Marcos Gini nasió el 18 de septembre de 1905 en Buenos Aires. Sus parientes, Samuel i Bojora Aboudara, nasieron i se kazaron en Izmir, Turkía.

De este matrimonio nasieron Leon, Jaime, Marcos i Alberto (konosido komo Avramachi).

Moravan toda la famiya djunta, en una kaza en la kaleja Camargo 828, en el kuartier de Villa Crespo. En este sitio nasió Avelina, la primera ija de Marcos.

Marcos se fue a la eskola de la kaleja Acevedo, komo la mayoría en estos tiempos. Era una famiya prove ke trusho de la Turkía el oficio de azer chapines (zapatos).

Desde djoven, Marcos era vendedor ambulante vendiendo kolares para las kamizas de ombre, ke se metiyan kon botones. Unos anyos más tadre, Isaac Habif lo yevó a lavorar en seguridad.

El kavzo ke Marcos estava siempre en el templo, punto de enkontro de los ombres, akontesió ke Isaac Bensignor, ombre vendedor de livros al publi­ko de la Editorial Sopena, aprezenta a Marcos en la editorial para lavorar, sitio ande desde mansevo lavoró, de mismo ke su ermano Avramachi, el kun­vado Marcos Bitrán i Elías Benchoan.

Le plaziya ir a bailar, i lo azía kon la djente del kuartier konosidas por todos. En estos bailes ko­nose a Fortuné Codrón a ken le propozó de ser su novio, pero eya le aresponde ke no puede ser porké ya estava espozada, ama siente ke es buen ombre, a lo ke aresponde ke puede ser novio de la ermanika Rebeca. Pishín Marcos le dize ke ainda es muy chikitika, a lo ke Fortuné le dize: "Ya va kreser i kero ke kedes en mi famiya, siento ke sos un buen ombre". A lo ke de a poko a poko Marcos ampesa a entrar en la kaza i traer regalikos a la famiya ke afilú eran proves. Kale dizir ke Rebeca desde los 12 anyos se ambezó a azer chapeos (sombreros) para mujeres i ansina ayudar un poko a la famiya.

El kavzo ke se djuntan la madre de Rebeca i el padre de Marcos, ke ampesa a dizirle ke va akos­tumbrarse a la tradisión i las kostumbres djudías, las kualas los Gini respektan muy muncho.

A lo ke el 24 de Marso de 1929, Rebeca de 14 i Marcos de 21 anyos se kazan; de este matrimonio nacen: Avelina el 11 de Enero de 1930, León el 28 de Desembre de1932, Matilde el 25 de Oktobre de1936 i Reynaldo el 11 de Novembre de 1942.

Kuando nasió Avelina, Rebeca, la madre, kedó hazina por un tiempo, a lo ke Marcos, kon los pen­serios en su djoven mujer, la apuntó unos divas más tadre.

Mientres ke Marcos lavorava en el editorial So-pena i eskapava del lavoro del diva, no mankava de kaminar una kaleja para asentarse i gozar de tomar un kafé en el afamado Café Tortoni, tiempos en ke afilú lavorava para la editorial Jackson, la kuala editava el afamado "El Tesoro de la Juventud" entre otros. Afilú para la editorial Quillet, kon alegría i seguridá me dize Avelina, su ija, ke el mijor ven­dedor de Sopena era Marcos, bien rekonosido por la djente del buto livros, viajava a las sivdades de Ar­gentina, a vezes por dos semanadas, mientres ke los Vos se eskarinyavan asta ke tornava.

Era ombre un poko kurto, de ojos marones, kolor de kara blanko, ele­gante, benadam, de muncho aviar i bueno. Esta kondisión natural azía ke le venda livros a todos ken se le metiera en el ka­mino, al polis, al kartero, al ke kondusía el tramvay, su buen modo de aviar konvensía presto, komo se dize, asta las piedras del kamino.

En la kaleja Viamonte 2475, moravan en una kamareta, kostumbre de akeyos tiempos. En este sitio akontese el nacimiento de Matilde. Por azardo Marcos gana un premio en la Lotería, a lo ke decide alkilar una sala al lado de la kamareta, momentos ke ampesa a estar mor ekonomikamente, trokan­do de morar del kuartier de Villa Crespo a Malabia i Corrientes, despúes a la Avenida Corrientes, al lado de la botika "La Tacita de Plata" de los ermanos Emanuel, djidiós sefaradís de Izmir. En este anyo sale en Argentina la Ley de Propiedad Horizontal, ley ke ayuda a Marcos a merkar su propia kaza en la kaleja Serrano 490.

Por su lavoro, teniya la permisión de entrar en munchos sitios oficiales, mesmo del governo, el kavzo ke este diva entró en las Fuerzas Armadas, al kuartel de Campo de Mayo. Estava arientro del kazino de oficiales aviando i vendiendo, kuando se dezata la Revolución Libertadora en 1955... Mientres ke akontesía esto, uno de los militares le vendió a Marcos una kazika en el Tigre, al bodre del río, sitio ke la famiya nunka konosió. El echo de la revolución i no ayer transporte para viajar, izo ke aboltara a su kaza kaminando tantos kilometrós.

Komo buen vendedor siempre atentivo, echa-va el ojo a los ombres ke ivan asuviendo de grado militar, apuntava kuales livros ya les avía vendido i se aprezentava ofreciéndoles otros, ansina de este modo, kontinuavan komo klientes.

