Diario Judío México - Savores de la kuzina de mi nonika !

SOFRITIKAS KON AVRAMILA I PISHKADO GAYA KON AVRAMILA ……VINO EL TIEMPO, SIIIIIIII…….

Un minuto….Me visto mi chapeyo alto kon pishkul de los gizanderos i vengo !
Ya estamos ! Ke mupak ermozo eh ? Todo klaro, limpyo ! Ande meti las avramilas !? (Zirguelas !) Madre miya luzya ! Se peryeron ! <<< bushkando…..ariva…abasho… Estan en el sesto del balkoniko ! Wohouuuuuu !………

Avramilas vedres i freskas, durikas i a penas dulsikas
Komo balizikas i arrezvalandosen a todas las vandas
Las vo guizar, mo los vamos a komer kon ermozas gayas
O yulikas de karne, sofritikas kon kaldo, ajo i sevoyas.

Alimpyamos debasho de la fuente 1 kg de avramila.
Las buyimos kon agua, fina ke se azen blandaz.

En una kaldera metemoz el tripito/el resipyente
burakado para “pasar” las avramilas.
Vazyamos las avramilas buyidas KON LA AGUA
al tripito ke eskure aryento de la kaldera.

Kon la mano, bueno bueno machukamos las
avramilas para ke “pasen” de los burakos del tripito.
Kedan solo los kueshkos i la piel.
Al kaldo este vazyamos medya kupa de azeyte de oliva.


 

Si son yulikas de karne ke vamos a guizar……:

Agora ke el kaldo esta pronto vamos allado de la karne
tartikada /minced meat/kiyma. (pasada 1 vez)
Lavoramos la karne kon sal i pimyenta ajo i sevoya rayada
i azemos yulizikas/topes/balls komo vos plaze. Chikas, medyas o mas gradizikas.

Les vazyamos poko arina para ke no apegen. Meneyamos para ke lo mas de la arina kayga.

Arineadas se echan al azeite de oliva para sofriyirlas. No muncho.
Sofriyir sofriyir …kantando i baylando para ke se agan alegres.

Kuando eskapo este echo hooooooooop aryento de la sos de avramila.(sin la azeyte)

Kozer un poko kon sal aryento de la sos.
Si la avramila es muy agra adjuntamos una kuchara de asukar.
Si esta dulse, al kontraryo, adjuntamos un pokode limon esprimido.
La supa de esta komida es maraviyoza.


 

Si topateshh pishkado gaya o keresh aprovar esta komida
kon un otro pishkado :

Se alimpyan bueno bueno los pishkados (de karne blanka!
komo la gaya!) i se vazyan para nadar en la sos de avramila !
No olvidar el limon, la sal i la azeyte de oliva….

Un delisyo ! Ademas la supika de avramilas kon pishkado !

K’ ermozo de yulikas
K’ermozo de sofritikas
las komo kon kucharikas
Kon pan fresko i salatikas !

sharope,[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


Artículo anteriorEntre Orwell  y lo orwelliano
Artículo siguienteLecciones de Minnesota – análisis
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.