Diario Judío México - Diario Judío

DEDIKODU* POLITIKO ENTRE MIS MANOS !

“Espejo espejo ! Dime a mi oyido
Ken es el mijor en el mundo ?”

“Eres tu Emmanuel Macron…. Fuites ellegido i preferido !
Sos un otro naniko ma diferente de Sarkozy i del Holandezo !”

Dime espejo majiko..
Mi mujer… Brigitte me ama komo yo esto enamorado ?

“Bien entendido !
Ma tu okupate de los problemes de tu Estado !”

Tiene 39 anyos este naniko i su amada 25 anyos mas de el…… Es menudika ma dinguna klinika le puede barrir las rigas de su kara ni trokar las konsekuensyas de su edad…. Me imajino lo ke estara sufriyendo povretika…. Deviya pensar muncho antes a lo ke iva afitar kuando pasan los anyos….

Me parese ke a la Fransia le esta plazyendo prezidentes ke son tipos kon vidas eskandalozas, mujeres “eksantrikas”, en un biervo tipos “tipos !” A lo manko son los jurnales ke tiendran ganansyas buenas si no el puevlo Fransez ! Por lo bueno ke estan eskudyando al publiko aman aman…..

No ! Este No era Hollandezo… Solo se yama ansina… Francois Hollande, el amante i el padre de las 4 kreaturas de Segolene Royal, de la Siedra komo el ! Dospues de 30 anyos, les asuvyo umos a la kavesa i se espartyeron kon los chatales (tenedor) en la mano… Atyotyotyo ! El ya teniya una mueva hanumika.. Ansina, bivyendo kon keyf (plazer-gozo) endjuntos… Komo la otra ke teniya. Se yamava Valerie i era jurnalista. No es kuando se izo Monsieur le President ke le iva deshar la yaka (kolar) ! No…. Era hora de apegarse mas i mas… Dezmazalada de Segolene ! Esto se aze ? Hombre no es ? El mijor al palo ! Ansina dizen… No es yo ke lo digo ! Ma la Valerie se vido mettida a la puerta.. Ay ke dulses savores de boka ke eskudyaron al publiko.. El naniko estava borracho de la golor del petrol de los Dolares ke arresiviya en sus bankas de la parte de muestros primos ! Ma tuvo ke azerles demasyado favores en olvidandose por entero de la amistad Franco-Israeliana…. Ke pekado !

“Espejo espejo ! Dime a mi oyido
Ken es el mijor en el mundo ?”


“Eras tu Nicolas Sarkozy, el mas haham !
Ma a Francois Hollande de azno lo izyeron benadam !”

Un amigo miyo me disho ke la Fransia teniya un Bonaparte, no el de la “buena parte” (!) ma Napoleon ke mato a todos los novyos de Fransya i de akeyos tiempos en delantre la Fransiya se izo “errrrrotika” ! Krizas ekonomikas i sosyales ademas kon tanta kriminalitad no pueden ser solusyonados kon ansina de ” Monsieur un tel” o “Madame une telle ” ! Ya lo savemos todos.. Vedra ? Ke agan lo ke keren i ke se engleneyen (pas un tiempo burno) entre eyos ma a mozotros ke no mos token ! Es echo difisil la pokitika por mi vida !

LA POLITIKA

Es echo difisil la politika !
Un diya estas en la kavesa
Al otro diya te topas en la kola,
I estas oyendo lo ke “el otro” avla….

Es el pueder ke ensyega
El ojo ve i la alma dezeya !
Kon el pueder viene honores i fuersa
I… Las paras kon palas en seguida !

Tienes mas enemigos ke amigos…
Te odyan i oyes dezgrasyados biervos
Las kritikas vienen kon faktos inventados
Tu kulpa es de no ser de sus partidos !

No ser del mizmo partido,
Basta para ser enemigo !
I mizmo en el mizmo partido,
No estas seguro de no ser kucheyado
Porke es la honor de la siya ke esta en juego !

La siya ke es el trono moderno,
De un poderozo rey el simbolo !
Un rey sin korona ma ke importa
Si la korona de diamantes no esta ?
Si todo lo de mas asemeja ?
Sharope blanco

Mi amigito dize ke la unika error ke Sarkozy kometyo era de deshar la media dezvelopar el odyo kontra el. Inyoro a ke punto la televizion i los jurnales teniyan poder ensima de las personas. Des del diya ke tomo el poder deviya serrarles la boka i sensurar lo ke le ariya danyo… Esto fue una error ke de Gaulle no kometyo.

Si mi alma… Tienes razon ! Al nombre de la demokrasiya, ke la veyga manko, estos jurnalistos dezmeyoyados estan echando de embasho tambien ! No abasta lo ke el mundo mos empretese, i de aryento de muestro korason mos echan lodo a la kara ! No ay ken les diga “Basta !” … Kale unos kuantos Ataturkes ke vengan al mundo i mos enderechen todo lo tuguerto. Demokrasiya deve tener mezuras… Limitos….No deve kavzar danyos ma aklarar las mientes.. Kritikar pozitivamente. Andeeeee ? El mundo, mizmo los payizes adelantados NO estan prontos para la demokrasiya dayinda…

Penso ke Sarkozy era muncho mijor de sus predesesores…. Yo lamento la ida del naniko… Ke ermoza mujer ke tiyene ! Si Carla lo kere tanto bien i se izo su mujer, eya kon tanta belleza, kon tanta fama i no era dinero ke le mankava ni todo lo ke keriya, es ke el naniko es uno de mil maraviyas !

I lo es ! Mas el tiempo avansa i mas las personas se azen stupidas parese… El Hollandezo gano kon una muy chika diferensya… Ke pekado ! Son los arabos ke incheron las kashas de sus votos… Lo merese la Fransia !

El naniko Francois ni se puediya azer la unyika del naniko Sarkozy ke es un giante kon su intelijensya i saver kuentos i politika.

Lo bushkaron kon kandelikas al naniko.. Yo lo eskrivo aki !!! Agora es el Makaron ke mos esta komyendo kon sos Bologneza !

Sorizas para todos
[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.