Marcos, toda la vida estuvo en el templo sefa­radí de la kaleja Camargo, sin olvidar a su padre ke fue uno del grupo de ombres ke la fundaron. Mis­mo su ermano Alberto, más konosido komo Avra­machi, kon seguridá puede dizirse ke los dos eran parte importante en la keilá. En la kaza de su padre Samuel, una de las kamaretas la uzavan para azer las tefilot. Antes ke se fraguara el templo, kudiavan muncho de la reiVión i muestras kostumbres. Mis­mo lo izo kon sus fijos, lo azía de korasón, kon amor i muncho respekto, dedikando oras i oras del diga al templo, komo buen voluntario, todo debaides. Ansina no mankava en la mangana de meterse los tefilim i meldar, antes de salir a lavorar .

Kuando ayegó el rabino Aarón Angel a la keilá de Buenos Aires, Marcos kolaboró i lavoró muncho kon él, ayegando al punto de ser amigos. Era solidario i benadam, si savía ke alguno teniya estrechuras i angusias, el pronto ayudava, al punto ke kuando se fue de este mundo, vinieron dos mujeres a saludar a la famiya ke dinguno las konosía, muy esmovidas i rengrasiando disheron ke azía tiempo, eran ayu­dadas por Marcos.

Mismo en la keilá luchó muncho en la kompra del Sementerio de Bancalari, al ver ke kedavan pokos sitios en el bedahayim de Cuidadela. Sus penserios siempre estuvieron en ver las kozas kon realidá, i ansina mirar para adelantre. Rengrasiava a las djentes ke ayudavan a la komunitá, mismo reko­nosia a akeyos ke tenían parás i los ke no tenían.

Para el, kada fiesta al ver la famiya djunta erauna grande alegría, los aprontos de la kaza, mer­kar lo de menester, ver elaborar komidas i dulses. Mismo la esfuegra tenía muncho amor por el, a lo ke venia a kozinar en kada fiesta. Kuando eskapava Pesah, avía tomado la kostumbre de inchir los kan-tones de la kaza kon karamelos para ke bushken los chikitikos.

Los Shabades, despúes del templo, pasava por la kaza kon amigos a bever i komer unos mezés (platitos), entre evos Jose Silicaro i David Guini.

Kuando Avelina ampesa a salir kon Jacques Farji, le ambezó la vendida de livros, a lo ke desde este momento, kon reushitá i mazal bueno no deshó el buto de los livros, asta el momento ke deshó de vender de las editoria­les, i avrió su propio magazen, ande kompravan los vendedores de livros .

Aboltando a Marcos, sus kreaturas, Avelina se kazó kon Jacques Farji, Leon kon Ruth Hodari, Matilde kon Elías Barna-tan i Reynaldo kon Beatriz Bokser. Gozava muy muncho de la mar, a lo ke kada enverano yevava a la famiya a la Mar del Plata. En una okazión merkó un auto kon la idea de ambe­zarse a kondusirlo asta este sitio. Porke nunka avía kondusido, avió kon un ombre i lo kontrató para ke lo yeve, a lo ke ansina akontesió. Una tadre le disho a su u° Leon ke tome el auto i le ambeze en una kaleja ke no pasava dinguno, ama estando Marcos en el volante, en súpito salió un ombre en bisikleta. Marcos no savía komo aretar el auto - am-pesó a echarle unos gritos kon garón de kampana: desgrasiado, sal de mi kamino... Kon este echo akontesido, vendió el auto i nunka más kijo saver de este buto.

La senyora lo kudiava muncho de komidas ke no puedía komer, ama uvo un echo kon su inyeta Diana kuando era chikitika. Le plaziya komer wa­ffies, a lo ke kitava loko a Marcos para ir al magazen a komerlos. Kuando la sinyora se akavidó de esto, le asuvieron los inyervos pretos, por el grande kudya­do de las komidas ke teniya en kaza.

Todos los enveranos, yevava a la famiya a vera­near a la Mar del Plata, mientres ke Marcos lavorava en la Base Naval de este sitio; malgrado ke estava en vakansas, no deshava de lavorar.

Akontesió ke en esta sivdá se fue de este mundo durmiendo, el viernes, 21 de Enero de 1966. El ermano Alberto izo los papeles pishín para traerlo a i sepultarlo antes ke ampese Shabat.

Akontesió un echo muy importante i kuriozo. En el anyo 1928 el gran rabino Shabetay Djaen vino a Buenos Aires, i los dos unikós kazamientos ke izo fueron de 24 Novembre de 1928 los pa­rientes de Jaques Farji, i el 24 de Marso de 1929 el matrimonio de Rebeca i Marcos Gini.

Rebeca, su mujer, se fue de este mundo el 9 de Junio de 1971 i está sepultada en el Sementerio Sefaradi de Bancalari, de mismo ke Marcos.

Rengrasio a Avelina por las datas i fotos para azer este djusto omenaje, a la bendicha memoria de Marcos Gini, ombre ke tanto lavoró por la Ko­munidad Sefaradí de Buenos Aires.

SIN COMENTARIOS

Deja tu Comentario

A excepción de tu nombre y tu correo electrónico tus datos personales no serán visibles y son opcionales, pero nos ayudan a conocer mejor a nuestro público lector

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anterior¿Vamos hacia una Francia sin judíos?
Artículo siguienteLetters to the editor