Me kayo entre las manos un artikulo ke topi muy interesante i esto kuryoza de saver si saviyash esto i vos interesa komo me intereso a mi…
Son los komentos de Peter Wohlleben ke fue appoyada por los estudyos de la Universitad de Aachen sovre los programos de investigasyones de los boskes. Ay tanto i tanto de ambezarse, i mas se investiga mas la persona es kuryoza de saver mas i mas… Ay muncho tiempo ke aviya meldado un livro de Lyall Watson, un famozo biologo ke tratava de un sujeto asemejante i es de akel tiempo ke tengo sentimentos muy diferentes para las plantas i espasyalmente para los arvoles…..
LOS ARVOLES BIVEN EN KOMUNITADES
Se topo muy ondo en la tierra un pedaso de lenyo ke teniya aryento, en medyo, una partida kon klorofil, vedre, bivo ! Era el lenyo de un arvole ke aviya egzistido antes 400-500 anyos… Komo puediya guadrar vida en si ? Estava arrodeyado de arvoles de la mizma famiya ke le aziyan yegar asukar para ke kede en vida. Los arvoles komparten sus alimentos kon sus asemejantes, egzaktamente komo los humanos. Solos, no pueden protejarsen del klima, de las tempestas ets… Muy pokos ivan a pueder bivir muy munchos anyos…. La kalor seka la tierra. Enjuntos dan bastante solombra i humiditad para sobrebivir….Kada arvole konta por su komunitad ke dezeya guadrarlo sano i rezyo !
LOS ARVOLES KOMUNIKAN ENTRE EYOS KUANDO ESTAN EN PELIGRO !
Un buen egzemplo seriya de mensyonar el kavzo del grupo de girafas ke estava komyendo las ojas de un arvole de akasya….Al arvole le tomo solo unos kuantos minutos para ke empese a bombear (pumping) substansas toxikas a sus ojas. Las girafas entendyeron el mesaj i se alesharon del lugar. No empesaron a komer de muevo fina ke estavan leshos de unos 90 metros. El akasya emetyo gas ethylen para ke los arvelos al deredor sepan ke ay un peligro ! Al mizmo instante i estos tambien empesaron a emetir ethylen i toxinas a sus ojas ! Este fenomeno se esta remarkando en los boskes de Europa tambien. La oja siente la dolar de mizmo ke el humano solo ke le toma tres vezes mas tiempo para sintirlo…. Kale saver ke kada arvole tiene tambien su karakter. No echa sus ojas en mizmo tiempo. A vezes mas demprano i a vezes mas tadre en autonyo. Eyos no saven si es invierno o no. Konosen la kalor, el friyo i la luz i es esto ke les dikta si deven entrar en hibernasyon o no….
Los arvoles ke son mansevos tienen tendensya de engrandeser muy presto…. Ma sus madres no les permiten esto ! Kuvijan de sus ojas i ramos el “bebe” i kon la solombra el chiko puede arreivir solo tres porsyen de luz lo ke le permete de azer su photosintez a penas bastante para no morir ! Ma para kualo no lo deshan engrandeser i le meten limitos ? Sientifikos toparon la repuesta ! Los “grandes” saven ke mas tiempo se mete a engrandeser, mas el arvole sera rezyo i mas vida larga va tener !
…………Ki ha adam ets ha sade.
l hombre es un arvole de kampos……
(Deutéronome 20:19).
Tan vedra… tan serka de la tierra… Di-o mos kreo de la Tierra Madre (Ima adama) (toprak ana) i es a eya ke retorneramos dospues ke mos engrandeseremos, seremos adultos, daremos muestros frutos, gozaremos de las manyanas freskas i de las tadres de paz, de la lokura de las tempestas a lo largo de muestra vida, de la negrigura de los humanos ke saven ayudarmos, protejarmos i abatirmos, amar muestra “solombra”, todo el bueno ke les damos, dando techo i sostenyendo los ke mos nesesitan, muestros amigos, los pasharitos, los insektos i munchos otros para muestra felisitad i sus bien-estar por Su Voluntad, porke todo lo ke aze lo aze bien, es Bueno i tiene un Sentido ma muestra intelligensya es limitada, no lo savemos i nunka lo saveremos en este mundo kualas son Sus razones, Sus motivos.
La unika verdad para todo lo ke tiene vida es ke a la fin de sus diyas tiene de morir. Esto sera la fiesta del Retorno a la Tierra para lo ke vino de la tierra i el largo viaje a la Eternitad de Lakuala no savemos nada ma kreyemos ke egziste porke “MOS KONVIENE” i amamos kreyer en lo ke meldamos en los Livros Divinos. El Lugar ande no nesesitaremos nada, no tendremos ni ambre ni ser ni dingun desrepozo fiziko….
Amor i Paz para todos
Artículos Relacionados: