LO TODO EN EL LIMITO DEL RESPEKTO, DE LA POLITESA, DEL BUEN GUSTO, DEL TAKTO SIN DUNGUNA DUVDA…..
Deve de ser muy enfasyozo de bivir sin dinguna pasyon por kualkera dedikasyon, kualker ideal i sin un sentimiento ke mos ovliga a eksteryorizar todo lo bueno i lo manko bueno en mozotros ! No es importante para kualo se tiene la pasyon, reela, fuerte, grande, ke no kave a su lugar i kere debordar ! La pasyon tala ke Di-o mo la regalo para ke mos pushe a azer “lokuras”, estas lokuras ke sin eyas la vida no tiene ni sal ni pimienta ! No ser biviendo de manera inerta, no reaksyonando a las personas en muestre deredor en komunikandoles muestro entuzyazmo, muestra alegriya o muestro dezapuntamyento, muestra frustrasyon, lo ke les permete de konosermos mijor, admirarmos por lo ke meresemos o tener una ideya sovre lo ke mos desplaze ets….
Bivir kon pasyon es bivir plenamente, sin limitar sus impulsos, no tener miedo de lo ke las personas pensaran de sus reaksyones, kon una miente sana, dunke pueder eksteryorizar los sentimientos a sus justa valor.
Todo…. Todo es por las personas. La alegriya komo la tristesa, ganar i peryer, reushir o ir de boka abasho, sufriensyas, penas, kanserya de la miente a vezes, kanseryas de muncho amar de muncho kerer una koza.. De lavorar i mas lavorar para ver ke no se yega a dingun lugar… O, al kontraryo, realizar ke supito se tiene muncho muncho muncho…No importante kualo ! Fama, amor, dinero, respekto, ermozura, libertad……
La pasyon es tambien la libertad de bivir sin limitos ! La intolerensya de kualkeras restriksyones metidas por las personas, munchas veze sin motivos seryozos. La pasyon seriya inyorar las ovligasyones sin ser egoisto i rechesar la responsibilitades… Al kontraryo kumplir kon sus doveres i guadrar el respekto. Estos son de primera prioritad i no ay de diskutir sovre eyos…Yo avlo de kozas mas leshos, ke tokan la alma, dan kuryozitad, satisfaksyon, divyerten i azen olvidar el momento-mizmo.. Komo por egzemplo diskutir, eskrivir, ver kozas muevas, meldar, entregarse kon todo su alma i su PASYON i una konfiensya sin limitos en Di-o para desharLo ver todo en si, oyir las orasyones i muestro Amor por El… AlavarLo por Su buendad i todo lo ke mos dyo i lo mas muestra miente tan developada por muestras dimensyones en este mundo. Tenemos kapasitades inkreyivles i es manziya no desvelopar estos i enterrarmos bivos en lo de kada diya, una monotoniya haragana, leshos de PASYON, de la kuryozitad de saver mas i mas sin kon esto riskar muestra salud, muestro respekto a mozotros mizmo, sin kavzar danyo a los dmas i a mozotros ! Estos no se pueden rekuperar atras i la vida es sakrada ! La resivimos porke la meresimos ! Porke tenemos ke bivirla kon alegriya i reingrasyando el Abastado por kada minuto de muestra egzistensya ! Es un regalo enorme ke mos se fado dospues de enormes koinsidensyas… Tuvimos el mazal muy muy grande de vinir al mundo i ver esto komo poka koza o halila depresiarla, i en ke situasyo ke seya, mizmo hazino i siego (!), es ser ingrato/a i niegar Su dezeo ! Tenemos la mas grande oportunitad de enalteser la kualitad de muestro nefesh i aserkarmos un paso mas a la Luz. Todo tiene una razon ke mozotros no estamos en un nivel de entender i todo es para muestro bien.
Ke seyamos guadrados de penas i de horas malas …. AMEN
Artículos Relacionados: