh ke ermoza vida tengo ) i verte demaziyado en tu propia kaza (!!!!) (ouffffffff ke kere este mas de mi !) i te vas a ver muncho mas angustyado, loko i sin saver ke azer para SALVARTE de este gato ke kijites solo karesar i mirar ! El gato se va transformar en un diavlo kon lokuras inesperadas (todos tenemos a muestra edad un pokitiko A LO MANKO) una haraganut ke asperara todo de ti (a la fin tengo un marido !) una kanserya kronika (ayyyy no puedo azer nada oy me esta tuyendo el dedo !) un dezgano total (deshame bivir, kero arepozarme esto kansada de espandirme todo el diya !) una kara de tishabead (No…No tengo nada ! Kualo keres? peleyarte kon mi ?) Deshame bivir, tu okupate de tu komputer kerido !) hazinuras suyas (hehe no kreyo ke tendras un gato mansevo !) problemas de famiya suyas ( Mi ija….Mi yerno… Mi ijo…. Mis inyetizikos…Mi amiga…) siiiiiiiiiiin fin ! Mas ? “Sal tu si keres no tengo gana.” “Kome tu…No tengo ambre.. Dospues komo yo !….Deshame agora, ay un program a la TV, lo kero mirar, tu aze lo ke keres!” “Ke me estas ensuzyando todo agora ! Vengo de alimpyarlo ! “No tengo fuersas para ti ! Otras vez deshas kozas en medyo ? Ya me enfasyi de korrer detras de ti.. Ke es esto ! Ande se vido un marido ansina !”… Kerido, tenemos de menester de de…., ……., …….., ….. i no te olvides de merkar….., ….., !!!

No ! Yo no vo vinir, me vo ir al kuafor. Deshame paras kuando vas a salir ! 100 Dolares ? Para kualo me va abastar en primero !!!! Dame mas ! Mersi kerido un bezo para ti !
No todos los gatos son los mizmos ? Tienes razon ! Ay i munchos mas negros !!!! El Di-o ke te guadre !

Un abraso de un gatiko ke aze ojikos, tiene una boz de pasharo, es kayintika i godrika komo una borekita…Riye…Riye…. Grrrrrrrrrr ! Fffffithff!

Te dezgani en una koza ? No ! No kreyo ! Es la vida ….Ay de todo ! No te kreyas a todo lo ke te dizen ! ….Los plazeres de la vida ke no te manken ! Ke gozes de tu salud i de la alegriya de bivir fina la fin de tu vida AMEN mi muy kerido Miko.

Te abraso karinyozamente
[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorUne fatwa non officielle du Hamas interdit les opérations de djihad isolées
Artículo siguienteNetanyahu viaja a Londres el jueves para dialogar con Johnson
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.